ദോഹ: യാത്രക്കാർക്ക് കൂടുതൽ വേഗത്തിലും സുഗമമായും വിമാനത്താവള നടപടികൾ പൂർത്തിയാക്കാൻ സഹായിക്കുന്ന അത്യാധുനിക 'ഫാസ്റ്റ് പാസ്' (Fast Pass) ബയോമെട്രിക് യാത്രാ സൗകര്യം ഹമദ് അന്താരാഷ്ട്ര വിമാനത്താവളം (HIA) വൻതോതിൽ വിപുലീകരിക്കുന്നു. പേപ്പർരഹിത (Paperless) യാത്രാ അനുഭവം മെച്ചപ്പെടുത്തുന്നതിനും ഡിജിറ്റൽ നവീകരണങ്ങൾ നടപ്പിലാക്കുന്നതിനും വിമാനത്താവളം പ്രതിജ്ഞാബദ്ധമാണെന്ന് അധികൃതർ വ്യക്തമാക്കി.
അന്താരാഷ്ട്ര വ്യോമഗതാഗത സംഘടനയായ ഐ.എ.ടി.എ (IATA) പുറത്തുവിട്ട ആഗോള സർവേ പ്രകാരം, ഭൂരിഭാഗം യാത്രക്കാരും പേപ്പർ രേഖകൾക്ക് പകരം ബയോമെട്രിക് ഡാറ്റ വഴിയുള്ള തിരിച്ചറിയൽ സംവിധാനങ്ങളാണ് നിലവിൽ താൽപ്പര്യപ്പെടുന്നത്. ഈ ആഗോള പ്രവണതയ്ക്ക് അനുസൃതമായാണ് വിമാനത്താവളത്തിൽ ഉടനീളം കൂടുതൽ ടച്ച് പോയിന്റുകൾ ഉൾപ്പെടുത്തി 'ഫാസ്റ്റ് പാസ്' സേവനം വിപുലീകരിച്ചിരിക്കുന്നത്.ഈ പുതിയ ഡിജിറ്റൽ സംവിധാനം യാത്രക്കാർക്ക് പൂർണ്ണമായും ഐച്ഛികമാണ്. താൽപ്പര്യമില്ലാത്തവർക്ക് എയർപോർട്ട് ജീവനക്കാരുടെ സഹായത്തോടെ പാസ്‌പോർട്ടും പരമ്പരാഗത ബോർഡിംഗ് പാസുകളും ഉപയോഗിച്ച് തന്നെ യാത്രാ നടപടികൾ പൂർത്തിയാക്കാവുന്നതാണ്.വരും ദിവസങ്ങളിൽ കൂടുതൽ ടച്ച് പോയിന്റുകൾ ഈ സംവിധാനത്തിലേക്ക് കൂട്ടിച്ചേർക്കും. അതോടൊപ്പം ഹമദ് വിമാനത്താവളം വഴി സർവീസ് നടത്തുന്ന താല്പര്യമുള്ള മറ്റ് അന്താരാഷ്ട്ര എയർലൈനുകൾക്കും ഈ അത്യാധുനിക ബയോമെട്രിക് സേവനം ഉടൻ ലഭ്യമാക്കാൻ സാങ്കേതിക പങ്കാളികളുമായി ചേർന്ന് എയർപോർട്ട് അതോറിറ്റി പദ്ധതിയിടുന്നുണ്ട്.
