ദോഹ:ഗൾഫ്, അറബ് രാജ്യങ്ങളിൽ നിന്നുള്ള മാധ്യമ പ്രവർത്തകരുടെ പ്രതിനിധി സംഘത്തെ ഖത്തർ പ്രസ് സെന്റർ (QPC) ദോഹയിൽ സ്വീകരിച്ചു. “സ്പോർട്സ് ടൂറിസത്തിന്റെയും മാധ്യമങ്ങളുടെയും സാംസ്‌കാരിക വശങ്ങൾ” എന്ന വിഷയത്തിൽ സംഘടിപ്പിച്ച ഫോറത്തിൽ പങ്കെടുക്കാനായി അറബ് ഫെഡറേഷൻ ഫോർ സ്പോർട്സ് ടൂറിസത്തിന്റെ നേതൃത്വത്തിൽ എത്തിയ സംഘമാണ് പ്രസ് സെന്റർ സന്ദർശിച്ചത്.
സ്പോർട്സ്, ടൂറിസം മാധ്യമ മേഖലയിൽ പ്രത്യേക വൈദഗ്ധ്യമുള്ള മാധ്യമപ്രവർത്തകരാണ് സംഘത്തിലുണ്ടായിരുന്നത്. ഗൾഫ് രാജ്യങ്ങളിൽ നടക്കുന്ന വൻ കായിക-ടൂറിസം പരിപാടികളുമായി ബന്ധപ്പെട്ട മാധ്യമ കവറേജിൽ ഐക്യം ശക്തിപ്പെടുത്തുകയും, മേഖലയിലെ വേഗമേറിയ മാറ്റങ്ങൾക്കനുസരിച്ച് പ്രൊഫഷണൽ മാധ്യമ സമീപനം വികസിപ്പിക്കുകയും ചെയ്യുക എന്ന ലക്ഷ്യത്തോടെയാണ് സന്ദർശനം സംഘടിപ്പിച്ചത്.
ഖത്തർ പ്രസ് സെന്ററിലെ അബ്ദുള്ള ബിൻ ഹുസൈൻ അൽ-നഅമ ഹാളിൽ നടന്ന സംവാദ സെഷനിൽ, സ്പോർട്സ് ടൂറിസത്തെ പിന്തുണയ്ക്കുന്നതിൽ മാധ്യമങ്ങളുടെ പങ്ക്, ഗൾഫ് മേഖലയിലെ വിജയകരമായ അനുഭവങ്ങൾ, ഗൾഫ്–അറബ് മാധ്യമ സ്ഥാപനങ്ങൾ തമ്മിലുള്ള സഹകരണ സാധ്യതകൾ എന്നിവ വിശദമായി ചർച്ച ചെയ്തു.
വിശിഷ്ട മാധ്യമ ഉള്ളടക്കത്തിന്റെ ഗുണനിലവാരം ഉയർത്തുക, പൊതുജന ബോധവത്കരണം വർധിപ്പിക്കുക, ആഗോള വേദിയിൽ ഗൾഫ്–അറബ് രാജ്യങ്ങളുടെ പോസിറ്റീവ് ഇമേജ് ശക്തിപ്പെടുത്തുക എന്നീ വിഷയങ്ങൾക്കും പ്രത്യേക പ്രാധാന്യം നൽകി.
സെഷന്റെ തുടക്കത്തിൽ ഖത്തർ പ്രസ് സെന്റർ ഡയറക്ടർ ജനറൽ സാദിഖ് മുഹമ്മദ് അൽ അമാരി പ്രതിനിധി സംഘത്തെ സ്വാഗതം ചെയ്തു. ഗൾഫ് മാധ്യമ സ്ഥാപനങ്ങൾ തമ്മിലുള്ള സഹകരണത്തിന്റെ ആഴം ഈ സന്ദർശനം പ്രതിഫലിപ്പിക്കുന്നതാണെന്ന് അദ്ദേഹം പറഞ്ഞു. പ്രൊഫഷണൽ മൂല്യങ്ങൾ സംരക്ഷിക്കുന്നതിലും മാധ്യമ നൈതികത ഉയർത്തിപ്പിടിക്കുന്നതിലും ഖത്തർ പ്രസ് സെന്റർ പ്രതിബദ്ധമാണെന്നും അദ്ദേഹം വ്യക്തമാക്കി. അറബ് ജേർണലിസ്റ്റ്സ് യൂണിയന്റെയും ഗൾഫ് പ്രസ് ഫെഡറേഷന്റെയും സജീവ അംഗമായ സെന്റർ, ഇന്റർനാഷണൽ ഫെഡറേഷൻ ഓഫ് ജേർണലിസ്റ്റ്സിൽ അംഗത്വം നേടാനുള്ള നടപടികളും പുരോഗമിക്കുകയാണെന്നും അദ്ദേഹം കൂട്ടിച്ചേർത്തു.
അറബ് ഫെഡറേഷൻ ഫോർ സ്പോർട്സ് ടൂറിസത്തിന്റെ സെക്രട്ടറി ജനറൽ, വിവിധ മേഖലകളിൽ ഖത്തർ കൈവരിക്കുന്ന മുന്നേറ്റം പ്രത്യേകിച്ച് സ്പോർട്സ് ടൂറിസത്തിൽ ആഗോള തലത്തിൽ തന്നെ ശ്രദ്ധേയമാണെന്ന് പറഞ്ഞു. ആസൂത്രണത്തിലും നടപ്പിലാക്കലിലും മനുഷ്യവിഭവശേഷിയിലേക്കും അടിസ്ഥാന സൗകര്യങ്ങളിലേക്കുമുള്ള നിക്ഷേപങ്ങളിലും ഖത്തർ മാതൃകാപരമായ സമീപനം സ്വീകരിക്കുന്നുവെന്നും അദ്ദേഹം വിലയിരുത്തി.
ഗൾഫ് അസോസിയേഷൻ ഫോർ ടൂറിസം മീഡിയ ചെയർമാൻ ഖാലിദ് അൽ ദുഗൈം ഖത്തർ പ്രസ് സെന്റർ സന്ദർശിച്ചതിൽ സന്തോഷം പ്രകടിപ്പിച്ചു. വാർത്താ റിപ്പോർട്ടിംഗിന് അപ്പുറം, ബോധവത്കരണവും സാമൂഹിക സ്വാധീനവും സൃഷ്ടിക്കുന്ന ശക്തമായ മാധ്യമ അനുഭവമാണ് ഖത്തർ പ്രസ് സെന്റർ നൽകുന്നതെന്ന് അദ്ദേഹം പറഞ്ഞു.