ദോഹ: കൂടുതൽ വിമാനങ്ങൾ സർവീസ് ആരംഭിച്ചതോടെ ദോഹ ഹമദ് രാജ്യാന്തര വിമാനത്താവളം (HIA) യാത്രക്കാരെ വരവേൽക്കാൻ സജ്ജമായി. കോഴിക്കോട് ഉൾപ്പെടെയുള്ള വിവിധ ഇന്ത്യൻ നഗരങ്ങളിലേക്കും മറ്റ് അന്താരാഷ്ട്ര കേന്ദ്രങ്ങളിലേക്കും കൂടുതൽ വിമാനങ്ങൾ ഷെഡ്യൂൾ ചെയ്ത സാഹചര്യത്തിൽ, യാത്രക്കാരുടെ തിരക്ക് നിയന്ത്രിക്കാനും മികച്ച സേവനം ഉറപ്പാക്കാനും വിപുലമായ ക്രമീകരണങ്ങളാണ് വിമാനത്താവളത്തിൽ ഒരുക്കിയിരിക്കുന്നത്.
വർദ്ധിച്ചുവരുന്ന വിമാന സർവീസുകൾക്ക് അനുസൃതമായി യാത്രക്കാരുടെ ഒഴുക്ക് നിയന്ത്രിക്കാൻ ബന്ധപ്പെട്ട അധികൃതരുമായി ചേർന്ന് വിമാനത്താവളം പൂർണ്ണ സജ്ജമാണ്.സാധുവായതും കൺഫേം ചെയ്തതുമായ ടിക്കറ്റുകൾ ഉള്ളവർ മാത്രം വിമാനത്താവളത്തിലേക്ക് എത്തണമെന്ന് അധികൃതർ നിർദ്ദേശിച്ചു.
അപ്രതീക്ഷിത സാഹചര്യങ്ങൾ കാരണം വിമാനങ്ങളുടെ സമയക്രമത്തിൽ മാറ്റങ്ങളോ റദ്ദാക്കലുകളോ ഉണ്ടായേക്കാം. അതിനാൽ യാത്രയ്ക്ക് മുൻപായി എയർലൈനുമായി ബന്ധപ്പെട്ട് വിവരങ്ങൾ ഉറപ്പുവരുത്തണം.
യാത്രക്കാരുടെയും ജീവനക്കാരുടെയും സുരക്ഷയ്ക്കാണ് പ്രഥമ പരിഗണന നൽകുന്നതെന്ന് ഹമദ് വിമാനത്താവളം അധികൃതർ അറിയിച്ചു. കോഴിക്കോട് അടക്കമുള്ള പ്രധാന ഇന്ത്യൻ ഡെസ്റ്റിനേഷനുകളിലേക്ക് കൂടുതൽ യാത്രക്കാർ എത്തുന്ന സാഹചര്യം കണക്കിലെടുത്ത് വിമാനത്താവളത്തിലെ സേവനങ്ങളും സൗകര്യങ്ങളും കൂടുതൽ കാര്യക്ഷമമാക്കിയിട്ടുണ്ട്.
