തിരുവനന്തപുരം: കാലാവസ്ഥയിലെ അപ്രതീക്ഷിത മാറ്റങ്ങളുടെ പശ്ചാത്തലത്തിൽ സംസ്ഥാനത്ത് പകർച്ചവ്യാധികൾ വ്യാപകമായി പടരാനുള്ള സാധ്യത ഉയർന്നതായി ആരോഗ്യവകുപ്പ് മുന്നറിയിപ്പ് നൽകി. സാഹചര്യം ദുരന്തസമാനമാണെന്ന് വിലയിരുത്തിയ സർക്കാർ, വിവിധ വകുപ്പുകൾ ഏകോപിപ്പിച്ച് പ്രതിരോധ പ്രവർത്തനങ്ങൾ ശക്തമാക്കാൻ നിർദേശം നൽകി.

എച്ച്1എൻ1, ഡെങ്കിപ്പനി, എലിപ്പനി, ചിക്കുൻഗുനിയ, മഞ്ഞപ്പിത്തം തുടങ്ങിയ രോഗങ്ങൾ 2017-ലെ പോലെ വ്യാപകമാകാൻ സാധ്യതയുണ്ടെന്നാണ് ആരോഗ്യവകുപ്പിന്റെ ആശങ്ക. ഇതുസംബന്ധിച്ച് ചേർന്ന മന്ത്രിതല യോഗത്തിൽ അടിയന്തര പ്രതിരോധ നടപടികൾക്ക് രൂപം നൽകി.

കോഴിക്കോട് ഷിഗെല്ല രോഗബാധയെ തുടർന്ന് ഒരു കുട്ടി മരിക്കുകയും ആലപ്പുഴയിലും കോഴിക്കോട്ടും കൂടുതൽ കേസുകൾ റിപ്പോർട്ട് ചെയ്യപ്പെടുകയും ചെയ്ത സാഹചര്യത്തിൽ ആരോഗ്യ, ഭക്ഷ്യസുരക്ഷ, തദ്ദേശസ്വയംഭരണ വകുപ്പുകൾക്ക് കർശന പരിശോധന നടത്താൻ നിർദേശം നൽകിയിട്ടുണ്ട്. ആലപ്പുഴയിലെ രോഗബാധയുടെ ഉറവിടം കണ്ടെത്തിയെങ്കിലും കോഴിക്കോട്ടെ ഉറവിടം ഇതുവരെ കണ്ടെത്താനായിട്ടില്ല.

തിരുവനന്തപുരം, എറണാകുളം, തൃശൂർ ജില്ലകളിൽ ഡെങ്കിപ്പനി, എലിപ്പനി, ചിക്കുൻഗുനിയ എന്നിവയുടെ വ്യാപനസാധ്യത കൂടുതലാണെന്ന് വിലയിരുത്തുന്നു. വിവിധ വകുപ്പുകളുടെ സംയുക്ത പ്രവർത്തനത്തിലൂടെ പ്രതിരോധ നടപടികൾ കൂടുതൽ കാര്യക്ഷമമാക്കണമെന്ന് മുഖ്യമന്ത്രിയുടെ അധ്യക്ഷതയിൽ ചേർന്ന യോഗം നിർദേശിച്ചു.

അതേസമയം, എച്ച്1എൻ1 രോഗലക്ഷണങ്ങൾ പലപ്പോഴും സാധാരണ ജലദോഷമോ പനിയോ ആയി തെറ്റിദ്ധരിക്കപ്പെടുന്നതിനാൽ പ്രത്യേക ജാഗ്രത വേണമെന്ന് ആരോഗ്യവകുപ്പ് അറിയിച്ചു. പനിയോ ജലദോഷമോ അനുഭവപ്പെടുന്ന ഗർഭിണികൾ സ്വയം ചികിത്സ ഒഴിവാക്കി ഉടൻ വൈദ്യസഹായം തേടണമെന്നും അധികൃതർ നിർദേശിച്ചു. രോഗം ഗുരുതരമായാൽ ഗർഭസ്ഥ ശിശുവിന്റെ ആരോഗ്യത്തെയും പ്രതികൂലമായി ബാധിക്കാനുള്ള സാധ്യതയുണ്ടെന്നും മുന്നറിയിപ്പിൽ പറയുന്നു.