ഹൈക്കോടതി ജഡ്ജിയുടെ ഔദ്യോഗിക വാഹനം ദുരുപയോഗം ചെയ്ത് പരസ്യം നൽകി, നീതിന്യായ വ്യവസ്ഥയെ അപമാനിച്ച സംഭവത്തിൽ പുതുതായി എൻറോൾ ചെയ്ത അഭിഭാഷകന് ബാർ കൗൺസിൽ ഓഫ് കേരള കാരണം കാണിക്കൽ നോട്ടീസ് അയച്ചു. തൃശൂർ സ്വദേശി മുഹമ്മദ് ഫായിസിനാണ് നോട്ടീസ് ലഭിച്ചത്.
2025 ജൂൺ 1-നാണ് മുഹമ്മദ് ഫായിസ് ബാർ കൗൺസിലിന്റെ റോൾസിൽ എൻറോൾ ചെയ്തത്. എന്നാൽ, ജൂൺ 4-ന് KL7CP2287 എന്ന നമ്പർ പ്ലേറ്റോടുകൂടിയ ഹൈക്കോടതി ജഡ്ജിയുടെ ഔദ്യോഗിക വാഹനത്തിന്റെ ദൃശ്യങ്ങളും, എൻറോൾമെന്റ് ചടങ്ങിലെ ദൃശ്യങ്ങളും ഉൾപ്പെടുത്തി ഒരു വീഡിയോ വാട്ട്‌സ്ആപ്പ് ഗ്രൂപ്പുകളിലും മറ്റ് സാമൂഹിക മാധ്യമ പ്ലാറ്റ്‌ഫോമുകളിലും വ്യാപകമായി പ്രചരിക്കാൻ തുടങ്ങി.
ഈ വീഡിയോ പരസ്യം ചെയ്യലിനും ആളുകളെ സ്വാധീനിക്കലിനും തുല്യമാണെന്നും, നീതിന്യായ വ്യവസ്ഥയുടെ അന്തസ്സിനെ താഴ്ത്തിക്കെട്ടുന്നതാണെന്നും ബാർ കൗൺസിൽ വിലയിരുത്തി. ഹൈക്കോടതി ജഡ്ജിയുടെ ഔദ്യോഗിക വാഹനത്തിന്റെ ദൃശ്യങ്ങൾ ഉപയോഗിച്ചത് ദുരുദ്ദേശ്യപരവും, വിദ്വേഷപരവും, നീതിന്യായ വ്യവസ്ഥയ്‌ക്കെതിരായ കുത്സിതവുമാണെന്ന് നോട്ടീസിൽ പറയുന്നു.
മുഹമ്മദ് ഫായിസിന്റെ ഈ പ്രവൃത്തി ദുഷ്പ്രവൃത്തിയായി കണക്കാക്കാവുന്നതാണെന്നും, അഡ്വക്കേറ്റ്സ് ആക്ട്, 1961-ലെ സെക്ഷൻ 35 പ്രകാരം ഇദ്ദേഹത്തിനെതിരെ നടപടിയെടുക്കാൻ ബാർ കൗൺസിലിന് പ്രാഥമികമായി ബോധ്യം വന്നിട്ടുണ്ടെന്നും നോട്ടീസിൽ പറയുന്നു. നോട്ടീസ് ലഭിച്ച് 15 ദിവസത്തിനകം വിശദീകരണം നൽകണമെന്നും ബാർ കൗൺസിൽ ഓഫ് കേരള ആവശ്യപ്പെട്ടിട്ടുണ്ട്.
