സുരേഷ് വണ്ടന്നൂർ
തിരുവനന്തപുരം:കേരള രാഷ്ട്രീയത്തിൽ തിരഞ്ഞെടുപ്പ് ചൂട് വർദ്ധിപ്പിച്ചുകൊണ്ട് മുന്നണികൾ തമ്മിലുള്ള ഡീൽ ആരോപണങ്ങളും പ്രത്യാരോപണങ്ങളും പുതിയ തലത്തിലേക്ക്. ജമാഅത്തെ ഇസ്‌ലാമി - യു.ഡി.എഫ് ബന്ധത്തെച്ചൊല്ലിയുണ്ടായ വിവാദങ്ങൾക്ക് പിന്നാലെ, എസ്.ഡി.പി.ഐ - എൽ.ഡി.എഫ് കൂട്ടുകെട്ടിനെക്കുറിച്ചുള്ള ചർച്ചകളാണ് ഇപ്പോൾ രാഷ്ട്രീയ കേന്ദ്രങ്ങളിൽ സജീവമായിരിക്കുന്നത്. കേന്ദ്ര നേതാക്കൾ എസ്.ഡി.പി.ഐ വോട്ട് തള്ളിക്കളയുമ്പോഴും മുഖ്യമന്ത്രി പിണറായി വിജയനും സി.പി.എം സംസ്ഥാന നേതൃത്വവും മൃദുസമീപനം സ്വീകരിക്കുന്നുവെന്ന ആക്ഷേപം ശക്തമാണ്.
പ്രതിപക്ഷ നേതാവ് വി.ഡി. സതീശനെതിരെ രൂക്ഷമായ ഭാഷയിലാണ് മുഖ്യമന്ത്രി പിണറായി വിജയൻ പ്രതികരിച്ചത്. തിരഞ്ഞെടുപ്പ് അടുത്തപ്പോൾ എന്തും വിളിച്ചുപറയുന്ന രീതിയാണ് സതീശന്റേതെന്ന് അദ്ദേഹം കുറ്റപ്പെടുത്തി. ബി.ജെ.പിയുമായി എൽ.ഡി.എഫ് ഡീൽ ഉണ്ടാക്കിയെന്ന് ആരോപിച്ചവർ ഇപ്പോൾ പുതിയ കഥകളുമായി രംഗത്തിറങ്ങിയിരിക്കുകയാണെന്ന് അദ്ദേഹം പരിഹസിച്ചു. വികസന നേട്ടങ്ങളിൽ നിന്ന് ശ്രദ്ധ തിരിക്കാനാണ് ഇത്തരം നുണപ്രചാരണങ്ങൾ നടത്തുന്നതെന്നും, വേങ്ങരയിലും മങ്കടയിലും എൽ.ഡി.എഫ് ആരുടെയും സഹായമില്ലാതെ തന്നെ മികച്ച വിജയം നേടുമെന്നും മുഖ്യമന്ത്രി ആത്മവിശ്വാസം പ്രകടിപ്പിച്ചു. കോർപ്പറേറ്റ് പ്രീണനത്തിലൂടെ സമ്പന്നരെ സഹായിച്ച പാരമ്പര്യമാണ് കോൺഗ്രസിനുള്ളതെന്നും, എന്നാൽ കേരളത്തെ അതിദരിദ്രരില്ലാത്ത സംസ്ഥാനമാക്കി മാറ്റാനാണ് എൽ.ഡി.എഫ് ശ്രമിക്കുന്നതെന്നും അദ്ദേഹം കൂട്ടിച്ചേർത്തു.
സി.പി.എമ്മിന്റെ ഇരട്ടത്താപ്പിനെ കടന്നാക്രമിച്ചുകൊണ്ടാണ് വി.ഡി. സതീശൻ മറുപടി നൽകിയത്. തങ്ങളുമായി ഡീലുണ്ടാക്കുന്നവരെയെല്ലാം മതേതരവാദികളായി പ്രഖ്യാപിക്കുന്ന വിചിത്രമായ നയമാണ് സി.പി.എമ്മിന്റേതെന്ന് അദ്ദേഹം ആരോപിച്ചു. എസ്.ഡി.പി.ഐയും പി.ഡി.പിയും ആർ.എസ്.എസും സി.പി.എമ്മിന് വോട്ട് നൽകുമ്പോൾ മതേതര പാർട്ടികളായി മാറുന്നത് എങ്ങനെയെന്ന് അദ്ദേഹം ചോദിച്ചു. എസ്.ഡി.പി.ഐയെ കുറിച്ചുള്ള ചോദ്യങ്ങളിൽ നിന്ന് മുഖ്യമന്ത്രിയും പാർട്ടി സെക്രട്ടറിയും ഒഴിഞ്ഞുമാറുന്നത് ഈ രഹസ്യബന്ധത്തിന് തെളിവാണെന്നും സതീശൻ ചൂണ്ടിക്കാട്ടി. യു.ഡി.എഫിന് ലഭിക്കുന്ന പിന്തുണയെ വർഗീയമെന്ന് വിളിക്കുന്നവർ സ്വന്തം നിലപാട് വ്യക്തമാക്കണമെന്നും അദ്ദേഹം ആവശ്യപ്പെട്ടു.
അതേസമയം, മുന്നണികൾ തമ്മിലുള്ള ഈ വാക്‌പോര് വികസന ചർച്ചകളിൽ നിന്ന് ജനശ്രദ്ധ തിരിക്കാനാണെന്ന് എൻ.ഡി.എ സ്ഥാനാർത്ഥി രാജീവ് ചന്ദ്രശേഖർ അഭിപ്രായപ്പെട്ടു. ആരോപണ പ്രത്യാരോപണങ്ങൾ നടത്തി ജനങ്ങളെ കബളിപ്പിക്കുന്നതിന് പകരം വിദ്യാഭ്യാസ പുരോഗതിയെക്കുറിച്ചും നാടിന്റെ വികസനത്തെക്കുറിച്ചും ചർച്ച ചെയ്യാൻ മുന്നണികൾ തയ്യാറാകണമെന്ന് അദ്ദേഹം പറഞ്ഞു. വികസന ചർച്ചകളിൽ നിന്ന് ബി.ജെ.പി ഒളിച്ചോടില്ലെന്നും, വി. ശിവൻകുട്ടി ഉയർത്തിയ വെല്ലുവിളി ഏറ്റെടുക്കാൻ താൻ തയ്യാറാണെന്നും അദ്ദേഹം വ്യക്തമാക്കി. ജനങ്ങളുടെ യഥാർത്ഥ പ്രശ്നങ്ങൾ ചർച്ചയാവേണ്ട നിയമസഭാ തിരഞ്ഞെടുപ്പിൽ ഡീൽ രാഷ്ട്രീയത്തിന് പ്രസക്തിയില്ലെന്നും രാജീവ് ചന്ദ്രശേഖർ കൂട്ടിച്ചേർത്തു.
