ലോക ലഹരി വിരുദ്ധ ദിനത്തോടനുബന്ധിച്ച് ഫ്രണ്ട്സ് ഓഫ് കോഴിക്കോട് – ഫോക് ഖത്തർ (Friends of Kozhikode – FOK Qatar) സംഘടിപ്പിച്ച ജനറൽ ബോഡി യോഗത്തിൽ അംഗങ്ങൾ ലഹരി വിരുദ്ധ പ്രതിജ്ഞ ഏറ്റുചൊല്ലി.
സമൂഹത്തിൽ വർധിച്ചുവരുന്ന ലഹരി ഉപയോഗത്തിനെതിരെ ശക്തമായ ബോധവൽക്കരണം സൃഷ്ടിക്കുന്നതിനും ആരോഗ്യകരവും സുരക്ഷിതവുമായ ഒരു സമൂഹം കെട്ടിപ്പടുക്കുന്നതിൽ പ്രവാസി സമൂഹത്തിന്റെ ഉത്തരവാദിത്തം ഊട്ടിയുറപ്പിക്കുന്നതിനുമായാണ് പ്രതിജ്ഞാ ചടങ്ങ് സംഘടിപ്പിച്ചത്. ജനറൽ ബോഡിയിൽ പങ്കെടുത്ത മുഴുവൻ അംഗങ്ങളും ലഹരി എന്ന സാമൂഹിക വിപത്തിനെതിരെ ജാഗ്രതയോടെയും പ്രതിബദ്ധതയോടെയും പ്രവർത്തിക്കുമെന്ന് പ്രതിജ്ഞയിലൂടെ ഉറപ്പുനൽകി.
2025 മുതൽ ഒരു വർഷം നീണ്ടുനിന്ന ലഹരി വിരുദ്ധ ബോധവൽക്കരണ ക്യാമ്പയിൻ ഫോക് ഖത്തർ വിവിധ പരിപാടികളിലൂടെ വിജയകരമായി നടപ്പാക്കി വരികയാണ്. ബോധവൽക്കരണ ക്ലാസുകൾ, സാമൂഹിക ഇടപെടലുകൾ, പൊതുജന പങ്കാളിത്ത പരിപാടികൾ എന്നിവയിലൂടെ ലഹരിക്കെതിരായ സന്ദേശം സമൂഹത്തിലേക്ക് എത്തിക്കാൻ സംഘടനയ്ക്ക് കഴിഞ്ഞു.
“ലഹരിമുക്ത സമൂഹം” എന്ന ലക്ഷ്യം മുൻനിർത്തി സാമൂഹിക പ്രതിബദ്ധതയുള്ള ഇത്തരം ബോധവൽക്കരണ പ്രവർത്തനങ്ങൾ വരുംകാലങ്ങളിലും കൂടുതൽ ശക്തമായി തുടരുമെന്ന് ഫോക് ഖത്തർ ഭാരവാഹികൾ അറിയിച്ചു.
