ദോഹ: ഖത്തറിൽ നാളെയും മറ്റന്നാളും (മാർച്ച് 26, 27) ശക്തമായ മഴയ്ക്കും ഇടിമിന്നലിനും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. അന്തരീക്ഷത്തിലുണ്ടായ ന്യൂനമർദ്ദത്തെത്തുടർന്ന് രാജ്യം അസ്ഥിരമായ കാലാവസ്ഥയുടെ പിടിയിലാണെന്നും പൊതുജനങ്ങൾ ജാഗ്രത പാലിക്കണമെന്നും അധികൃതർ അറിയിച്ചു.
വ്യാഴം, വെള്ളി ദിവസങ്ങളിൽ മഴയുടെ തീവ്രത ഇടത്തരം മുതൽ കനത്തതു വരെയായിരിക്കും. ഇടിമിന്നലോടു കൂടിയ മഴയ്‌ക്കൊപ്പം ശക്തമായ കാറ്റ് വീശാനും സാധ്യതയുണ്ട്. ഇതിന്റെ ഫലമായി തുറസ്സായ സ്ഥലങ്ങളിൽ കാഴ്ചാപരിധി (Visibility) കുറയാൻ സാധ്യതയുള്ളതിനാൽ വാഹനമോടിക്കുന്നവർ പ്രത്യേകം ശ്രദ്ധിക്കണം.
ചിലയിടങ്ങളിൽ ശക്തമായ കാറ്റിനൊപ്പം ആലിപ്പഴ വർഷത്തിനും (Hail) സാധ്യതയുണ്ടെന്ന് കാലാവസ്ഥാ റിപ്പോർട്ട് സൂചിപ്പിക്കുന്നു. ആകാശം ഭാഗികമായി മേഘാവൃതമായിരിക്കുമെങ്കിലും ഇടയ്ക്കിടെ കനത്ത മഴ പെയ്യാൻ സാധ്യതയുള്ളതിനാൽ പുറത്തിറങ്ങുന്നവർ ജാഗ്രതപാലിക്കണം.
ശക്തമായ കാറ്റും മഴയും പ്രതീക്ഷിക്കുന്ന സാഹചര്യത്തിൽ സുരക്ഷാ മുൻകരുതലുകൾ സ്വീകരിക്കണമെന്ന് സിവിൽ ഡിഫൻസും കാലാവസ്ഥാ വകുപ്പും അഭ്യർത്ഥിച്ചു. ഔദ്യോഗിക ചാനലുകൾ വഴി നൽകുന്ന കാലാവസ്ഥാ അപ്‌ഡേറ്റുകൾ കൃത്യമായി ശ്രദ്ധിക്കണമെന്നും അധികൃതർ നിർദ്ദേശിച്ചു.
