ദോഹ: ആഗോള കപ്പൽ ഗതാഗത രംഗത്ത് വൻ പ്രതിസന്ധികൾ നിലനിൽക്കുന്ന സാഹചര്യത്തിലും മിന്നും നേട്ടവുമായി ഖത്തറിന്റെ പ്രധാന സമുദ്ര കവാടമായ ഹമദ് പോർട്ട്. ലോകബാങ്കും എസ് ആൻഡ് പി ഗ്ലോബൽ മാർക്കറ്റ് ഇന്റലിജൻസും സംയുക്തമായി പുറത്തുവിട്ട 2025-ലെ 'കണ്ടെയ്‌നർ പോർട്ട് പെർഫോമൻസ് ഇൻഡക്സ്' (CPPI) പ്രകാരം ഹമദ് പോർട്ട് മൂന്ന് സ്ഥാനങ്ങൾ മെച്ചപ്പെടുത്തി ലോകതലത്തിൽ എട്ടാം സ്ഥാനത്തെത്തി. ഗൾഫ് മേഖലയിലെ തുറമുഖങ്ങളിൽ രണ്ടാം സ്ഥാനമാണ് ഹമദ് പോർട്ടിനുള്ളത്.
കപ്പലുകളുടെ വേഗതയേറിയ കൈകാര്യം ചെയ്യൽ (Turnaround time), ബർത്ത് ഉൽപ്പാദനക്ഷമത, കാർഗോ ഹാൻഡ്‌ലിംഗ് എന്നിവയുടെ അടിസ്ഥാനത്തിൽ ലോകത്തിലെ ഏറ്റവും കാര്യക്ഷമമായ തുറമുഖങ്ങളെ കണ്ടെത്തുന്ന ആധികാരിക സൂചികയാണിത്.
അടിസ്ഥാന സൗകര്യ വികസനം, ഡിജിറ്റലൈസേഷൻ, പ്രവർത്തന മികവ് എന്നിവയിൽ ഖത്തർ വർഷങ്ങളായി നടത്തിയ നിക്ഷേപങ്ങളുടെ പ്രതിഫലനമാണ് ഈ അന്താരാഷ്ട്ര നേട്ടം. ലോകത്തിലെ പല പ്രമുഖ തുറമുഖങ്ങളും കപ്പൽ വൈകൽ, ഉയർന്ന പ്രവർത്തനച്ചെലവ് എന്നിവയാൽ ബുദ്ധിമുട്ടുമ്പോഴാണ് ഹമദ് പോർട്ട് ഈ നേട്ടം കൈവരിച്ചത്.അന്താരാഷ്ട്ര ഷിപ്പിംഗ് റൂട്ടുകളിലെ തന്ത്രപ്രധാനമായ സ്ഥാനം വഴി ഏഷ്യ, യൂറോപ്പ്, ആഫ്രിക്ക, മിഡിൽ ഈസ്റ്റ് എന്നിവയെ ബന്ധിപ്പിക്കുന്ന പ്രാദേശിക വിതരണ കേന്ദ്രമായി ഹമദ് പോർട്ട് മാറിയിരിക്കുകയാണ്. ഹൈഡ്രോകാർബൺ (എണ്ണ, വാതക) ഇതര മേഖലകളുടെ വികസനത്തിനും ഖത്തറിന്റെ സാമ്പത്തിക വൈവിധ്യവൽക്കരണത്തിനും ഈ മുന്നേറ്റം വൻ കരുത്താകും.
