കൊച്ചി: കൊച്ചി ശാസ്ത്ര സാങ്കേതിക സർവകലാശാലയിലെ (കുസാറ്റ്) നാഷണൽ സർവീസ് സ്കീമിന്റെ (എൻ.എസ്.എസ്.) നേതൃത്വത്തിൽ വാസൻ ഐ കെയർ, ശാന്തിഭവൻ പാലിയേറ്റീവ് ഹോസ്പിറ്റൽസ്, അന്നൂർ ഡെന്റൽ കോളേജ് എന്നിവയുടെ സഹകരണത്തോടെ സൗജന്യ മെഡിക്കൽ പരിശോധനാ ക്യാമ്പും നേത്രപരിശോധനയും കുസാറ്റ് അമിനിറ്റി സെന്ററിൽ സംഘടിപ്പിച്ചു.

സർവകലാശാലാ സമൂഹത്തിൽ ആരോഗ്യബോധവും രോഗപ്രതിരോധ പ്രവർത്തനങ്ങളും പ്രോത്സാഹിപ്പിക്കുകയായിരുന്നു ക്യാമ്പിന്റെ ലക്ഷ്യം. വിദ്യാർഥികൾ, അധ്യാപകർ, അനധ്യാപകർ എന്നിവരടക്കം 250-ലധികം പേർ ക്യാമ്പിൽ പങ്കെടുത്തു. കുസാറ്റ് വൈസ് ചാൻസലർ സീനിയർ പ്രൊഫ. (ഡോ.) എം. ജുനൈദ് ബുഷിരി പരിപാടിയിൽ പങ്കെടുത്തു. വിവിധ വകുപ്പ് മേധാവികൾ, അധ്യാപകർ, ജീവനക്കാർ, വിദ്യാർഥികൾ എന്നിവരും സന്നിഹിതരായിരുന്നു.

ഡോക്ടറുടെ കൺസൾട്ടേഷൻ, രക്തസമ്മർദം, ഹൃദയമിടിപ്പ്, രക്തത്തിലെ ഓക്സിജന്റെ അളവ് എന്നിവയുടെ പരിശോധന, ഡിജിറ്റൽ ഇ.സി.ജി., ഇക്കോ പരിശോധന എന്നിവ ക്യാമ്പിൽ ലഭ്യമാക്കി. രക്തത്തിലെ പഞ്ചസാര, കൊളസ്‌ട്രോൾ, ലിപിഡ് പ്രൊഫൈൽ, കരൾ, വൃക്ക പ്രവർത്തന പരിശോധനകൾ, വിറ്റാമിൻ ഡി, വിറ്റാമിൻ ബി12, കാൽസ്യം, തൈറോയ്ഡ് പ്രവർത്തന പരിശോധന, എച്ച്.ബി.എ1സി, സി.ബി.സി. തുടങ്ങിയ ലബോറട്ടറി പരിശോധനകളും നടത്തി. വാസൻ ഐ കെയറിന്റെ നേതൃത്വത്തിൽ സൗജന്യ നേത്രപരിശോധനയും അന്നൂർ ഡെന്റൽ കോളേജിന്റെ നേതൃത്വത്തിൽ ദന്തപരിശോധനയും ലഭ്യമാക്കി.

വിവിധ എൻ.എസ്.എസ്. യൂണിറ്റുകളിലെ വളണ്ടിയർമാർ ക്യാമ്പിന്റെ നടത്തിപ്പിൽ സജീവമായി പങ്കെടുത്തു. രജിസ്ട്രേഷൻ, പങ്കാളികൾക്ക് ആവശ്യമായ നിർദേശങ്ങൾ നൽകൽ, തിരക്ക് നിയന്ത്രിക്കൽ, ഏകോപനം തുടങ്ങിയ ചുമതലകൾ വളണ്ടിയർമാർ നിർവഹിച്ചു. എൻ.എസ്.എസ്. പ്രോഗ്രാം കോർഡിനേറ്റർ രമ്യ ടീച്ചറുടെ നേതൃത്വത്തിൽ വിവിധ യൂണിറ്റുകളിലെ പ്രോഗ്രാം ഓഫീസർമാരുടെ സഹകരണത്തോടെയാണ് ക്യാമ്പ് സംഘടിപ്പിച്ചത്.

Photo Courtesy - Google