തിരുവനന്തപുരം. സ്വർണ്ണവില റോക്കറ്റ് പോലെ കുതിച്ചുയരുമ്പോൾ, സാധാരണക്കാർക്കിടയിലും പുതുതലമുറക്കാർക്കിടയിലും മാറ്റ് കുറഞ്ഞ സ്വർണാഭരണങ്ങൾക്ക് (low-carat gold jewellery) പ്രിയമേറുന്നു. ലക്ഷത്തോട് അടുക്കുന്ന സ്വർണ്ണവിലയിൽ സാധാരണക്കാരുടെ മോഹങ്ങളെ പൊന്നണിയിക്കാൻ 9, 14, 18 കാരറ്റ് ആഭരണങ്ങളാണ് വിപണി കീഴടക്കുന്നത്.

​മാറ്റ് കുറഞ്ഞാൽ മെച്ചമെന്ത്?

​താരതമ്യേന ദുർബലമായ 24 കാരറ്റ് (99.9%) സ്വർണ്ണത്തിൽ ചെമ്പ്, വെള്ളി, സിങ്ക് തുടങ്ങിയ ലോഹങ്ങൾ (അലോയ്) ചേർത്താണ് ആഭരണങ്ങൾ നിർമ്മിക്കുന്നത്. കാരറ്റ് കുറയുന്തോറും സ്വർണ്ണത്തിന് കടുപ്പവും ബലവും കൂടുന്നു. ഇത് വളരെ കുറഞ്ഞ കനത്തിൽ പോലും ഫാഷനബിളായ ആഭരണങ്ങൾ നിർമ്മിക്കാൻ സഹായിക്കുന്നു.
​പരമ്പരാഗതമായി നിക്ഷേപ ആവശ്യങ്ങൾക്കും ആഭരണങ്ങൾക്കുമായി 22 കാരറ്റ് സ്വർണമാണ് ഉപയോഗിക്കാറ്. എന്നാൽ, വജ്രാഭരണങ്ങൾക്കും കല്ലുപതിച്ച ആഭരണങ്ങൾക്കും 18 കാരറ്റ് ഉപയോഗിക്കുമ്പോൾ, കൂടുതൽ ഫാഷനും ലൈറ്റ് വെയ്റ്റുമുള്ള ആഭരണങ്ങൾക്കായി 14, 9 കാരറ്റ് സ്വർണ്ണമാണ് ഇപ്പോൾ ഒരുങ്ങുന്നത്.

​കേരളം സ്വർണ്ണ ഉപഭോഗത്തിൽ മുന്നിൽ

​രാജ്യത്ത് ഇറക്കുമതി ചെയ്യുന്ന സ്വർണത്തിന്റെ 20 ശതമാനവും ഉപയോഗിക്കുന്നത് മലയാളികളാണ്. 15,000-ത്തോളം ജ്വല്ലറികളും ഗോൾഡ് ബൈയിംഗ് ഏജൻസികളുമാണ് കേരളത്തിലുള്ളത്. സ്വർണ്ണവില വർദ്ധിക്കുന്ന സാഹചര്യത്തിൽ, ജ്വല്ലറികളും നിർമ്മാതാക്കളും ഇപ്പോൾ കാരറ്റ് കുറഞ്ഞ ആഭരണ വിപണിയിലേക്ക് കൂടുതൽ ശ്രദ്ധ കേന്ദ്രീകരിക്കുന്നുണ്ട്. 22 കാരറ്റ് സ്വർണ്ണം മാത്രം പണയവസ്തുവായി എടുക്കുന്ന രീതിയിൽ മാറ്റം വന്നാൽ, കാരറ്റ് കുറഞ്ഞ സ്വർണ്ണവും നിക്ഷേപമായി മാറാൻ സാധ്യതയുണ്ട്.

​ആകർഷകമായ ഡിസൈനുകൾ

​സ്ത്രീകൾ നിത്യേന ഉപയോഗിക്കുന്ന ചെറിയ കമ്മലുകൾ, നേർത്ത വളകൾ, ലൈറ്റ് വെയ്റ്റ് ചെയിനുകൾ, പുരുഷന്മാർക്കായുള്ള കൈചെയിനുകൾ, മോതിരങ്ങൾ എന്നിവയെല്ലാം കുറഞ്ഞ കാരറ്റ് സ്വർണ്ണത്തിൽ ഒരുങ്ങുന്നുണ്ട്. കൂടാതെ, നവരത്‌നങ്ങൾ, വജ്രം, മറ്റ് അലങ്കാര കല്ലുകൾ എന്നിവ ഉറപ്പിച്ചുള്ള ആഭരണങ്ങൾക്കും ഇവ ഉപയോഗിക്കുന്നു. പുതുതലമുറ ഇത്തരം ഫാഷനബിൾ ആഭരണങ്ങളിൽ കൂടുതൽ ആകൃഷ്ടരാകുന്നുവെന്നതും ശ്രദ്ധേയമാണ്.