ഫാഷനും സൗന്ദര്യപരിപാലനവും സംബന്ധിച്ച പഴയകാല ട്രെൻഡുകൾ പുതുരൂപത്തിൽ തിരിച്ചെത്തുന്ന കാലമാണിത്. വസ്ത്രധാരണത്തിലും ഹെയർസ്റ്റൈലുകളിലും പഴയ ശൈലികൾ വീണ്ടും ജനപ്രീതി നേടുന്നതിനിടെ, സോഷ്യൽ മീഡിയയിൽ ജെൻസികൾക്കിടയിൽ ശ്രദ്ധനേടുന്നത് മറ്റൊരു വ്യത്യസ്ത ട്രെൻഡാണ് – ജെറ്റ് ബ്ലാക്ക് പല്ലുകൾ.

സെലിബ്രിറ്റിയായ നോർത്ത് വെസ്റ്റ് കറുത്ത പല്ലുകളും താൽക്കാലിക മുഖ ടാറ്റൂകളും ഉൾപ്പെടുത്തി പങ്കുവെച്ച വീഡിയോ വൈറലായതോടെയാണ് ഈ ട്രെൻഡ് കൂടുതൽ ചർച്ചയായത്. പിന്നാലെ നിരവധി യുവാക്കളും ഈ ശൈലി അനുകരിച്ച് വീഡിയോകളും ചിത്രങ്ങളും പങ്കുവെക്കാൻ തുടങ്ങി.

എന്നാൽ, ഇന്ന് പുതുമയായി തോന്നുന്ന ഈ ട്രെൻഡിന് നൂറ്റാണ്ടുകൾ പഴക്കമുണ്ട്. ജപ്പാനിൽ “ഒഹാഗുറോ” എന്നറിയപ്പെട്ടിരുന്ന ഈ രീതിയിൽ ഇരുമ്പ്, വിനാഗിരി, സേക്ക്, വിവിധ പ്രകൃതിദത്ത ചായങ്ങൾ എന്നിവ ഉപയോഗിച്ച് പല്ലുകൾ കറുപ്പിക്കുമായിരുന്നു. സ്ത്രീകളുടെ സൗന്ദര്യത്തിന്റെയും പക്വതയുടെയും പ്രതീകമായാണ് ഇത് കണക്കാക്കപ്പെട്ടിരുന്നത്.

ജപ്പാനിൽ മാത്രമല്ല, വിയറ്റ്നാം, ചൈന തുടങ്ങി നിരവധി ദക്ഷിണ-കിഴക്കൻ ഏഷ്യൻ രാജ്യങ്ങളിലും കറുത്ത പല്ലുകൾക്ക് പ്രത്യേക സാംസ്കാരിക പ്രാധാന്യമുണ്ടായിരുന്നു. സൗന്ദര്യത്തിനൊപ്പം പല്ലുകളെ സംരക്ഷിക്കാനും ഈ രീതി സഹായിക്കുമെന്നാണ് വിശ്വാസം. വിയറ്റ്നാമിൽ “ന്യൂം റാം” എന്നറിയപ്പെട്ടിരുന്ന ഈ പ്രക്രിയ പൂർത്തിയാക്കാൻ ആഴ്ചകളോളം സമയം എടുത്തിരുന്നതായി ചരിത്രരേഖകൾ പറയുന്നു.

ആധുനിക കാലത്ത് ഈ ട്രെൻഡ് വീണ്ടും ശ്രദ്ധ നേടാൻ കാരണമായത് സംഗീത-ഫാഷൻ ലോകമാണ്. 2025-ഓടെ ചില റാപ്പ് ആർട്ടിസ്റ്റുകളും ആൾട്ടർനേറ്റീവ് ഫാഷൻ ഗ്രൂപ്പുകളും “ബ്ലാക്ക് ഗ്രിൽസ്” എന്ന ആശയത്തെ പുതിയ രീതിയിൽ അവതരിപ്പിച്ചു. പ്രത്യേകിച്ച് ആസിയൻ, ആഫ്രിക്കൻ വംശജരായ കലാകാരന്മാർ ഈ ചരിത്രപരമായ ശൈലിയെ ആധുനിക ഫാഷനുമായി കൂട്ടിച്ചേർത്ത് അവതരിപ്പിച്ചതോടെ ഇത് “ഓപിയം” സബ്‌കൾച്ചറിന്റെ ഭാഗമായും മാറി.

സോഷ്യൽ മീഡിയയുടെ കാലത്ത് പഴയ ട്രെൻഡുകൾ അതിവേഗം തിരിച്ചുവരുന്നുണ്ടെങ്കിലും, അവയുടെ ചരിത്രവും സാംസ്കാരിക പശ്ചാത്തലവും പലപ്പോഴും അവഗണിക്കപ്പെടാറുണ്ട്. ഒരു വീഡിയോയിലോ ഫോട്ടോയിലോ കണ്ട ശൈലി അനുകരിക്കുന്നതിന് മുമ്പ് അതിന്റെ പിന്നിലെ പാരമ്പര്യവും അർഥവും മനസിലാക്കേണ്ടതിന്റെ ആവശ്യകതയിലേക്കാണ് ഈ ട്രെൻഡ് വീണ്ടും ശ്രദ്ധ ക്ഷണിക്കുന്നത്.