മനാമ: ഗൾഫ് സഹകരണ കൗൺസിൽ (ജി.സി.സി) അംഗരാജ്യങ്ങളെ തമ്മിൽ ബന്ധിപ്പിക്കുന്ന ബൃഹത്തായ ജി.സി.സി റെയിൽവേ പദ്ധതിയുടെ പൊതു ധാരണാപത്രത്തിൽ ഞായറാഴ്ച മനാമയിൽ വെച്ച് ഒപ്പുവെക്കും. ആറ് ഗൾഫ് രാജ്യങ്ങളെയും ഒറ്റ റെയിൽ ശൃംഖലയിലേക്ക് കോർത്തിണക്കുന്ന ചരിത്രപരമായ മുന്നേറ്റത്തിനാണ് മനാമ വേദിയാകുന്നത്.
ബഹ്‌റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ രക്ഷാകർതൃത്വത്തിൽ നടക്കുന്ന ചടങ്ങിൽ ജി.സി.സി ഗതാഗത മന്ത്രിമാരും സെക്രട്ടറി ജനറലും പങ്കെടുക്കും. പദ്ധതി നടപ്പിലാക്കൽ, സാങ്കേതിക സഹകരണം, ഏകോപനം, പ്രാദേശിക കണക്റ്റിവിറ്റി എന്നീ നാല് പ്രധാന സ്തംഭങ്ങളെ (Pillars) അടിസ്ഥാനമാക്കിയാണ് ധാരണാപത്രം തയ്യാറാക്കിയിട്ടുള്ളതെന്ന് ജി.സി.സി ജനറൽ സെക്രട്ടറിയേറ്റ് വ്യക്തമാക്കി.
അംഗരാജ്യങ്ങൾ കൃത്യമായ സമയബന്ധിതമായി പദ്ധതി പൂർത്തിയാക്കുക, സാങ്കേതികവും സുരക്ഷാപരവുമായ അന്താരാഷ്ട്ര മാനദണ്ഡങ്ങൾ ഉറപ്പാക്കി റെയിൽ പാതകൾ കോർത്തിണക്കുക, ജി.സി.സി റെയിൽവേ അതോറിറ്റിയുമായി സഹകരിച്ച് പ്രവർത്തനങ്ങൾ ഏകോപിപ്പിക്കുക എന്നിവയാണ് കരാറിലെ പ്രധാന വ്യവസ്ഥകൾ. ജനങ്ങൾക്കും ചരക്കുനീക്കത്തിനും സുരക്ഷിതവും പരിസ്ഥിതി സൗഹൃദപരവുമായ ഗതാഗത സൗകര്യം ഉറപ്പാക്കുന്നതിനൊപ്പം ജി.സി.സി രാജ്യങ്ങൾക്കിടയിലെ വ്യാപാര-സാമ്പത്തിക ബന്ധങ്ങൾ കൂടുതൽ ശക്തിപ്പെടുത്താൻ പദ്ധതി സഹായിക്കും.
