ദോഹ: വേനൽക്കാല യാത്രാ തിരക്കുകൾ കണക്കിലെടുത്ത് യാത്രക്കാർക്കായി 5 സുപ്രധാന നിർദ്ദേശങ്ങൾ പുറപ്പെടുവിച്ച് ഹമദ് അന്താരാഷ്ട്ര വിമാനത്താവളം (HIA). വിമാനത്താവളത്തിലേക്ക് പുറപ്പെടുന്നതിന് മുൻപ് യാത്രക്കാർ ശ്രദ്ധിക്കേണ്ട കാര്യങ്ങളാണ് അധികൃതർ വ്യക്തമാക്കിയത്. ഇതോടൊപ്പം ദോഹയിലേക്ക് സർവീസ് നടത്തുന്ന വിവിധ വിമാനക്കമ്പനികളുടെ പുതുക്കിയ പട്ടികയും വിമാനത്താവളം വെബ്‌സൈറ്റിലൂടെ പുറത്തുവിട്ടിട്ടുണ്ട്.
യാത്രക്കാർ വിമാനത്താവളത്തിലേക്ക് തിരിക്കും മുൻപ് താഴെ പറയുന്ന അഞ്ച് കാര്യങ്ങൾ പരിശോധിക്കണമെന്ന് അധികൃതർ ഓർമ്മിപ്പിച്ചു.ഓൺലൈൻ ചെക്ക്-ഇൻ: ലഭ്യമാകുന്ന സർവീസുകളിൽ യാത്രാ നടപടികൾ മുൻകൂട്ടി ഓൺലൈൻ വഴി പൂർത്തിയാക്കുക.
കൃത്യസമയത്ത് എത്തുക: വിമാനം പുറപ്പെടുന്നതിന് കുറഞ്ഞത് 3 മണിക്കൂർ മുൻപെങ്കിലും വിമാനത്താവളത്തിൽ റിപ്പോർട്ട് ചെയ്യുക.
സെൽഫ് സർവീസ് ഉപകരണം: ലഗേജുകൾ രജിസ്റ്റർ ചെയ്യുന്നതിനായി വിമാനത്താവളത്തിലെ സെൽഫ് സർവീസ് ബാഗേജ് ഡ്രോപ്പ് ഉപകരണങ്ങൾ പ്രയോജനപ്പെടുത്തുക.
ലഗേജ് പരിധി: ബാഗേജുകളുടെ അളവും തൂക്കവും അതത് വിമാനക്കമ്പനികൾ അനുവദിച്ചിട്ടുള്ള മാനദണ്ഡങ്ങൾക്ക് അനുസരിച്ചാണെന്ന് ഉറപ്പുവരുത്തുക.
ഇ-ഗേറ്റുകളുടെ ഉപയോഗം: യോഗ്യതയുള്ള യാത്രക്കാർ നടപടികൾ വേഗത്തിലാക്കാൻ വിമാനത്താവളത്തിലെ ഇലക്ട്രോണിക് ഗേറ്റുകൾ (e-gates) ഉപയോഗിക്കുക.
കൺഫേം ചെയ്ത ടിക്കറ്റുകൾ ഉള്ള യാത്രക്കാർക്ക് മാത്രമേ പാസഞ്ചർ ടെർമിനലിലേക്ക് പ്രവേശനം അനുവദിക്കൂ എന്നും ഹമദ് വിമാനത്താവളം വ്യക്തമാക്കി
