തിരുവനന്തപുരം:​കേരളത്തിന്റെ സമഗ്രമായ മാറ്റത്തിനായി വരാനിരിക്കുന്ന അഞ്ച് വർഷം ബി.ജെ.പിക്ക് നൽകണമെന്ന് പ്രധാനമന്ത്രി നരേന്ദ്ര മോദി അഭ്യർത്ഥിച്ചു. സംസ്ഥാനത്തെ ബി.ജെ.പി പ്രവർത്തകരുമായി 'മേരാ ബൂത്ത് സബ്‌സെ മസ്ബൂത്' എന്ന ഓഡിയോ ബ്രിഡ്ജ് പരിപാടിയിലൂടെ സംസാരിക്കുകയായിരുന്നു അദ്ദേഹം. കഴിഞ്ഞ ഏഴ് പതിറ്റാണ്ടിലേറെയായി കോൺഗ്രസിനും കമ്മ്യൂണിസ്റ്റിനും മാറിമാറി ഭരിക്കാൻ അവസരം നൽകിയ കേരളം, വികസനത്തിന്റെ പുതിയ പാതയിലേക്ക് മാറാൻ ബി.ജെ.പിയെ പിന്തുണയ്ക്കണമെന്നും വലിയ മാറ്റങ്ങൾ താൻ കാണിച്ചുതരാമെന്നും അദ്ദേഹം ഉറപ്പുനൽകി.
​ശബരിമലയിലെ അയ്യപ്പഭക്തരോട് ഇടതുമുന്നണി സർക്കാർ കാണിച്ച ക്രൂരതയും വിശ്വാസവഞ്ചനയും കേരളം ഒരിക്കലും മറക്കരുതെന്ന് പ്രധാനമന്ത്രി ഓർമ്മിപ്പിച്ചു. സംസ്ഥാനത്ത് കേന്ദ്ര പദ്ധതികൾ കൃത്യമായി നടപ്പിലാക്കാൻ കഴിയുന്ന ഒരു 'ഡബിൾ എൻജിൻ സർക്കാർ' അധികാരത്തിൽ വരേണ്ടത് അത്യന്താപേക്ഷിതമാണെന്നും കേരളത്തിൽ ഇപ്പോൾ മാറ്റത്തിന്റെ കാറ്റ് വീശിത്തുടങ്ങിയിട്ടുണ്ടെന്നും അദ്ദേഹം പറഞ്ഞു. നിലവിൽ കേന്ദ്രം വിഭാവനം ചെയ്യുന്ന പല വികസന പദ്ധതികളും സംസ്ഥാന സർക്കാർ തടസ്സപ്പെടുത്തുകയാണെന്നും സൗജന്യ റേഷൻ, വീട് നിർമ്മാണം, കുടിവെള്ളം തുടങ്ങിയ ജനക്ഷേമ പദ്ധതികളുടെ ഗുണം ജനങ്ങൾക്ക് ലഭിക്കുന്നത് ഉറപ്പാക്കണമെന്നും അദ്ദേഹം കൂട്ടിച്ചേർത്തു.
​കേരളത്തിലെ യുവാക്കൾ തൊഴിൽ തേടി നാടുവിട്ടു പോകേണ്ടി വരുന്ന അവസ്ഥയ്ക്ക് അറുതി വരുത്തുമെന്നും പ്രധാനമന്ത്രി വാഗ്ദാനം ചെയ്തു. ടൂറിസം, ഐടി, സ്റ്റാർട്ടപ്പ് മേഖലകളിൽ വിപ്ലവകരമായ മാറ്റങ്ങൾ കൊണ്ടുവരുന്നതിലൂടെ പുതിയ തൊഴിലവസരങ്ങൾ സൃഷ്ടിക്കാനാണ് ബി.ജെ.പി ലക്ഷ്യമിടുന്നത്. വികസിത കേരളം എന്ന എൻ.ഡി.എയുടെ ലക്ഷ്യം യാഥാർത്ഥ്യമാക്കാൻ വെറുമൊരു ഭരണമാറ്റമല്ല, മറിച്ച് പുതിയൊരു രാഷ്ട്രീയ വ്യവസ്ഥിതിയാണ് ഉണ്ടാകേണ്ടതെന്ന് അദ്ദേഹം ഊന്നിപ്പറഞ്ഞു.
​തിരഞ്ഞെടുപ്പ് പ്രവർത്തനങ്ങളിൽ ബൂത്ത് തലത്തിലുള്ള ശക്തി വർദ്ധിപ്പിക്കാൻ ഓരോ പ്രവർത്തകനും പരിശ്രമിക്കണമെന്ന് മോദി നിർദ്ദേശിച്ചു. ഏപ്രിൽ 9-ന് മുൻപായി ഓരോ ബൂത്തിലെയും കുടുംബങ്ങളെ കുറഞ്ഞത് മൂന്ന് തവണയെങ്കിലും സന്ദർശിക്കണമെന്നും കേന്ദ്ര സർക്കാരിന്റെ വികസന നേട്ടങ്ങൾ വോട്ടർമാരിലേക്ക് നേരിട്ട് എത്തിക്കണമെന്നും അദ്ദേഹം പറഞ്ഞു. കേരളത്തിലെ 140 എൻ.ഡി.എ സ്ഥാനാർത്ഥികളും ഏകദേശം നാല് ലക്ഷത്തോളം പ്രവർത്തകരും പങ്കെടുത്ത ഈ സംവാദത്തിൽ, വോട്ടർമാരെ നേരിൽ കണ്ട് കാര്യങ്ങൾ ബോധ്യപ്പെടുത്തുന്നതിനാണ് പ്രധാനമന്ത്രി മുൻഗണന നൽകിയത്. യുവാക്കളും വനിതകളും കർഷകരും അടങ്ങുന്ന വലിയൊരു വിഭാഗം ഈ പരിപാടിയിൽ പങ്കാളികളായതായും കേരളത്തിൽ എൻ.ഡി.എക്ക് അനുകൂലമായ വലിയ തരംഗം ദൃശ്യമാണെന്നും അദ്ദേഹം ശുഭാപ്തിവിശ്വാസം പ്രകടിപ്പിച്ചു.