ബംഗളുരു: ഒട്ടും പൊരുത്തമില്ലാത്ത രണ്ടുതരം പ്രവർത്തന ശൈലിയുടെ ഉടമകളാണ് മുഖ്യമന്ത്രി ഡി കെ ശിവകുമാറും മുൻ മുഖ്യമന്ത്രി സിദ്ധരാമയ്യയും. സംസ്ഥാന കോൺഗ്രസിലെ സമുന്നത നേതാക്കളായ ഇവർ അഭിപ്രായ വ്യത്യാസം മറന്ന് ഒത്തുചേർന്ന് പ്രവർത്തിച്ചതുകൊണ്ടാണ് 2023 ൽ ബിജെപിയെയും ജെഡി എസിനെയും തോൽപ്പിച്ച് കോൺഗ്രസിന് സംസ്ഥാന ഭരണം പിടിക്കാൻ കഴിഞ്ഞത്. ഉപമുഖ്യമന്ത്രി പദവിയും പിസിസി അധ്യക്ഷ സ്ഥാനവും ഒന്നിച്ചുവഹിച്ച ശിവകുമാർ, മുഖ്യമന്ത്രിയായി സ്ഥാനമേറ്റ സിദ്ധരാമയ്യയോട് തികഞ്ഞ ബഹുമാനവും അടുപ്പവും പുലർത്തിയിരുന്നു. ഇക്കഴിഞ്ഞ മെയ്‌ 28 നാണ് ഹൈക്കമാണ്ട് നിർദ്ദേശപ്രകാരം സിദ്ധരാമയ്യ മുഖ്യമന്ത്രിക്കസേര ശിവകുമാറിന് ഒഴിഞ്ഞുകൊടുത്തത്.എന്നാൽ സഭ്യമല്ലാത്ത കാര്യങ്ങൾ ഒളി ക്യാമറയിൽ ചിത്രീകരിച്ചു വിരട്ടിയാണ് സിദ്ധരാമയ്യയെ മാറ്റിയത് എന്ന ആരോപണ ബോംബ് കേന്ദ്രമന്ത്രിയും ജെഡിഎസ്‌ നേതാവുമായ കുമാരസ്വാമി വർഷിച്ചതോടെ സംസ്ഥാനത്തെ കോൺഗ്രസ്സ് രാഷ്ട്രീയം കലങ്ങി മറിഞ്ഞിരിക്കുകയാണ്. സിദ്ധരാമയ്യ കുമാരസ്വാമിയുടെ ആരോപണം നിഷേധിച്ചിട്ടില്ലെന്ന് മാത്രമല്ല, അത്തരം വിഡിയോകൾ പ്രചരിപ്പിക്കുന്നതിനെതിരെ കോടതിയിൽ നിന്ന് സ്റ്റേ വാങ്ങുകയും ചെയ്തു. സിദ്ധരാമയ്യയ്‌ക്കെതിരായ അപകീർത്തികരമായ വീഡിയോകൾ പ്രചരിപ്പിക്കുന്നതിൽനിന്ന് മാധ്യമസ്ഥാപനങ്ങളെ ബെംഗളൂരു കോടതി വിലക്കിയതിനു പിന്നാലെ കർണാടകയിലെ സ്റ്റിംഗ് ഓപ്പറേഷൻ വിവാദം കൂടുതൽ സങ്കീർണമായി.
വിവാദം സിദ്ധരാമയ്യയുടെ പ്രതിച്ഛായയെ ബാധിച്ചപ്പോൾ, സ്റ്റിംഗ് ഓപ്പറേഷനിൽ ശിവകുമാറിന് പങ്കുണ്ടെന്ന ആരോപണവുമായി പ്രതിപക്ഷവും രംഗത്തെത്തി. കൂടുതൽ മന്ത്രിമാർ സ്റ്റിംഗ് ഓപ്പറേഷനുകളുടെ ലക്ഷ്യമായേക്കാമെന്ന് ഒക്ടോബർ ആറിന് ചേർന്ന മന്ത്രിസഭായോഗത്തിൽ ശിവകുമാർ മുന്നറിയിപ്പ് നൽകിയതായും റിപ്പോർട്ടുകളുണ്ട്.
നൈസ് ഭൂമിയിടപാടും മറ്റ് അഴിമതി ആരോപണങ്ങളും ചർച്ചയിൽനിന്ന് വഴിതിരിച്ചുവിടാനാണ് സ്റ്റിംഗ് വിവാദം ഉയർത്തുന്നതെന്ന് കുമാരസ്വാമി ആരോപിക്കുന്നു. അതേസമയം, കർണാടകയിൽ രാഷ്ട്രീയക്കാരെ ലക്ഷ്യമിട്ട് ഹണിട്രാപ്പ്, സ്റ്റിംഗ് ഓപ്പറേഷൻ ശൃംഖല പ്രവർത്തിക്കുന്നുണ്ടെന്ന ആരോപണവും വിവിധ നേതാക്കൾ ഉന്നയിച്ചിട്ടുണ്ട്. വിവാദ വീഡിയോകളുടെ ആധികാരികതയും ഇതിനു പിന്നിലുള്ളവരുടെ പങ്കും അന്വേഷണത്തിലൂടെ വ്യക്തമാകേണ്ടതുണ്ട്.
സിദ്ധരാമയ്യയെ ബ്ലാക്ക്‌മെയിൽ ചെയ്ത് മുഖ്യമന്ത്രി സ്ഥാനത്തുനിന്ന് ഒഴിയാൻ നിർബന്ധിച്ചെന്ന ആരോപണം അഹിന്ദ വിഭാഗങ്ങൾക്കിടയിൽ സ്വാധീനം ചെലുത്തിയാൽ കോൺഗ്രസിന്റെ ആഭ്യന്തര രാഷ്ട്രീയത്തിൽ വലിയ പ്രത്യാഘാതങ്ങളുണ്ടാകാം. 2028-ലെ നിയമസഭാ തിരഞ്ഞെടുപ്പിനുശേഷം മുഖ്യമന്ത്രി സ്ഥാനത്തേക്കുള്ള ശിവകുമാറിന്റെ അവകാശവാദത്തിനും ഇത് തിരിച്ചടിയായേക്കും.
കോൺഗ്രസിലെ ആഭ്യന്തര ഭിന്നത ബിജെപിക്കും ജെ.ഡി.എസിനും രാഷ്ട്രീയ നേട്ടമുണ്ടാക്കാനുള്ള അവസരമാണ്. അതിനാൽ സ്റ്റിംഗ് ഓപ്പറേഷൻ വിവാദം വ്യക്തികളുടെ പ്രതിച്ഛായയെ മാത്രം ബാധിക്കുന്ന വിഷയമല്ല; കർണാടകയിലെ അധികാരമത്സരത്തെയും വരാനിരിക്കുന്ന തിരഞ്ഞെടുപ്പിനെയും സ്വാധീനിക്കാൻ സാധ്യതയുള്ള രാഷ്ട്രീയ പോരാട്ടം കൂടിയാണ്.

Photo Courtesy - Google