​ബംഗളൂരു: മുൻ കർണാടക മുഖ്യമന്ത്രി സിദ്ധരാമയ്യയെ ലക്ഷ്യമിട്ട് നടത്തിയതായി ആരോപിക്കപ്പെടുന്ന സ്റ്റിംഗ് ഓപ്പറേഷനുമായി ബന്ധപ്പെട്ട്  ദക്ഷിണ കന്നഡ ജില്ലയിൽ നിന്നുള്ള കോൺഗ്രസ്സ് വനിതാ നേതാവ്  കൃപ ആൽവയെ സിറ്റി പോലീസ് ക്രൈംബ്രാഞ്ച് (CCB) ചോദ്യം ചെയ്തതായി പോലീസ് വൃത്തങ്ങൾ  അറിയിച്ചു.
​​കേസുമായി ബന്ധപ്പെട്ട അന്വേഷണത്തിന്റെ ഭാഗമായി  കൃപ ആൽവ അന്വേഷണ ഏജൻസിക്ക് മുമ്പാകെ ഹാജരാവുകയും, അവരെ ചോദ്യം ചെയ്ത് മൊഴിയെടുക്കുകയും ചെയ്തതായി പോലീസ് വൃത്തങ്ങൾ കൂട്ടിച്ചേർത്തു.
​ഈ സ്റ്റിംഗ് ഓപ്പറേഷന് പിന്നിൽ കൃപ ആൽവയാണെന്ന് സിദ്ധരാമയ്യയും പേരെടുത്ത് പറഞ്ഞിരുന്നു.
​സിദ്ധരാമയ്യയുടെ ആദ്യ മുഖ്യമന്ത്രി കാലയളവിൽ, അതായത് 2015 മുതൽ 2018 വരെ കർണാടക സംസ്ഥാന ബാലാവകാശ സംരക്ഷണ കമ്മീഷൻ ചെയർപേഴ്സണായിരുന്നു 60 കാരിയായ ഈ കോൺഗ്രസ് നേതാവ്.
​ദക്ഷിണ കന്നഡ ജില്ലയിലെ മംഗളൂരുവിൽ നിന്നുള്ള പാർട്ടി വക്താവ് കൂടിയാണ് ആൽവ.
​റിയൽ എസ്റ്റേറ്റ് ബിസിനസ്സുകാരനും പ്രമുഖ രാഷ്ട്രീയ-സാമൂഹിക പ്രവർത്തകനുമായിരുന്ന ഭർത്താവ് അമർ ആൽവ 1992-ൽ ഗുണ്ടാസംഘങ്ങളുടെ കുടിപ്പകയിൽ വെടിയേറ്റു മരിച്ചതിനെ തുടർന്നാണ് അവർ പൊതുജീവിതത്തിലേക്ക് പ്രവേശിച്ചത്. ചെറിയ മകളുമായി വിധവയായ അവർ അമർ ആൽവ ചാരിറ്റബിൾ ട്രസ്റ്റ് സ്ഥാപിക്കുകയും, ലയൺസ് ക്ലബ് ഉൾപ്പെടെയുള്ള സാമൂഹിക സേവന സംഘടനകളിൽ സജീവമാവുകയും, ക്രമേണ കോൺഗ്രസ് പാർട്ടിയിലൂടെ സജീവ രാഷ്ട്രീയത്തിലേക്ക് പ്രവേശിക്കുകയും ചെയ്തു.
​കർണാടക പ്രദേശ് കോൺഗ്രസ് കമ്മിറ്റിയിൽ (KPCC) വക്താവായും സംസ്ഥാന പ്രചാരണ സമിതി കോർഡിനേറ്ററായും അവർ സംഘാടനപരമായ ചുമതലകൾ വഹിച്ചിട്ടുണ്ട്.
​പുത്തൂർ ഉൾപ്പെടെ ദക്ഷിണ കന്നഡയിലെ വിവിധ മണ്ഡലങ്ങളിൽ നിന്ന് നിയമസഭാ തെരഞ്ഞെടുപ്പിൽ മത്സരിക്കാൻ ആൽവ പാർട്ടി ടിക്കറ്റ് തേടിയിരുന്നെങ്കിലും ഇതുവരെ വിജയിക്കാനായില്ല.
​സിദ്ധരാമയ്യയെ ലക്ഷ്യമിട്ടുള്ള സ്റ്റിംഗ് ഓപ്പറേഷൻ ദൃശ്യങ്ങൾ സമൂഹമാധ്യമങ്ങളിൽ അപ്‌ലോഡ് ചെയ്തതുമായി ബന്ധപ്പെട്ട് ഡൽഹി സ്വദേശിയായ റിതേഷ് പാണ്ഡെയെ കഴിഞ്ഞ ആഴ്ച സിസിബി അറസ്റ്റ് ചെയ്തിരുന്നു. ഈ കേസിലെ ആദ്യ അറസ്റ്റായിരുന്നു ഇത്. കോടതി അയാൾക്ക്  ജാമ്യം അനുവദിച്ചിരുന്നു.

Photo Courtesy - Google