തിരുവനന്തപുരം: ലയണൽ മെസ്സി ഉൾപ്പെടുന്ന അർജന്റീന ഫുട്ബോൾ ടീമിനെ കേരളത്തിലെത്തിക്കാമെന്ന് വാഗ്ദാനം ചെയ്ത് നടന്ന സാമ്പത്തിക ഇടപാടുകളുമായി ബന്ധപ്പെട്ട തട്ടിപ്പ് അന്വേഷിക്കാൻ പ്രത്യേക അന്വേഷണ സംഘം (എസ്ഐടി) രൂപീകരിച്ചേക്കും. ഇതുസംബന്ധിച്ച ഉത്തരവ് ഇന്ന് പുറത്തിറങ്ങുമെന്നാണ് സൂചന. എസ്ഐടിയെ നിയോഗിക്കണമെന്ന ശുപാർശ മുഖ്യമന്ത്രി നൽകിയിട്ടുണ്ട്.

തലസ്ഥാനത്തെത്തുന്ന ആഭ്യന്തരമന്ത്രി രമേശ് ചെന്നിത്തല ഉന്നത ഉദ്യോഗസ്ഥരുമായി ചർച്ച നടത്തിയ ശേഷമായിരിക്കും അന്വേഷണ സംഘത്തിന്റെ കാര്യത്തിൽ അന്തിമ തീരുമാനമെടുക്കുക. വിജിലൻസിലെ മുതിർന്ന ഉദ്യോഗസ്ഥനെ എസ്ഐടിയുടെ ചുമതല ഏൽപ്പിക്കാനാണ് നിലവിലെ ആലോചന.

അഴിമതി നിരോധന നിയമപ്രകാരം കേസെടുക്കാനുള്ള സാഹചര്യമുണ്ടോ, മുൻ മന്ത്രിയടക്കമുള്ളവർ ഔദ്യോഗിക പദവി ദുരുപയോഗം ചെയ്തിട്ടുണ്ടോ തുടങ്ങിയ കാര്യങ്ങൾ പ്രത്യേക സംഘം പരിശോധിക്കും. സ്പോൺസർമാർക്ക് നിയമവിരുദ്ധമായ ആനുകൂല്യങ്ങൾ ലഭ്യമാക്കാൻ ഇടപെടലുണ്ടായോ എന്നതും അന്വേഷണ പരിധിയിൽ വരും. വിദേശ പണമിടപാടുകളുമായി ബന്ധപ്പെട്ട കാര്യങ്ങളിൽ കേന്ദ്ര അന്വേഷണ ഏജൻസികളുടെ സഹായം തേടാനും തീരുമാനിച്ചേക്കും. അന്വേഷണം സമയബന്ധിതമായി പൂർത്തിയാക്കണമെന്നാണ് മുഖ്യമന്ത്രിയുടെ നിർദേശം.

അതേസമയം, മെസ്സിയുടെ പേരിൽ നടന്ന സാമ്പത്തിക ഇടപാടുകളിൽ വിജിലൻസും അന്വേഷണം നടത്തും. വിദേശത്തേക്ക് പണം കൈമാറിയതുമായി ബന്ധപ്പെട്ട് സർക്കാരിന് ലഭിക്കേണ്ടിയിരുന്ന ഏകദേശം 26 കോടി രൂപയുടെ ജിഎസ്ടി സ്പോൺസർമാരിൽനിന്ന് ഈടാക്കുന്നതിൽ വീഴ്ച സംഭവിച്ചെന്ന കണ്ടെത്തലിനെ തുടർന്നാണിത്.

കഴിഞ്ഞ സർക്കാരിന്റെ കാലത്ത് ജിഎസ്ടി ഈടാക്കണമെന്ന ഉദ്യോഗസ്ഥതല നിർദേശം അട്ടിമറിക്കപ്പെട്ടതായാണ് അന്വേഷണത്തിലെ കണ്ടെത്തൽ. വീഴ്ച വരുത്തിയ ഉദ്യോഗസ്ഥരോട് വിശദീകരണം തേടി ജിഎസ്ടി കമ്മീഷണർ കാരണം കാണിക്കൽ നോട്ടീസ് നൽകിയിട്ടുണ്ട്. കമ്മീഷണറുടെ അന്വേഷണ റിപ്പോർട്ട് ഉടൻ സർക്കാരിന് കൈമാറും. റിപ്പോർട്ട് ലഭിച്ച ശേഷം വിജിലൻസ് പ്രാഥമിക അന്വേഷണം ആരംഭിക്കുന്നതിനുള്ള ഉത്തരവ് പുറപ്പെടുവിക്കുമെന്നാണ് വിവരം.

മെസ്സിയെ കേരളത്തിലെത്തിക്കാനുള്ള നീക്കവുമായി ബന്ധപ്പെട്ട സാമ്പത്തിക ഇടപാടുകളിലും ഔദ്യോഗിക തലത്തിലെ വീഴ്ചകളിലും ഒരേസമയം അന്വേഷണം ശക്തമാകുന്നതോടെ സംഭവത്തിൽ കൂടുതൽ നടപടികൾക്ക് വഴിയൊരുങ്ങുകയാണ്.