തിരുവനന്തപുരം: സംസ്ഥാനത്ത് തുടരുന്ന കനത്ത മഴയുടെയും പ്രതികൂല കാലാവസ്ഥയുടെയും പശ്ചാത്തലത്തിൽ പത്തനംതിട്ട, മലപ്പുറം, ആലപ്പുഴ ജില്ലകളിലെ എല്ലാ വിദ്യാഭ്യാസ സ്ഥാപനങ്ങൾക്കും ഓഗസ്റ്റ് 4 ചൊവ്വാഴ്ച ജില്ലാ കളക്ടർമാർ അവധി പ്രഖ്യാപിച്ചു.
പ്രൊഫഷണൽ കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകമാണ്. കൂടാതെ മദ്രസകൾ, അങ്കണവാടികൾ, ട്യൂഷൻ സെന്ററുകൾ എന്നിവയും പ്രവർത്തിക്കില്ല.
കനത്ത മഴയെ തുടർന്നുണ്ടായ വെള്ളക്കെട്ടും പ്രളയസാഹചര്യവും കണക്കിലെടുത്താണ് തീരുമാനം. പല സ്കൂളുകളിലും ദുരിതാശ്വാസ ക്യാമ്പുകൾ പ്രവർത്തിക്കുന്നതും അവധി പ്രഖ്യാപിക്കാൻ കാരണമായതായി ജില്ലാ ഭരണകൂടം അറിയിച്ചു.
അതേസമയം, മുൻകൂട്ടി നിശ്ചയിച്ചിരിക്കുന്ന സർവകലാശാല പരീക്ഷകൾ, പി.എസ്.സി. പരീക്ഷകൾ, മറ്റ് പൊതുപരീക്ഷകൾ എന്നിവയ്ക്ക് അവധി ബാധകമല്ലെന്നും അവ നിശ്ചയിച്ച പ്രകാരം തന്നെ നടക്കുമെന്നും അധികൃതർ വ്യക്തമാക്കി.
ജില്ലകളിൽ മഴ ശക്തമായി തുടരുന്ന സാഹചര്യത്തിൽ പൊതുജനങ്ങൾ അനാവശ്യ യാത്രകൾ ഒഴിവാക്കി ജാഗ്രത പാലിക്കണമെന്നും ജില്ലാ ഭരണകൂടം അഭ്യർഥിച്ചിട്ടുണ്ട്.
