ദോഹ: അന്താരാഷ്ട്ര വിഷയങ്ങളിലെ പഠനവും ഗവേഷണവും വിപുലീകരിക്കുന്നതിന്റെ ഭാഗമായി ജോർജ്ജ് ടൗൺ യൂണിവേഴ്സിറ്റി ഖത്തർ പുതിയ കോഴ്സുകളും അധ്യാപക നിയമനങ്ങളും പ്രഖ്യാപിച്ചു. പുതിയ അക്കാദമിക് വർഷത്തിൽ 'സയൻസ്, ടെക്നോളജി ആൻഡ് ഇന്റർനാഷണൽ അഫയേഴ്സ്' (STIA) പ്രധാന വിഷയമായി അവതരിപ്പിക്കുന്നതിനൊപ്പം ആർട്സ് ആൻഡ് ഹെറിറ്റേജ് ആൻഡ് കൾച്ചറൽ ഡിപ്ലോമസി, വിമൻസ് ആൻഡ് ജെൻഡർ സ്റ്റഡീസ് എന്നീ രണ്ട് അനുബന്ധ (Minor) കോഴ്സുകളും സർവ്വകലാശാല ആരംഭിക്കും.
സാങ്കേതികവിദ്യ, പൊതുനയം, സമൂഹം എന്നിവ സമഗ്രമായി കൂട്ടിയിണക്കുന്നതാണ് 'സയൻസ്, ടെക്നോളജി ആൻഡ് ഇന്റർനാഷണൽ അഫയേഴ്സ്' പാഠ്യപദ്ധതി. ആർട്ടിഫിഷ്യൽ ഇന്റലിജൻസ്, ബ്ലോക്ക്ചെയിൻ സാങ്കേതികവിദ്യ, ഡാറ്റാ അനലിറ്റിക്സ് എന്നിവയിൽ വൈദഗ്ധ്യമുള്ള അസോസിയേറ്റ് പ്രൊഫസർ മാസിൻ അൽ-മസ്രി ഉൾപ്പെടെ മൂന്ന് പ്രമുഖ അക്കാദമീഷ്യൻമാരാണ് പുതിയ പാഠ്യപദ്ധതിക്ക് നേതൃത്വം നൽകാൻ സർവ്വകലാശാലയിൽ ചേർന്നത്.
മേഖലയിൽ ദ്രുതഗതിയിൽ സംഭവിക്കുന്ന സാങ്കേതിക മാറ്റങ്ങളുടെ പശ്ചാത്തലത്തിൽ ഈ പുതിയ കോഴ്സിന് വൻ പ്രാധാന്യമുണ്ടെന്ന് പ്രൊഫസർ മാസിൻ അൽ-മസ്രി വ്യക്തമാക്കി. പാരിസ്ഥിതിക ശാസ്ത്രം, കമ്പ്യൂട്ടർ സയൻസ്, ഇക്കണോമിക്സ്, കുടിയേറ്റ പഠനങ്ങൾ, അറബിക് ഭാഷയും സംസ്കാരവും തുടങ്ങിയ മേഖലകളിലെ പ്രഗത്ഭരെ ഉൾപ്പെടുത്തി ഫാക്കൽറ്റി വിപുലീകരിക്കാനും സർവ്വകലാശാല തീരുമാനിച്ചിട്ടുണ്ട്.
