ദോഹ: മേഖലയിലെ അസാധാരണ സാഹചര്യങ്ങളെത്തുടർന്ന് വ്യോമാതിർത്തി അടച്ച പശ്ചാത്തലത്തിൽ, കുടുങ്ങിക്കിടക്കുന്ന യാത്രക്കാരെ സഹായിക്കുന്നതിനായി ഖത്തർ എയർവേയ്‌സ് പരിമിതമായ സർവീസുകൾ ആരംഭിച്ചു. പ്രത്യേക അടിയന്തര വ്യോമപാതകൾ (Emergency Air Routes) വഴിയാണ് ഈ സർവീസുകൾ നടത്തുന്നത്. ഇത് സാധാരണ നിലയിലുള്ള സർവീസുകൾ പുനരാരംഭിക്കലല്ലെന്നും മറിച്ച് യാത്രക്കാരെ സുരക്ഷിതമായി ലക്ഷ്യസ്ഥാനങ്ങളിൽ എത്തിക്കാനുള്ള താൽക്കാലിക സംവിധാനം മാത്രമാണെന്നും അധികൃതർ വ്യക്തമാക്കി.
​താൽക്കാലിക എയർ കോറിഡോറിനെക്കുറിച്ചും വിമാന സർവീസുകളെക്കുറിച്ചും യാത്രക്കാർ ഉന്നയിക്കുന്ന 6 പ്രധാന സംശയങ്ങൾക്കുള്ള മറുപടി ഹമദ് അന്താരാഷ്ട്ര വിമാനത്താവളം പുറത്തുവിട്ടു.

എന്താണ് പരിമിതമായ ഫ്ലൈറ്റ് ഷെഡ്യൂൾ?

സാധാരണ നിലയിലുള്ള എല്ലാ വിമാനങ്ങളും ഇപ്പോൾ സർവീസ് നടത്തുന്നില്ല. നിലവിലെ സാഹചര്യത്തിൽ കുടുങ്ങിപ്പോയ യാത്രക്കാരെ അവരുടെ കുടുംബങ്ങളിലേക്ക് എത്തിക്കുന്നതിന് മുൻഗണന നൽകിക്കൊണ്ടുള്ള കുറഞ്ഞ എണ്ണം സർവീസുകൾ മാത്രമാണ് ഇപ്പോൾ നടക്കുന്നത്.
​എന്താണ് താൽക്കാലിക എയർ കോറിഡോർ?
വ്യോമാതിർത്തികൾ അടച്ചിരിക്കുന്ന സാഹചര്യത്തിൽ, വിമാനങ്ങൾക്ക് സുരക്ഷിതമായി കടന്നുപോകാൻ സിവിൽ ഏവിയേഷൻ അതോറിറ്റിയും ബന്ധപ്പെട്ട മറ്റ് അധികൃതരും ചേർന്ന് അനുവദിക്കുന്ന പ്രത്യേക സുരക്ഷാ പാതയാണിത്. അടിയന്തര ആവശ്യങ്ങൾക്കായി മാത്രമാണ് ഇത് ഉപയോഗിക്കുന്നത്.
ഖത്തർ സിവിൽ ഏവിയേഷൻ അതോറിറ്റി വ്യോമാതിർത്തി പൂർണ്ണമായി തുറന്നതായി പ്രഖ്യാപിച്ചാൽ മാത്രമേ സാധാരണ ഷെഡ്യൂളുകൾ പുനരാരംഭിക്കൂ,
കൈവശം സ്ഥിരീകരിച്ച (Confirmed) ടിക്കറ്റുകൾ ഉള്ളവർ മാത്രം വിമാനത്താവളത്തിലേക്ക് വരിക. അല്ലാത്തപക്ഷം ടിക്കറ്റില്ലാതെ വിമാനത്താവളത്തിൽ എത്തുന്നത് ഒഴിവാക്കണമെന്ന് ഖത്തർ എയർവേയ്‌സ് കർശന നിർദ്ദേശം നൽകി,
ഖത്തർ എയർവേയ്‌സിന്റെ ഔദ്യോഗിക വെബ്‌സൈറ്റും സോഷ്യൽ മീഡിയ അക്കൗണ്ടുകളും വഴി യാത്രാ വിവരങ്ങൾ കൃത്യമായ ഇടവേളകളിൽ പുതുക്കുന്നുണ്ട്,
യാത്രക്കാരുടെ സുരക്ഷയ്ക്ക് പരമപ്രധാനമായ പരിഗണന നൽകിക്കൊണ്ടാണ് ഈ പ്രത്യേക പാതകളിലൂടെ വിമാനങ്ങൾ പറക്കുന്നത്. ബന്ധപ്പെട്ട എല്ലാ അധികൃതരുടെയും അനുമതിയോടെ മാത്രമാണ് ഓരോ നീക്കവും.എന്നിവയാണ് നിർദ്ദേശങ്ങൾ.