ദോഹ: രാജ്യത്തെ രോഗികൾക്ക് ആവശ്യമായ മരുന്നുകളുടെ ലഭ്യതയിൽ യാതൊരു തടസ്സവുമുണ്ടാകില്ലെന്ന് ഹമദ് മെഡിക്കൽ കോർപ്പറേഷൻ (HMC) അറിയിച്ചു. ഏത് സാഹചര്യത്തെയും നേരിടാൻ പര്യാപ്തമായ രീതിയിലുള്ള മരുന്നുകളുടെ തന്ത്രപ്രധാനമായ ശേഖരം (Strategic Stockpile) ഖത്തറിലുണ്ടെന്ന് എച്ച്.എം.സി വ്യക്തമാക്കി.ഖത്തർ പോസ്റ്റുമായി സഹകരിച്ച് മരുന്നുകൾ വീട്ടിലെത്തിക്കുന്ന സേവനം തടസ്സമില്ലാതെ തുടരുന്നു.ലബൈഹ്' (Lbaih) മൊബൈൽ ആപ്പ് വഴിയോ അല്ലെങ്കിൽ 16000 എന്ന നാഷണൽ ഹെൽത്ത്‌കെയർ ഹെൽപ്പ് ലൈൻ നമ്പറിൽ വിളിച്ച് ഫാർമസ്യൂട്ടിക്കൽ സേവനങ്ങൾ തിരഞ്ഞെടുത്തോ മരുന്നുകൾ ഓർഡർ ചെയ്യാം.ആശുപത്രികളിലെ തിരക്ക് കുറയ്ക്കാനും രോഗികളുടെ സുരക്ഷ ഉറപ്പാക്കാനും ലക്ഷ്യമിട്ട് ടെലി-മെഡിസിൻ സേവനങ്ങളും വിപുലീകരിച്ചിട്ടുണ്ട്.ഡോക്ടർമാരുടെ സേവനം ഫോൺ വഴിയോ വീഡിയോ കോൾ വഴിയോ ലഭ്യമാണ്. ഇത് മുതിർന്ന പൗരന്മാർക്കും വിട്ടുമാറാത്ത രോഗങ്ങളുള്ളവർക്കും ഏറെ സഹായകരമാണ്.
ജീവന് ഭീഷണിയില്ലാത്ത അടിയന്തര ആരോഗ്യ പ്രശ്നങ്ങൾക്ക് 24 മണിക്കൂറും പ്രവർത്തിക്കുന്ന ഹെൽത്ത് സെന്ററുകളുടെ സേവനം ലഭ്യമാണ്.നിലവിലെ ആഗോള സാഹചര്യങ്ങൾ കണക്കിലെടുത്ത് മരുന്നുകളുടെയും മെഡിക്കൽ ഉപകരണങ്ങളുടെയും വിതരണം തടസ്സപ്പെടാതിരിക്കാൻ വിപുലമായ ലോജിസ്റ്റിക്സ് പ്ലാനുകളാണ് ഖത്തർ നടപ്പിലാക്കിയിരിക്കുന്നത്. ആവശ്യമായി വന്നാൽ പകരം ഗതാഗത സംവിധാനങ്ങൾ ഉപയോഗിച്ച് മരുന്നുകൾ എത്തിക്കാനുള്ള തയ്യാറെടുപ്പുകളും പൂർത്തിയായിട്ടുണ്ട്.
​ജനങ്ങൾക്ക് മികച്ച ഗുണനിലവാരമുള്ള ചികിത്സയും തടസ്സമില്ലാത്ത സേവനങ്ങളും ഉറപ്പാക്കാൻ ആരോഗ്യ മന്ത്രാലയം പ്രതിജ്ഞാബദ്ധമാണെന്ന് അധികൃതർ കൂട്ടിച്ചേർത്തു.