കൊച്ചി: കോടതി നടപടികൾ അനുമതിയില്ലാതെ റെക്കോർഡ് ചെയ്ത് യൂട്യൂബ്, X (ട്വിറ്റർ) തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളിൽ പ്രചരിപ്പിച്ച അഭിഭാഷകനെതിരെ കേരള ഹൈക്കോടതി സ്വമേധയാ ക്രിമിനൽ കോടതിയലക്ഷ്യ കേസ് എടുത്തു. ചീഫ് ജസ്റ്റിസ് സൗമൻ സെൻ, ജസ്റ്റിസ് ശ്യാം കുമാർ വി.എം. എന്നിവരടങ്ങിയ ഡിവിഷൻ ബെഞ്ചാണ് ഹൈക്കോടതി രജിസ്ട്രിയുടെ റിപ്പോർട്ടിന്റെ അടിസ്ഥാനത്തിൽ നടപടിയെടുത്തത്.
വിലക്കുണ്ടെന്നറിഞ്ഞിട്ടും മുന്നറിയിപ്പുകൾ അവഗണിച്ച് അഭിഭാഷകൻ വീഡിയോകൾ തുടർച്ചയായി അപ്‌ലോഡ് ചെയ്തതായി രജിസ്ട്രിയുടെ റിപ്പോർട്ടിൽ പറയുന്നു. "You be the judge", "Cameras cannot lie", "Denial of Justice to MSMEs" തുടങ്ങിയ തലക്കെട്ടുകളോടെയായിരുന്നു വീഡിയോകൾ പ്രചരിപ്പിച്ചത്.
​കോടതിയുടെ അനുമതിയില്ലാതെ നടപടികൾ റെക്കോർഡ് ചെയ്യുന്നതും പ്രചരിപ്പിക്കുന്നതും 'ഇലക്ട്രോണിക് ഓഡിയോ-വീഡിയോ ലിങ്കേജ് റൂൾസ് (കേരള), 2025'-ലെ റൂൾ 3(9) വിരുദ്ധമാണെന്ന് കോടതി വിലയിരുത്തി. ഇത് കോടതിയുടെ അഥോറിറ്റിയെ അപകീർത്തിപ്പെടുത്തുന്നതാണെന്നും 1971-ലെ കോടതിയലക്ഷ്യ നിയമത്തിലെ സെക്ഷൻ 2(c)(i) പ്രകാരം ക്രിമിനൽ കോടതിയലക്ഷ്യത്തിന്റെ പരിധിയിൽ വരുമെന്നും ബെഞ്ച് വ്യക്തമാക്കി.
​അതേസമയം, ആരോപണവിധേയൻ അഭിഭാഷകനായതിനാൽ തൽക്കാലം ഔദ്യോഗികമായി കോടതിയലക്ഷ്യ റൂൾ പുറപ്പെടുവിക്കുന്നില്ലെന്നും, പകരം ഒരു ആഴ്ചയ്ക്കുള്ളിൽ മറുപടി നൽകാൻ നോട്ടീസ് അയക്കാൻ ഉത്തരവിട്ടതായും കോടതി അറിയിച്ചു.
​പ്രധാന നടപടികൾ:
​കേസ് തീർപ്പാകുന്നതുവരെ അഭിഭാഷകന് കേരളത്തിലെ ഒരു കോടതിയിലും ഓൺ‌ലൈൻ/വെർച്വൽ വഴി ഹാജരാകാൻ അനുമതിയുണ്ടാകില്ല.
​ഉത്തരവ് സംസ്ഥാനത്തെ എല്ലാ ഹൈക്കോടതി ജഡ്ജിമാർക്കും ജുഡീഷ്യൽ ഓഫീസർമാർക്കും ഐ.ടി ഡയറക്ടർക്കും അടിയന്തരമായി കൈമാറാൻ നിർദേശിച്ചു.
​കേസ് കൂടുതൽ വാദം കേൾക്കുന്നതിനായി 2026 സെപ്റ്റംബർ 7-ലേക്ക് മാറ്റി.