ദോഹ: ലോകകപ്പിന്റെ ആവേശം വീണ്ടുമുണർത്തിക്കൊണ്ട് 2026-ലെ ഫിഫ അണ്ടർ-17 ലോകകപ്പിന്റെ തീയതികൾ ഫിഫയും പ്രാദേശിക സംഘാടക സമിതിയും (LOC) പ്രഖ്യാപിച്ചു. ഈ വർഷം നവംബർ 19 മുതൽ ഡിസംബർ 13 വരെയാണ് ടൂർണമെന്റ് നടക്കുക. 2029 വരെ തുടർച്ചയായി അഞ്ച് വർഷം ഖത്തർ ആതിഥേയത്വം വഹിക്കുന്ന ഈ പരമ്പരയിലെ രണ്ടാമത്തെ എഡിഷനാണിത്.കഴിഞ്ഞ വർഷത്തെ പോലെ തന്നെ വിപുലീകരിച്ച ഫോർമാറ്റിൽ 48 ടീമുകളാണ് ലോകകിരീടത്തിനായി പോരാടുന്നത്.ടൂർണമെന്റിന്റെ ഔദ്യോഗിക ഫൈനൽ ഡ്രോ മെയ് 21-ന് സ്വിറ്റ്സർലൻഡിലെ സൂറിച്ചിൽ നടക്കും.ആസ്പയർ സോണിലെ അത്യാധുനിക സൗകര്യങ്ങളുള്ള 'കോംപറ്റീഷൻ കോംപ്ലക്സ്' ആയിരിക്കും മത്സരങ്ങളുടെ പ്രധാന കേന്ദ്രം. ഫൈനൽ മത്സരം ചരിത്രപ്രസിദ്ധമായ ഖലീഫ ഇന്റർനാഷണൽ സ്റ്റേഡിയത്തിൽ നടക്കും.
ഈ വർഷം ഖലീഫ ഇന്റർനാഷണൽ സ്റ്റേഡിയം അതിന്റെ 50-ാം വാർഷികം ആഘോഷിക്കുന്നു എന്നതാണ് മറ്റൊരു പ്രത്യേകത. കഴിഞ്ഞ വർഷം പോർച്ചുഗൽ ചാമ്പ്യന്മാരായ ഈ വേദി, ഖത്തർ ലോകകപ്പ് 2022-നുൾപ്പെടെ നിരവധി വലിയ കായിക മാമാങ്കങ്ങൾക്ക് സാക്ഷ്യം വഹിച്ചിട്ടുണ്ട്. മെയ് 9-ന് നടക്കുന്ന അമീർ കപ്പ് ഫൈനലിനും ഈ സ്റ്റേഡിയം തന്നെയാണ് വേദിയാകുന്നത്.
​കഴിഞ്ഞ വർഷത്തെ ടൂർണമെന്റിൽ ഏകദേശം രണ്ട് ലക്ഷത്തോളം കാണികളാണ് പങ്കെടുത്തത്. ലോകമെമ്പാടുമുള്ള പ്രമുഖ ക്ലബ്ബുകളിൽ നിന്നുള്ള 130-ഓളം സ്കൗട്ടുകൾ ഭാവി താരങ്ങളെ കണ്ടെത്താൻ ഖത്തറിലെത്തിയിരുന്നു. ഫുട്ബോൾ ലോകത്തെ നാളത്തെ താരങ്ങളെ കണ്ടെത്താനുള്ള മികച്ച വേദിയായി ഈ ടൂർണമെന്റ് മാറിക്കഴിഞ്ഞു. ടൂർണമെന്റുമായി ബന്ധപ്പെട്ട കൂടുതൽ വിവരങ്ങൾ '@RoadtoQatar' എന്ന സോഷ്യൽ മീഡിയ അക്കൗണ്ടുകൾ വഴി ലഭ്യമാകും.