ദളിത് ഇന്ത്യൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി (ഡി.ഐ.സി.സി.ഐ) സംഘടിപ്പിച്ച അംബേദ്കർ ജന്മവാർഷികം ഗവർണർ രാജേന്ദ്ര വിശ്വനാഥ് ആർലേക്കർ ഉദ്ഘാടനം ചെയ്യുന്നു
കൊച്ചി: ഡോ.ബി.ആർ. അംബേദ്കർ ലക്ഷക്കണക്കിന് പാവപ്പെട്ടവരെ സമൂഹത്തിന്റെ മുഖ്യധാരയിലേക്ക് കൊണ്ടുവന്ന ദീർഘദർശിയാണെന്ന് ഗവർണർ രാജേന്ദ്ര വിശ്വനാഥ് ആർലേക്കർ. അദ്ദേഹം ഭാരത് രത്ന ആണെങ്കിലും, തൊഴിൽ നിയമങ്ങൾ, സാമ്പത്തിക ശാസ്ത്രം, സാമൂഹിക പരിഷ്കാരം തുടങ്ങിയ നിരവധി മേഖലകളിൽ മാറ്റം കൊണ്ടുവന്ന് ലോകത്തിന് മാതൃകകൾ സമ്മാനിച്ച വ്യക്തിയായതിനാൽ അദ്ദേഹത്തെ വിശ്വരത്ന എന്ന് വിളിക്കുന്നതാണ് കൂടുതൽ ഉചിതമെന്നും ഗവർണർ പറഞ്ഞു. കൊച്ചിയിൽ ദളിത് ഇന്ത്യൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി (ഡി.ഐ.സി.സി.ഐ) സംഘടിപ്പിച്ച അംബേദ്കർ ജന്മവാർഷികം ഉദ്ഘാടനം ചെയ്യുകയായിരുന്നു ഗവർണർ. സംഘടനയുടെ 20ാം സ്ഥാപന ദിനവും അദ്ദേഹം ഉദ്ഘാടനം ചെയ്തു.
അംബേദ്കറിന്റെ ചിത്രത്തിൽ ഗവർണർ പുഷ്പാർച്ചന നടത്തി.
ഡി.ഐ.സി.സി.ഐ സ്ഥാപകനും ചെയർമാനുമായ ഡോ. മിലിന്ദ് കാംബ്ലെ അധ്യക്ഷത വഹിച്ചു. കെ.എൻ. ഉണ്ണികൃഷ്ണൻ എം.എൽ.എ, ഡി.ഐ.സി.സി.ഐ ദേശീയ പ്രസിഡന്റ് രവികുമാർ നാര,ദക്ഷിണേന്ത്യ വൈസ് പ്രസിഡന്റ് പി.കെ. സുധീർ എന്നിവർ സംസാരിച്ചു.
വിവിധ വ്യവസായ മേഖലകളിൽ മികച്ച പ്രകടനം കാഴ്ചവെച്ച ദളിത് സംരംഭകരെ ഗവർണർ ആദരിച്ചു. പാനൽ ചർച്ചയിൽ തൃശൂർ പോലീസ് അക്കാദമി ഐ.ജി. കെ. സേതുരാമൻ, രജിമോൻ കുട്ടപ്പൻ, ദിനു വെയിൽ, എൻ.വി. സുരേഷ് ബാബു തുടങ്ങിയവർ പങ്കെടുത്തു.
