
തിരുവനന്തപുരം / ന്യൂയോർക്ക്: ഗണിതശാസ്ത്രത്തിലെ ഏറ്റവും സങ്കീർണ്ണമായ പ്രഹേളികകളിലൊന്നായ റീമാൻ ഹൈപ്പോതെസിസിന് (Riemann Hypothesis) ആർട്ടിഫിഷ്യൽ ഇന്റലിജൻസിന്റെ (എ.ഐ) സഹായത്തോടെ ഉത്തരം കണ്ടെത്തിയെന്ന അവകാശവാദം ഗണിതശാസ്ത്ര ലോകത്ത് പുതിയ ചർച്ചകൾക്ക് തിരികൊളുത്തിയിരിക്കുകയാണ്. 167 വർഷം മുമ്പ് ജർമ്മൻ ഗണിതശാസ്ത്രജ്ഞൻ ബെർനാർഡ് റീമാൻ മുന്നോട്ടുവച്ച സിദ്ധാന്തം ശരിയാണെന്നാണ് എ.ഐ തെളിയിച്ചിരിക്കുന്നതെന്നാണ് റിപ്പോർട്ട്. പത്തുലക്ഷം ഡോളർ (ഏകദേശം 9.26 കോടി രൂപ) സമ്മാനം പ്രഖ്യാപിച്ചിട്ടുള്ള ഈ പ്രഹേളികയുടെ ചരിത്രത്തിലെ ശ്രദ്ധേയമായ ഒരു ഘട്ടമായാണ് ഈ അവകാശവാദം വിലയിരുത്തപ്പെടുന്നത്.
അമേരിക്കൻ എ.ഐ സ്ഥാപനമായ ആന്ത്രോപിക്കിലെ ഗവേഷകനായ ലവന്റ് അൽപോഗേയാണ് ഈ വാദത്തിന് പിന്നിൽ. 'ക്ലോഡ്' (Claude) എന്ന എ.ഐ മോഡലിന്റെ സഹായത്തോടെ അദ്ദേഹം റീമാൻ സിദ്ധാന്തം തെളിയിച്ചതായാണ് പറയുന്നത്. ഇതിനായി ഏകദേശം 2.5 ലക്ഷം പേജുകളോളം വരുന്ന തെളിവുകളാണ് എ.ഐ വഴി തയ്യാറാക്കിയിരിക്കുന്നത്. എന്നാൽ ഈ അവകാശവാദം ശാസ്ത്രലോകം ഔദ്യോഗികമായി അംഗീകരിച്ചിട്ടില്ല. ഇത്രയധികം പേജുകൾ വരുന്ന വാദങ്ങൾ സൂക്ഷ്മമായി പരിശോധിച്ച് ശരിയാണോ എന്ന് ഉറപ്പുവരുത്താൻ വിദഗ്ധർക്ക് വർഷങ്ങൾ തന്നെ വേണ്ടിവന്നേക്കാം.
എന്താണ് അവിഭാജ്യ സംഖ്യകളുടെ രഹസ്യം?
അവിഭാജ്യ സംഖ്യകൾ (Prime Numbers): 1 കൊണ്ടും ആ സംഖ്യ കൊണ്ടും മാത്രമേ നിശ്ശേഷം ഹരിക്കാൻ സാധിക്കൂ എന്ന പ്രത്യേകതയുള്ള സംഖ്യകളാണിവ. 2, 3, 5, 7, 11, 13, 17, 19 തുടങ്ങിയവ ഉദാഹരണങ്ങളാണ്. 1 മുതൽ 100 വരെയുള്ള സംഖ്യകളിൽ 25 എണ്ണം അവിഭാജ്യ സംഖ്യകളാണ്.
ക്രമരഹിതമായ വിന്യാസം: സംഖ്യകൾ വലുതാകുന്നതിനനുസരിച്ച് ഇവയുടെ എണ്ണത്തിലും മാറ്റമുണ്ടാകും. ഇവയുടെ വരവിൽ പ്രത്യക്ഷത്തിൽ ഒരു നിശ്ചിത ക്രമമോ പൊതുവായ ബന്ധമോ കാണാൻ കഴിയില്ല.
റീമാന്റെ സീറ്റാ ഫംഗ്ഷൻ: ഈ ക്രമരഹിതമായ വിന്യാസത്തിന് പിന്നിലും കൃത്യമായ ഒരു ഗണിതബന്ധമുണ്ടെന്ന് 167 വർഷം മുമ്പ് ബെർനാർഡ് റീമാൻ ചൂണ്ടിക്കാണിച്ചു. ഇതിനായി അദ്ദേഹം അവതരിപ്പിച്ച സീറ്റാ ഫംഗ്ഷൻ (Zeta Function) എന്ന സമവാക്യമുപയോഗിച്ച് ഗ്രാഫ് തയ്യാറാക്കുമ്പോൾ, പ്രധാനപ്പെട്ട ഘടകങ്ങൾ ഒരു നേർരേഖയിൽ വരുന്നതായി കാണാം.
തെളിയിക്കപ്പെടാത്ത അനന്തത: ഈ നിയമം അനന്തമായ സംഖ്യകൾക്കും ഒരുപോലെ ബാധകമാണെന്ന് പൂർണ്ണമായി തെളിയിക്കാൻ ഇതുവരെ ആർക്കും കഴിഞ്ഞിരുന്നില്ല. അത് സാധ്യമായെന്നാണ് അൽപോഗേയുടെ വാദം.
മറുവാദവുമായി മറ്റൊരു ഗവേഷകനും
എ.ഐ സഹായമില്ലാതെ തന്നെ റീമാൻ സിദ്ധാന്തം തെളിയിച്ചിട്ടുണ്ടെന്ന അവകാശവാദവുമായി അലസാൻഡ്രോ മസുല്ലോ എന്ന ഗവേഷകനും രംഗത്തുണ്ട്. 12 വർഷത്തെ കഠിനാധ്വാനത്തിലൂടെ ഏകദേശം ആയിരത്തോളം പേജുകളുള്ള ഒരു തെളിവ് അദ്ദേഹം തയ്യാറാക്കിയിട്ടുണ്ടെന്നാണ് വിവരം.
കമ്പ്യൂട്ടേഷണൽ ടൂളുകളുടെയും എ.ഐയുടെയും സഹായത്തോടെ സങ്കീർണ്ണമായ ഗണിതശാസ്ത്ര പ്രശ്നങ്ങൾക്ക് പരിഹാരം കാണാൻ ശ്രമിക്കുന്ന പുതിയ കാലത്ത്, ഈ അവകാശവാദങ്ങളുടെ ആധികാരികത പരിശോധിക്കുന്നതിലേക്കാണ് ഇനി ഗണിതശാസ്ത്ര സമൂഹത്തിന്റെ ശ്രദ്ധ.










