സിനിമാ മേഖലയിലെ അതിക്രമങ്ങളെക്കുറിച്ച് പഠിക്കാൻ നിയോഗിച്ച ജസ്റ്റിസ് ഹേമ കമ്മിറ്റിയുടെ റിപ്പോർട്ടിന്റെ അടിസ്ഥാനത്തിൽ രജിസ്റ്റർ ചെയ്ത 35 കേസുകളിൽ 33 എണ്ണത്തിന്റെ തുടർനടപടികൾ പ്രത്യേക അന്വേഷണ സംഘം (SIT) അവസാനിപ്പിക്കുന്നു. മൊഴി നൽകിയവർക്ക് കേസുമായി മുന്നോട്ട് പോകാൻ താൽപര്യമില്ലെന്ന് അറിയിച്ചതിനെ തുടർന്നാണ് ഈ നടപടി. ഹൈക്കോടതി നിർദ്ദേശപ്രകാരമാണ് ഈ കേസുകൾ രജിസ്റ്റർ ചെയ്തത്.

23 കേസുകൾ അവസാനിപ്പിക്കുന്നതായി പ്രത്യേക അന്വേഷണ സംഘം ഹൈക്കോടതിയിൽ റിപ്പോർട്ട് സമർപ്പിച്ചു. ബാക്കിയുള്ളവ ഈ മാസം അവസാനത്തോടെ അവസാനിപ്പിക്കുമെന്നും അധികൃതർ അറിയിച്ചു. ഹേമ കമ്മിറ്റി റിപ്പോർട്ടിന്റെ ചില ഭാഗങ്ങൾ വിവരാവകാശ കമ്മീഷനിലൂടെ പുറത്തുവന്നതിനെ തുടർന്നാണ് 2024 ഓഗസ്റ്റിൽ സർക്കാർ പ്രത്യേക അന്വേഷണ സംഘത്തെ നിയോഗിച്ചത്.
തുടർനടപടികൾ അവസാനിക്കാൻ കാരണം

മൊഴിയെടുക്കാൻ നോട്ടീസ് നൽകിയിട്ടും ഒരാളൊഴികെ മറ്റെല്ലാവരും കേസിൽ താൽപര്യമില്ലെന്ന് അറിയിക്കുകയായിരുന്നു. കോടതി മുഖേന നോട്ടീസ് കൈമാറിയപ്പോഴും മറുപടിയിൽ മാറ്റമൊന്നും ഉണ്ടായില്ല. ഈ സാഹചര്യത്തിലാണ് കേസുകൾ അവസാനിപ്പിക്കാൻ അന്വേഷണ സംഘം തീരുമാനിച്ചത്.

കുറ്റപത്രം സമർപ്പിച്ച കേസുകൾ

ഹേമ കമ്മിറ്റി റിപ്പോർട്ടിലെ മൊഴികൾ കൂടാതെ 40-ൽ അധികം കേസുകൾ രജിസ്റ്റർ ചെയ്തിട്ടുണ്ട്. ഇതിൽ 35 കേസുകളിൽ കുറ്റപത്രം സമർപ്പിച്ചു കഴിഞ്ഞു. നടൻ മുകേഷ്, മണിയൻപിള്ള രാജു, രഞ്ജിത്ത്, സിദ്ദിഖ്, ജയസൂര്യ എന്നിവർ പ്രതികളായ കേസുകളിലാണ് കുറ്റപത്രം സമർപ്പിച്ചത്. ശേഷിക്കുന്ന കേസുകളിലും വൈകാതെ കുറ്റപത്രം സമർപ്പിക്കുമെന്ന് ഉദ്യോഗസ്ഥർ അറിയിച്ചു. നടൻ മുകേഷ്, സിദ്ദിഖ് എന്നിവർ പ്രതികളായ മറ്റു ചില കേസുകളിൽ അന്വേഷണം തുടരും.

ഭാവി സാധ്യതകൾ

അവസാനിപ്പിച്ച 33 കേസുകളിൽ, മൊഴി നൽകിയവർക്ക് പിന്നീട് താൽപര്യമുണ്ടാവുകയാണെങ്കിൽ എപ്പോൾ വേണമെങ്കിലും തുടരന്വേഷണത്തിന് വഴിയൊരുങ്ങുമെന്നും, ഈ രീതിയിലാണ് ഹൈക്കോടതിയിൽ റിപ്പോർട്ട് സമർപ്പിച്ചിട്ടുള്ളതെന്നും ഉന്നത പോലീസ് ഉദ്യോഗസ്ഥർ  പറഞ്ഞു.

പാർവതി തിരുവോത്തിന്റെ പ്രതികരണം:

നടി പാർവതി തിരുവോത്ത് സമൂഹമാധ്യമങ്ങളിലൂടെ ഈ വിഷയത്തിൽ പ്രതികരിച്ചു. "റിപ്പോർട്ട് സമർപ്പിച്ചിട്ട് അഞ്ചരവർഷമല്ലേ ആയുള്ളൂ. തിരക്കില്ല മുഖ്യമന്ത്രി. കമ്മിറ്റി രൂപീകരിച്ചതിന്റെ യഥാർത്ഥ കാരണത്തിന് ഇനി പ്രാധാന്യം നൽകാം. സിനിമാവ്യവസായത്തിൽ നിയമങ്ങൾ കൊണ്ടുവരാൻ നയങ്ങൾ രൂപീകരിക്കലല്ലേ ലക്ഷ്യം," പാർവതി കുറിച്ചു.