ദോഹ: ഗൾഫ് സഹകരണ കൗൺസിൽ (GCC) രാജ്യങ്ങളുടെ സ്വപ്നപദ്ധതിയായ ജി.സി.സി റെയിൽവേ ശൃംഖലയുടെ നിർമ്മാണ പ്രവർത്തനങ്ങൾ പകുതി പിന്നിട്ടു. പദ്ധതിയുടെ 50 ശതമാനം ജോലികളും ഇതിനോടകം പൂർത്തിയായതായി ഗൾഫ് റെയിൽവേ അതോറിറ്റി ഡയറക്ടർ മുഹമ്മദ് അൽ ഷബർമി അറിയിച്ചു. മേഖലയിലെ ഗതാഗത മേഖലയിൽ വിപ്ലവകരമായ മാറ്റങ്ങൾ കൊണ്ടുവരുന്ന ഈ പദ്ധതി നിശ്ചിത സമയത്തിനുള്ളിൽ തന്നെ പൂർത്തിയാക്കാനാണ് അധികൃതർ ലക്ഷ്യമിടുന്നത്.ആറ് ഗൾഫ് രാജ്യങ്ങളെയും പരസ്പരം ബന്ധിപ്പിച്ചുകൊണ്ട് നിർമ്മിക്കുന്ന ഈ റെയിൽവേ ശൃംഖല യാഥാർത്ഥ്യമാകുന്നതോടെ ദോഹ, റിയാദ്, അബുദാബി, മസ്‌കറ്റ്, കുവൈത്ത് സിറ്റി, മനാമ എന്നീ നഗരങ്ങൾ തമ്മിലുള്ള യാത്രാദൂരം കുറയും. മണിക്കൂറിൽ 200 കിലോമീറ്ററിലധികം വേഗതയുള്ള ട്രെയിനുകൾ ഓടിക്കാനാണ് ആലോചന. ഇത് യാത്രക്കാർക്ക് കുറഞ്ഞ ചിലവിൽ അതിവേഗ യാത്ര ഉറപ്പാക്കുന്നതിനൊപ്പം, രാജ്യങ്ങൾ തമ്മിലുള്ള ചരക്കുനീക്കം (Logistics) കൂടുതൽ സുഗമമാക്കുകയും ചെയ്യും.മേഖലയിലെ സാമ്പത്തിക ഉണർവിനും വിനോദസഞ്ചാര മേഖലയുടെ വളർച്ചയ്ക്കും ജി.സി.സി റെയിൽവേ വലിയ സംഭാവന നൽകും. വിമാനയാത്രയെയും റോഡ് മാർഗ്ഗമുള്ള യാത്രയെയും അപേക്ഷിച്ച് പരിസ്ഥിതി സൗഹൃദവും സുരക്ഷിതവുമായ യാത്രാമാർഗ്ഗമായി ഇത് മാറും. ഗൾഫ് രാജ്യങ്ങൾ തമ്മിലുള്ള വ്യാപാര ബന്ധം ശക്തിപ്പെടുത്തുന്നതിനും പദ്ധതി മുതൽക്കൂട്ടാകും.
