​മനാമ/ദോഹ : ഗൾഫ് സഹകരണ കൗൺസിൽ (ജി.സി.സി) രാജ്യങ്ങളുടെ പ്രാദേശിക റെയിൽവേ ശൃംഖലയുടെ നിർമാണവും പ്രവർത്തനങ്ങളും ഏകോപിപ്പിക്കുന്നതിനായി അംഗരാജ്യങ്ങൾ സുപ്രധാന കരാറിൽ ഒപ്പുവെച്ചു. ബഹ്‌റൈനിൽ ഞായറാഴ്ച നടന്ന ചടങ്ങിലാണ് ഈ നിർണായക കരാർ ഒപ്പുവെക്കപ്പെട്ടത്.
ബഹ്‌റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ, ജി.സി.സി സെക്രട്ടറി ജനറൽ ജാസിം മുഹമ്മദ് അൽ ബുദൈവി, അംഗരാജ്യങ്ങളുടെ ഗതാഗത-വാർത്താവിനിമയ മന്ത്രിമാർ എന്നിവരുടെ സാന്നിധ്യത്തിലാണ് കരാർ ഒപ്പുവെച്ചത്.
​ജി.സി.സി റെയിൽവേ അതോറിറ്റിയുടെ കണക്കുകൾ പ്രകാരം പദ്ധതിയുടെ 55.92 ശതമാനം ജോലികളും ഇതിനോടകം പൂർത്തിയായിട്ടുണ്ട്. 2030 ഡിസംബറോടെ പദ്ധതി പൂർണ്ണതോതിൽ പ്രവർത്തനക്ഷമമാക്കാനാണ് ലക്ഷ്യമിടുന്നത്.
അംഗരാജ്യങ്ങളുടെ ദേശീയ റെയിൽവേ ശൃംഖലകൾ തമ്മിൽ തടസ്സമില്ലാതെ ബന്ധിപ്പിക്കുന്നതിനായി പൊതുവായ സാങ്കേതിക സവിശേഷതകളും സുരക്ഷാ മാനദണ്ഡങ്ങളും ഈ പൊതു കരാർ ഉറപ്പാക്കുന്നു.സൗദി അറേബ്യ, യു.എഇ, ബഹ്‌റൈൻ, കുവൈറ്റ്, ഒമാൻ, ഖത്തർ എന്നീ രാജ്യങ്ങളെ തമ്മിൽ ബന്ധിപ്പിക്കുന്ന ഈ പാത സാമ്പത്തിക കേന്ദ്രങ്ങളെയും തുറമുഖങ്ങളെയും ലോജിസ്റ്റിക്സ് ഹബ്ബുകളെയും കൂടുതൽ അടുപ്പിക്കും. ഇത് മേഖലയിലെ ചരക്കുനീക്കത്തിനും ടൂറിസത്തിനും വലിയ ഉത്തേജനം നൽകുമെന്ന് ഖത്തർ ഗതാഗത മന്ത്രാലയം വ്യക്തമാക്കി.
​2009-ൽ ജി.സി.സി ഉച്ചകോടിയാണ് റെയിൽവേ പദ്ധതിക്ക് അനുമതി നൽകിയത്. തുടർന്ന് 2021 ഡിസംബറിലാണ് ജി.സി.സി റെയിൽവേ അതോറിറ്റി രൂപീകരിച്ചത്. മുഴുവൻ ശൃംഖലയും പൂർത്തിയാകുന്നതിന് മുമ്പ് തന്നെ അയൽരാജ്യങ്ങളെ ബന്ധിപ്പിക്കുന്ന പൂർത്തിയായ ഭാഗങ്ങളുടെ പ്രവർത്തനം ആരംഭിക്കാൻ കഴിയുമെന്ന് അതോറിറ്റി അറിയിച്ചിട്ടുണ്ട്.