ന്യൂഡൽഹി: പോലീസ് സ്റ്റേഷനുകളിൽ കസ്റ്റഡി പീഡനങ്ങളും മരണങ്ങളും വർദ്ധിച്ചുവരുന്ന സാഹചര്യത്തിൽ നിർണായക നീക്കവുമായി സുപ്രീം കോടതി. രാജ്യത്തെ എല്ലാ പോലീസ് സ്റ്റേഷനുകളിലും AI (ആർട്ടിഫിഷ്യൽ ഇന്റലിജൻസ്) നിയന്ത്രിത കൺട്രോൾ റൂമുകൾ സ്ഥാപിക്കാൻ നിർദ്ദേശം നൽകുമെന്ന് കോടതി വ്യക്തമാക്കി. മനുഷ്യാവകാശ ലംഘനങ്ങൾ തടയുന്നതിനും കുറ്റകൃത്യങ്ങൾ കൃത്യമായി രേഖപ്പെടുത്തുന്നതിനും ഇത് സഹായകമാകുമെന്നാണ് പ്രതീക്ഷിക്കുന്നത്. സെപ്റ്റംബർ 26-ന് കേസിൽ അന്തിമ വിധി പ്രഖ്യാപിക്കും.
സിസിടിവികൾ ഓഫാകുന്നത് തടയാൻ AI
പോലീസ് സ്റ്റേഷനുകളിലെ സിസിടിവി ക്യാമറകൾ മനപ്പൂർവ്വം ഓഫാക്കിയാണ് പലപ്പോഴും കസ്റ്റഡി പീഡനങ്ങളും കൊലപാതകങ്ങളും നടക്കുന്നതെന്ന് കോടതി ചൂണ്ടിക്കാട്ടി. ക്യാമറകൾ സ്ഥാപിച്ചിട്ടുണ്ടെന്ന് പോലീസ് ഉദ്യോഗസ്ഥർ സത്യവാങ്മൂലം നൽകുമെങ്കിലും, പിന്നീട് അവ പ്രവർത്തനരഹിതമാക്കുന്നു. ഈ സാഹചര്യം ഒഴിവാക്കാൻ, മനുഷ്യന്റെ ഇടപെടലില്ലാതെ, AI മാത്രം നിയന്ത്രിക്കുന്ന നിരീക്ഷണ സംവിധാനം ഒരുക്കാനാണ് കോടതിയുടെ തീരുമാനം. ഒരു സ്റ്റേഷനിലെ ക്യാമറ പ്രവർത്തനരഹിതമായാൽ, അത് ഉടൻ തന്നെ AI സംവിധാനത്തിന്റെ ശ്രദ്ധയിൽപ്പെടുകയും, തുടർനടപടികൾ സ്വീകരിക്കുകയും ചെയ്യും. ജസ്റ്റിസുമാരായ വിക്രംനാഥ്, സന്ദീപ് മേത്ത എന്നിവരടങ്ങിയ ബെഞ്ചാണ് നിർണായകമായ ഈ നടപടികൾക്ക് നേതൃത്വം നൽകുന്നത്.
സ്വതന്ത്ര ഏജൻസിയെ ചുമതലപ്പെടുത്തും
AI സാങ്കേതികവിദ്യയുടെ സഹായത്തോടെ ഈ പദ്ധതി നടപ്പിലാക്കാൻ ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (IIT) യെ ചുമതലപ്പെടുത്താൻ ആലോചിക്കുന്നതായും കോടതി സൂചിപ്പിച്ചു. ആദ്യപടിയായി, എല്ലാ പോലീസ് സ്റ്റേഷനുകളിലും സിസിടിവി ക്യാമറകൾ കൃത്യമായി പ്രവർത്തിക്കുന്നുണ്ടോ എന്ന് പരിശോധിക്കാൻ ഒരു സ്വതന്ത്ര ഏജൻസിയെ നിയോഗിക്കും. ദൃശ്യങ്ങൾ നിരീക്ഷിക്കുന്നതും AI തന്നെയായിരിക്കും.
ഹിന്ദി ദിനപത്രമായ 'ദൈനിക് ഭാസ്കർ' പ്രസിദ്ധീകരിച്ച റിപ്പോർട്ടിന്റെ അടിസ്ഥാനത്തിൽ സ്വമേധയാ എടുത്ത കേസാണ് സുപ്രീം കോടതി ഇപ്പോൾ പരിഗണിക്കുന്നത്. കഴിഞ്ഞ എട്ട് മാസത്തിനിടെ രാജ്യത്തെ വിവിധ പോലീസ് സ്റ്റേഷനുകളിൽ 11 കസ്റ്റഡി മരണങ്ങൾ സംഭവിച്ചുവെന്ന റിപ്പോർട്ട് കോടതി ഗൗരവമായി കാണുന്നു. കേരളത്തിലടക്കം നടന്ന കസ്റ്റഡി പീഡനങ്ങളുടെ സിസിടിവി ദൃശ്യങ്ങൾ പുറത്തുവന്നതിനെ തുടർന്ന് കുറ്റക്കാർക്കെതിരെ നടപടിയുണ്ടായതും കോടതിയുടെ ശ്രദ്ധയിൽപ്പെട്ടിട്ടുണ്ട്. ഈ പശ്ചാത്തലത്തിൽ, രാജ്യവ്യാപകമായി ഇത്തരം സംഭവങ്ങൾ തടയാൻ AI നിരീക്ഷണം അത്യന്താപേക്ഷിതമാണെന്നാണ് കോടതിയുടെ വിലയിരുത്തൽ.
