കൊച്ചി: അടിച്ചമര്‍ത്തലുകള്‍ക്കും, അവകാശ നിഷേധങ്ങള്‍ക്കുമെതിരെ പോരാടിയ മഹാത്മാ അയ്യങ്കാളി മുന്നോട്ടുവച്ച ആശയങ്ങളെ തച്ചുടക്കാനാണ് ഭരണകൂടങ്ങള്‍ ശ്രമിക്കുന്നതെന്ന് ജില്ലാ കോണ്‍ഗ്രസ് അധ്യക്ഷന്‍ മുഹമ്മദ് ഷിയാസ്. ദളിത് വിദ്യാര്‍ത്ഥികളുടെ വിദ്യാഭ്യാസ ഗവേഷണ ആനുകൂല്യങ്ങള്‍ അമ്പത് ശതമാനത്തോളമാണ് സംസ്ഥാന സര്‍ക്കാര്‍ വെട്ടിക്കുറച്ചതെന്ന് അദ്ദേഹം പറഞ്ഞു.
സര്‍ക്കാര്‍ വകുപ്പുകളിലും ഭരണ രംഗത്തും പാലിക്കേണ്ട സംവരണ ചട്ടങ്ങളെപ്പോലും അട്ടിമറിക്കുകയാണ്. അയ്യങ്കാളിയെ അംഗീകരിക്കുമ്പോഴും, അദ്ദേഹം അധസ്ഥിത വിഭാഗങ്ങള്‍ക്കായി വിഭാവനം ചെയ്ത പരിഷ്‌കാരങ്ങളെ അവഗണിക്കുകയാണ് ഭരണകൂടങ്ങളെന്നും ഷിയാസ് കുറ്റപ്പെടുത്തി. അയ്യന്‍കാളി നയിച്ച സമര പോരാട്ടങ്ങളുടെ പിന്‍തുടര്‍ച്ചക്കാരായി ദളിത് കോണ്‍ഗ്രസ് മാറണമെന്ന് അദ്ദേഹം പറഞ്ഞു. ദളിത് കോണ്‍ഗ്രസ് ജില്ലാ കമ്മിറ്റി സംഘടിപ്പിച്ച മഹാത്മ അയ്യന്‍കാളിയുടെ 84-ാമത് അനുസ്മരണദിനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ജില്ലാ പ്രസിഡന്റ് എന്‍ കെ അനില്‍കുമാര്‍ അദ്ധ്യക്ഷത വഹിച്ചു. ഭാരവാഹികളായ വി. കെ തങ്കരാജ്, ടി. എ.സുബ്രമണ്യന്‍, എ സി ചന്ദ്രന്‍, പി കെ സുരേഷ് ബാബു, പി എ ഹരിദാസ്, കെ വി ബാബു, തോമസ് ജോണ്‍, കെ വി ആന്റണി, ഇ എ സുനിത, ഒ എസ് സാബു, ബിജു നികത്തില്‍, സി കെ ചന്ദ്രന്‍ എന്നിവര്‍ സംസാരിച്ചു.
