ന്യൂഡൽഹി: കേന്ദ്ര സർക്കാർ സുപ്രീം കോടതിയെ വരുതിയിലാക്കാൻ ശ്രമിക്കുന്നുവെന്നും എന്നാൽ ആ ശ്രമം വിജയിക്കില്ലെന്ന് തനിക്ക് പൂർണ വിശ്വാസമുണ്ടെന്നും മുതിർന്ന അഭിഭാഷകൻ കപിൽ സിബൽ. മാധ്യമങ്ങൾ ഉൾപ്പെടെ വിവിധ സ്ഥാപനങ്ങളെ സർക്കാർ നിയന്ത്രണത്തിലാക്കിയെന്നാണ് അദ്ദേഹത്തിന്റെ ആരോപണം. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനും വോട്ടർപട്ടികയുടെ പ്രത്യേക തീവ്ര പരിഷ്‌കരണത്തിനും (എസ്.ഐ.ആർ.) എതിരായ പ്രതിഷേധങ്ങളോടുള്ള സർക്കാർ പ്രതികരണം സംബന്ധിച്ച വാർത്താസമ്മേളനത്തിലാണ് സിബലിന്റെ പരാമർശം.
2014 മുതൽ സ്ഥാപനങ്ങളെ നിയന്ത്രണത്തിലാക്കുന്ന നയമാണ് സർക്കാർ പിന്തുടരുന്നതെന്ന് സിബൽ ആരോപിച്ചു. താഴേത്തട്ടിലെ വാർത്തകൾ ജനങ്ങളിലെത്തുന്നത് തടയാൻ ആദ്യം മാധ്യമങ്ങളെയും പിന്നീട് മറ്റു സ്ഥാപനങ്ങളെയും വരുതിയിലാക്കാൻ ശ്രമിച്ചു. സർവകലാശാലകളും ഗവർണർമാരുടെ സംവിധാനവും ഉൾപ്പെടെയുള്ള മേഖലകളിലേക്കും ഈ ഇടപെടൽ വ്യാപിച്ചുവെന്നും അദ്ദേഹം പറഞ്ഞു.
മുഖ്യധാരാ മാധ്യമങ്ങളുടെ പ്രവർത്തനത്തെ ഈ സാഹചര്യം ബാധിച്ചതോടെ ജനങ്ങൾക്ക് വിവരങ്ങൾ ലഭിക്കുന്നതിനുള്ള ബദൽ മാർഗമായി സമൂഹമാധ്യമങ്ങൾ മാറിയെന്നും സിബൽ അഭിപ്രായപ്പെട്ടു. സ്ഥാപനങ്ങളെ സ്വാധീനിക്കുന്നതിനൊപ്പം ജനങ്ങളുടെ വോട്ടവകാശത്തെ ദുർബലപ്പെടുത്താനുള്ള ശ്രമങ്ങളും നടക്കുന്നതായി അദ്ദേഹം ആരോപിച്ചു.
ഡൽഹിയിൽ പ്രതിഷേധക്കാരെ അറസ്റ്റ് ചെയ്തതും പ്രകടനങ്ങൾക്ക് നിയന്ത്രണം ഏർപ്പെടുത്തിയതും പരാമർശിച്ച സിബൽ, സമാധാനപരമായി പ്രതിഷേധിക്കാനുള്ള അവകാശം ഭരണഘടന ഉറപ്പുനൽകുന്നതാണെന്ന് ചൂണ്ടിക്കാട്ടി. പൊതുക്രമം സംരക്ഷിക്കുന്നതുൾപ്പെടെ ഭരണഘടന അനുവദിക്കുന്ന കാരണങ്ങളുടെ അടിസ്ഥാനത്തിൽ മാത്രമേ ഈ അവകാശത്തിന് നിയന്ത്രണം ഏർപ്പെടുത്താനാകൂവെന്നും അദ്ദേഹം പറഞ്ഞു.
ഭാരതീയ നാഗരിക് സുരക്ഷാ സംഹിതയിലെ (ബി.എൻ.എസ്.എസ്.) 163-ാം വകുപ്പ് പ്രകാരം നിരോധന ഉത്തരവുകൾ പുറപ്പെടുവിച്ചതിനെയും അദ്ദേഹം ചോദ്യം ചെയ്തു. ഇത്തരം നിയന്ത്രണങ്ങൾ അനിവാര്യമായത് എന്തുകൊണ്ടാണെന്ന് അധികൃതർ വ്യക്തമാക്കണമെന്ന് സിബൽ ആവശ്യപ്പെട്ടു. ഉത്തരവുകളുടെ നിയമസാധുത ചോദ്യം ചെയ്യുന്ന ഹർജികളിൽ വിഷയം സുപ്രീം കോടതിയുടെ ശ്രദ്ധയിൽപ്പെടുത്തുമെന്നും അദ്ദേഹം അറിയിച്ചു.
ജനങ്ങളുടെ പ്രതിഷേധിക്കാനുള്ള അവകാശം സംരക്ഷിക്കപ്പെടുമെന്ന് ഉറപ്പാക്കാൻ സുപ്രീം കോടതി ഇടപെടുമെന്ന വിശ്വാസവും സിബൽ പ്രകടിപ്പിച്ചു.