തിരുവനന്തപുരം: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഗുരുതര വെളിപ്പെടുത്തലുമായി മുൻ ചീഫ് സെക്രട്ടറി ജിജി തോംസൺ. 2016ൽ ഗ്യാനേഷ് കുമാർ തന്നെ ബിജെപി ടിക്കറ്റിൽ തെരഞ്ഞെടുപ്പിൽ മത്സരിക്കാൻ ക്ഷണിച്ചിരുന്നുവെന്നാണ് ജിജി തോംസൺ വെളിപ്പെടുത്തിയത്. മത്സരിച്ച് വിജയിച്ചാൽ കേന്ദ്രമന്ത്രിയാകാൻ അവസരം ലഭിക്കുമെന്നും ഗ്യാനേഷ് കുമാർ പറഞ്ഞതായി അദ്ദേഹം വെളിപ്പെടുത്തിയെന്ന് വാർത്താ ചാനലായ ഏഷ്യാനെറ്റ് ന്യൂസ് റിപ്പോർട്ട് ചെയ്യുന്നു.
2016ൽ ഡൽഹിയിലേക്കുള്ള വിമാനയാത്രയ്ക്കിടെയായിരുന്നു ഇരുവരും തമ്മിലുള്ള സംഭാഷണം. ചീഫ് സെക്രട്ടറി സ്ഥാനത്തുനിന്ന് വിരമിച്ച ശേഷം ബിജെപിയിൽ ചേരുന്നതിനെക്കുറിച്ചും തെരഞ്ഞെടുപ്പിൽ മത്സരിക്കുന്നതിനെക്കുറിച്ചുമാണ് ഗ്യാനേഷ് കുമാർ നിർദേശം നൽകിയതെന്ന് ജിജി തോംസൺ പറയുന്നു.
എന്നാൽ തെരഞ്ഞെടുപ്പിൽ മത്സരിക്കാൻ താൽപര്യമില്ലെന്ന് ജിജി തോംസൺ മറുപടി നൽകി. സർവീസിൽ തുടരുന്ന സമയത്തുതന്നെ ഇത്തരമൊരു നിർദേശം ലഭിച്ചത് തന്നെ അത്ഭുതപ്പെടുത്തിയെന്നും അദ്ദേഹം പറഞ്ഞു.
തെരഞ്ഞെടുപ്പിൽ മത്സരിച്ച് വിജയിച്ചാൽ കേന്ദ്രമന്ത്രി സ്ഥാനം ലഭിക്കുമെന്നായിരുന്നു ഗ്യാനേഷ് കുമാറിന്റെ വാഗ്ദാനമെന്നും ജിജി തോംസൺ വ്യക്തമാക്കി. എന്നാൽ ഈ ക്ഷണം അദ്ദേഹം നിരസിക്കുകയായിരുന്നു.
മുഖ്യ തെരഞ്ഞെടുപ്പ് കമ്മീഷണർ സ്ഥാനത്തിരിക്കുന്ന ഗ്യാനേഷ് കുമാറിൽനിന്ന് ഇത്തരമൊരു രാഷ്ട്രീയ നിർദേശം ഉണ്ടായെന്ന മുൻ ചീഫ് സെക്രട്ടറിയുടെ വെളിപ്പെടുത്തൽ ഇപ്പോൾ ശ്രദ്ധേയമായിരിക്കുകയാണ്.
