ഇസ്രയേൽ നടത്തിയ ആക്രമണത്തിൽ ഗാസയിൽ കൊല്ലപ്പെട്ടവരുടെ എണ്ണം സംബന്ധിച്ച് ഇതുവരെ പുറത്തുവന്നതൊന്നുമല്ല യഥാർത്ഥ കണക്കെന്ന് റിപ്പോർട്ട്. 47,518 പേർ കൊല്ലപ്പെട്ടെന്നായിരുന്നു ഗാസ ആരോഗ്യമന്ത്രാലയം നേരത്തേ വെളിപ്പെടുത്തിയിരുന്നത്. എന്നാൽ, മരണസംഖ്യ ഇതിലുമേറെയാണ് എന്ന കണക്കുകളാണ് ഇപ്പോൾ പുറത്തുവരുന്നത്. ഇസ്രയേൽ നടത്തിയ ആക്രമണത്തിൽ കൊല്ലപ്പെട്ടവരുടെ എണ്ണം 61,709 കവിയുമെന്നാണ് അധികൃതർ ചൂണ്ടിക്കാട്ടുന്നത്. വെടിനിർത്തലിന് പിന്നാലെ നടത്തിയ തെരച്ചിലിൽ തകർന്ന കെട്ടിടങ്ങൾക്കടിയിൽ നിന്നും കൂടുതൽ മൃതദേഹങ്ങൾ കണ്ടെത്തിയിട്ടുണ്ട്. തെരച്ചിൽ ഇനിയും പുരോഗമിക്കുകയാണ്.
കൊല്ലപ്പെട്ട 76 ശതമാനം പലസ്തീനികളുടെയും മൃതദേഹങ്ങൾ കണ്ടെടുത്തതായി ഗാസ ഭരണകൂടത്തിന്റെ ഇൻഫർമേഷൻ ഓഫിസ് തലവൻ സലാമ മഹറൂഫ് പറഞ്ഞു. അതേസമയം, 14,222 പേരുടെയെങ്കിലും മൃതദേഹങ്ങൾ കെട്ടിടങ്ങളുടെയും വീടുകളുടെയും അവശിഷ്ടങ്ങൾക്കടിയിൽ കുടുങ്ങിക്കിടക്കുകയാണെന്ന് അദ്ദേഹം വ്യക്തമാക്കി. ഇസ്രായേൽ വംശഹത്യയിൽ ജീവൻ നഷ്ടപ്പെട്ടവരിൽ 17,881 പേരും കുട്ടികളാണ്. 214 നവജാത ശിശുക്കളെയും സൈന്യം കൊലപ്പെടുത്തിയന്നും സലാമ മഹറൂഫ് പറഞ്ഞു.
