ന്യൂയോർക്ക്: ജിസിസി (GCC) അംഗരാജ്യങ്ങൾക്കും അയൽരാജ്യങ്ങൾക്കും നേരെ ഇറാൻ നടത്തുന്ന നിയമവിരുദ്ധമായ ആക്രമണങ്ങളെ അപലപിച്ച് ഐക്യരാഷ്ട്രസഭയിൽ സംയുക്ത പ്രമേയം. ബഹ്‌റൈൻ സമർപ്പിച്ച പ്രമേയത്തിന് പിന്തുണയുമായി ന്യൂയോർക്കിലെ യുഎൻ ആസ്ഥാനത്ത് നടന്ന മാധ്യമസംഗമത്തിൽ ഖത്തറും പങ്കുചേർന്നു. ഖത്തർ സ്ഥിരപ്രതിനിധി ശൈഖ ആലിയ അഹമ്മദ് ബിൻ സെയ്ഫ് അൽഥാനിയാണ് ഖത്തറിനെ പ്രതിനിധീകരിച്ച് സംസാരിച്ചത്.ജിസിസി രാജ്യങ്ങൾക്കും ജോർദാനും നേരെ ഇറാൻ നടത്തുന്ന പ്രകോപനപരമായ ആക്രമണങ്ങളെ അപലപിക്കുക, പ്രാദേശിക സമാധാനം ഉറപ്പാക്കുക.ഖത്തറിന്റെ പരമാധികാരത്തിന് നേരെയും സിവിലിയൻ അടിസ്ഥാന സൗകര്യങ്ങൾക്ക് നേരെയും നടന്ന ആക്രമണങ്ങൾ അന്താരാഷ്ട്ര നിയമങ്ങളുടെയും യുഎൻ ചാർട്ടറിന്റെയും ലംഘനമാണെന്ന് ശൈഖ ആലിയ വ്യക്തമാക്കി.ഖത്തർ സായുധ സേനയുടെയും എയർ ഡിഫൻസ് സിസ്റ്റത്തിന്റെയും ജാഗ്രതയും കാര്യക്ഷമതയും കാരണം ആക്രമണങ്ങളിൽ ആർക്കും ജീവഹാനി സംഭവിച്ചിട്ടില്ലെന്ന് അവർ അറിയിച്ചു.തർക്കങ്ങൾ ചർച്ചകളിലൂടെയും സമാധാനപരമായ മാർഗ്ഗങ്ങളിലൂടെയും പരിഹരിക്കാനാണ് ഖത്തർ എപ്പോഴും ആഗ്രഹിക്കുന്നതെന്ന് ശൈഖ ആലിയ ഓർമ്മിപ്പിച്ചു. എന്നാൽ ഇറാന്റെ ഭാഗത്തുനിന്നുണ്ടാകുന്ന തുടർച്ചയായ ആക്രമണങ്ങൾ ഉഭയകക്ഷി ബന്ധങ്ങളുടെ അടിസ്ഥാനമായ വിശ്വാസ്യതയെ തകർക്കുന്നതാണ്.യുഎൻ ചാർട്ടറിലെ ആർട്ടിക്കിൾ 51 പ്രകാരം രാജ്യത്തിന്റെ പരമാധികാരവും ദേശീയ താൽപ്പര്യങ്ങളും സംരക്ഷിക്കുന്നതിനായി തിരിച്ചടിക്കാനുള്ള പൂർണ്ണമായ അവകാശം ഖത്തറിനുണ്ട്." - ശൈഖ ആലിയ അഹമ്മദ് ബിൻ സെയ്ഫ് അൽഥാനിപറഞ്ഞു.സുരക്ഷാ കൗൺസിൽ തങ്ങളുടെ ഉത്തരവാദിത്തം നിറവേറ്റണമെന്നും ഈ ആക്രമണങ്ങൾ ഉടൻ അവസാനിപ്പിക്കാൻ വ്യക്തമായ സന്ദേശം നൽകണമെന്നും ഖത്തർ ആവശ്യപ്പെട്ടു. അയൽരാജ്യങ്ങളെ ലക്ഷ്യമിടുന്നവർക്ക് ശിക്ഷ ലഭിക്കില്ലെന്ന തെറ്റായ സന്ദേശം ഇത്തരം സാഹചര്യങ്ങളിൽ മൗനം പാലിക്കുന്നത് വഴി ഉണ്ടാകരുതെന്നും ഖത്തർ മുന്നറിയിപ്പ് നൽകി.