തിരുവനന്തപുരം: സർക്കാർ ആശുപത്രികളിലെ പൊതിച്ചോർ വിതരണവുമായി ബന്ധപ്പെട്ട് ഉയർന്ന വിവാദം യു.ഡി.എഫ് സർക്കാരിന് വൻ രാഷ്ട്രീയ തലവേദനയാകുന്നു. മെഡിക്കൽ കോളേജുകൾ ഉൾപ്പെടെയുള്ള ആശുപത്രികളിൽ രോഗികൾക്കും കൂട്ടിരിപ്പുകാർക്കും ആശ്വാസമാകുന്ന സൗജന്യ ഭക്ഷണവിതരണം പാർട്ടി ലേബലിൽ വേണ്ടെന്ന ആരോഗ്യ മന്ത്രി കെ. മുരളീധരന്റെ നിലപാടാണ് പ്രതിപക്ഷ പാർട്ടികൾ സർക്കാരിനെതിരെ രാഷ്ട്രീയ ആയുധമാക്കുന്നത്.
​ആറൻമുളയിൽ മാധ്യമങ്ങളോട് സംസാരിക്കവെ ഡി.വൈ.എഫ്.ഐ ആയാലും സേവാഭാരതി ആയാലും ആശുപത്രി വളപ്പിന് പുറത്തുമതി പൊതിച്ചോർ വിതരണം എന്ന് മന്ത്രി ആവർത്തിച്ചിരുന്നു. എന്നാൽ വിഷയം ജനവികാരത്തിന് എതിരാകുമെന്ന് ബോധ്യപ്പെട്ടതോടെ വൈകുന്നേരത്തോടെ മന്ത്രി നിലപാട് മയപ്പെടുത്തി പുതിയ പ്രസ്താവനയിറക്കി.
​ആലപ്പുഴ മെഡിക്കൽ കോളേജിൽ ദിവസവും രണ്ടായിരത്തിലധികം പൊതിച്ചോറുകൾ വിതരണം ചെയ്യുന്ന ഡി.വൈ.എഫ്.ഐ 10 വർഷമായും, സേവാഭാരതി 19 വർഷമായും ഈ സേവനം തുടരുന്നുണ്ട്. മറ്റ് നിരവധി സന്നദ്ധ സംഘടനകളും ഈ രംഗത്തുണ്ട്.
​വിവാദത്തിന് തുടക്കമിട്ടത് ജി. സുധാകരൻ
ഒരാഴ്ച മുൻപ് ആലപ്പുഴയിൽ ജി. സുധാകരൻ എം.എൽ.എ നടത്തിയ വിമർശനമാണ് മന്ത്രി ഏറ്റുപിടിച്ചത്. ആശുപത്രി വളപ്പിൽ കൊടിയും കെട്ടി രാഷ്ട്രീയ പാർട്ടികൾ ഷെഡ്ഡ് ഇട്ട് അന്നദാനം നടത്തിയാൽ പിന്നെ സർക്കാരിന് എന്താണ് ജോലിയെന്ന സുധാകരന്റെ ചോദ്യം സേവാഭാരതിയെ ലക്ഷ്യം വച്ചുള്ളതായിരുന്നെങ്കിലും, അത് ഒടുവിൽ തിരിച്ചടിയായത് സി.പി.എമ്മിനും ഡി.വൈ.എഫ്.ഐക്കുമാണ്. തുടർന്ന് ശനിയാഴ്ച വണ്ടാനം മെഡിക്കൽ കോളേജ് സന്ദർശിച്ച മന്ത്രി മുരളീധരൻ, ബാനറും കൊടിയും വച്ചുള്ള ഭക്ഷണവിതരണം വിലക്കുകയായിരുന്നു.
​നേതാക്കളുടെ പ്രതികരണങ്ങൾ:
​ആര് തടഞ്ഞാലും പൊതിച്ചോർ വിതരണം തുടരും:
"മന്ത്രി പൊതിച്ചോറിൽ മണ്ണ് വാരിയിടുകയാണ്. ഇതിൽ രാഷ്ട്രീയം കാണേണ്ടതില്ല, ആര് തടഞ്ഞാലും ഭക്ഷണവിതരണം തുടരും."
— വി.കെ. സനോജ് (ഡി.വൈ.എഫ്.ഐ സംസ്ഥാന സെക്രട്ടറി)
​മന്ത്രി സാമന്തരാജാവിനെപ്പോലെ പെരുമാറരുത്:
"പൊതിച്ചോർ വിതരണത്തിനെതിരെ ആരും പരാതിപ്പെട്ടിട്ടില്ല. മന്ത്രി സാമന്തരാജാവിനെപ്പോലെ പെരുമാറരുത്."
— പി.എ. മുഹമ്മദ് റിയാസ് എം.എൽ.എ
​പൊതിച്ചോറിൽ രാഷ്ട്രീയം കലർത്തരുത്:
"പൊതിച്ചോർ കഴിച്ചവരെല്ലാം അത് കൊടുത്തവർക്ക് വോട്ട് ചെയ്തിരുന്നെങ്കിൽ കെ. മുരളീധരൻ ഉൾപ്പെടെയുള്ളവർ നിയമസഭ കാണുമായിരുന്നില്ല. ഇതിൽ രാഷ്ട്രീയം കലർത്തരുത്."
— കെ. സുരേന്ദ്രൻ (ബി.ജെ.പി മുൻ സംസ്ഥാന പ്രസിഡന്റ്)
​ഭക്ഷണ വിതരണത്തിന് എതിരല്ലെന്ന് മന്ത്രി
​ആശുപത്രികളിൽ ആഹാരം നൽകുന്നതിന് സർക്കാർ എതിരല്ലെന്ന് മന്ത്രി കെ. മുരളീധരൻ വ്യക്തമാക്കി. ആലപ്പുഴ മെഡിക്കൽ കോളേജിലെ പ്രത്യേക സാഹചര്യം പൊതുവായി വ്യാഖ്യാനിക്കേണ്ടതില്ലെന്നും, ഭക്ഷണം നൽകുന്നതിന്റെ പേരിൽ സ്ഥലം കൈയേറുന്നത് അംഗീകരിക്കാനാകില്ലെന്നും അദ്ദേഹം പറഞ്ഞു.
​മുഴുവൻ രോഗികൾക്കും കൂട്ടിരിപ്പുകാർക്കും ഭക്ഷണം ഉറപ്പാക്കാൻ ആലപ്പുഴയിൽ 'കമ്മ്യൂണിറ്റി കിച്ചൺ' ആരംഭിക്കുകയാണെന്നും, ഭക്ഷണത്തിന് ജാതിയോ മതമോ രാഷ്ട്രീയമോ ഇല്ലെന്നും മന്ത്രി കൂട്ടിച്ചേർത്തു.