​ന്യൂഡൽഹി: വിവാഹിതനായ ജീവനക്കാരന്റെ പൊതുപ്രവിഡന്റ് ഫണ്ട് (GPF) നോമിനേഷൻ വിവാഹത്തോടെ സ്വതഃ അസാധുവായി മാറുമെന്ന് സുപ്രീം കോടതി വ്യക്തമാക്കി. ഇതോടെ, നേരത്തെ മാതാപിതാക്കൾക്ക് അനുകൂലമായി നൽകിയിരുന്ന നോമിനേഷനാണെങ്കിൽ പോലും, ജീവനക്കാരന്റെ മരണശേഷം GPF-ൽ ഭാര്യക്കും മാതാവിനും തുല്യ അവകാശം ഉണ്ടാകുമെന്ന നിലപാട് കോടതി ശക്തിപ്പെടുത്തി.
​സർബതി ദേവി വേഴ്സസ് ഉഷാ ദേവി (1984) 1 SCC 424 എന്ന സുപ്രീം കോടതി വിധി ഉദ്ധരിച്ചുകൊണ്ടാണ് നിലവിലെ വിധി പ്രസ്താവിച്ചത്.

​പശ്ചാത്തലം

​ഡിഫൻസ് അക്കൗണ്ട്‌സ് ഡിപ്പാർട്ട്‌മെന്റിലെ ജീവനക്കാരൻ 2000-ൽ തന്റെ GPF, CGEGIS, DCRG എന്നിവയ്ക്ക് മാതാവിനെ (റിസ്‌പോണ്ടന്റ് 1) നോമിനേറ്റ് ചെയ്തിരുന്നു. 2003-ൽ അപേക്ഷകയായ സ്ത്രീയുമായി വിവാഹിതനായ ശേഷം, അദ്ദേഹം CGEGIS, DCRG എന്നിവയുടെ നോമിനേഷൻ ഭാര്യയുടെ പേരിൽ പുതുക്കിയെങ്കിലും GPF നോമിനേഷൻ പുതുക്കിയില്ല.

​2021-ൽ ജീവനക്കാരൻ മരിച്ചതിനെ തുടർന്ന്, മറ്റ് സേവനാനുകൂല്യങ്ങൾ ഭാര്യക്ക് ലഭിച്ചെങ്കിലും, പഴയ നോമിനേഷനിൽ മാതാവിന്റെ പേര് നിലനിൽക്കുന്നതിനാൽ GPF തുക നൽകാനാകില്ല എന്നായിരുന്നു സർക്കാരിന്റെ നിലപാട്.
​സെൻട്രൽ അഡ്മിനിസ്ട്രേറ്റീവ് ട്രൈബ്യുണൽ (CAT) GPF നോമിനേഷൻ വിവാഹത്തോടെ തന്നെ അസാധുവാകുമെന്ന് നിരീക്ഷിച്ച് ഭാര്യക്കും മാതാവിനും തുല്യമായി ഫണ്ട് വിഭജിക്കാൻ ഉത്തരവിട്ടു. എന്നാൽ ഹൈക്കോടതി ഈ ഉത്തരവ് മാറ്റി, ജീവനക്കാരൻ നോമിനേഷൻ റദ്ദ് ചെയ്തിട്ടില്ലെങ്കിൽ അത് പ്രാബല്യത്തിൽ തുടരുമെന്ന നിലപാട് സ്വീകരിച്ചു. ഇതോടെയാണ് അപേക്ഷകയായ ഭാര്യ സുപ്രീം കോടതിയെ സമീപിച്ചത്.

​സുപ്രീം കോടതിയുടെ വിധി

​കേസ് പരിശോധിച്ച സുപ്രീം കോടതി, CAT-ന്റെ നിലപാട് ശരിവെച്ച് ഹൈക്കോടതി വിധി റദ്ദാക്കി. വിവാഹത്തോടെ മാതാപിതാക്കൾക്ക് അനുകൂലമായി നൽകിയിരുന്ന GPF നോമിനേഷൻ അസാധുവാകുന്നുവെന്നും, അതുകൊണ്ട് തന്നെ ഭാര്യക്കും മാതാവിനും തുല്യ അവകാശം അനുവദിക്കേണ്ടതാണെന്നും കോടതി വ്യക്തമാക്കി.
​ഇതോടെ അപേക്ഷകയായ ഭാര്യയുടെ അപ്പീൽ സുപ്രീം കോടതി സ്വീകരിക്കുകയും GPF വിതരണത്തിൽ വ്യക്തത വരുത്തുകയും ചെയ്തു.

​Cause Title: Smt. Bolla Malathi vs B. Suguna & Ors.
​Citation: 2025 (SC)