​ദോഹ: രാജ്യത്തിന്റെ വികസന കുതിപ്പിന് പുത്തൻ ഉണർവ് നൽകിക്കൊണ്ട് ഖത്തറിലെ വിവിധ സർവ്വകലാശാലകളിൽ നിന്നായി അയ്യായിരത്തോളം ബിരുദധാരികൾ ഇക്കുറി തൊഴിൽ വിപണിയിലേക്ക്. മെയ് മാസത്തിൽ നടക്കുന്ന ബിരുദദാന ചടങ്ങുകളിലൂടെ ഖത്തർ യൂണിവേഴ്സിറ്റി, ഹമദ് ബിൻ ഖലീഫ യൂണിവേഴ്സിറ്റി, എഡ്യൂക്കേഷൻ സിറ്റിയിലെ വിദേശ സർവ്വകലാശാലകൾ എന്നിവിടങ്ങളിൽ നിന്നുള്ള വിദ്യാർത്ഥികളാണ് തങ്ങളുടെ പഠനം പൂർത്തിയാക്കി പുറത്തിറങ്ങുന്നത്.
​ദേശീയ കേഡറുകളെ ശക്തിപ്പെടുത്തുന്നതിനും ഖത്തറിന്റെ ഭാവി വികസനത്തിന് അറിവുള്ള യുവതലമുറയെ സജ്ജരാക്കുന്നതിനും ഈ ബാച്ചുകൾ വലിയ പങ്കുവഹിക്കുമെന്ന് അധികൃതർ വ്യക്തമാക്കി.ഖത്തർ യൂണിവേഴ്സിറ്റിയുടെ 49-ാമത് ബിരുദദാന ചടങ്ങ് മെയ് 4, 5 തീയതികളിൽ നടക്കും. ഇത്തവണത്തെ ചടങ്ങിന്റെ ഏറ്റവും വലിയ പ്രത്യേകത കോളേജ് ഓഫ് നഴ്സിംഗിൽ നിന്നുള്ള ആദ്യ ബാച്ച് പുറത്തിറങ്ങുന്നു എന്നതാണ്. ആരോഗ്യ മേഖലയിൽ മികച്ച പ്രൊഫഷണലുകളെ വാർത്തെടുക്കാനുള്ള രാജ്യത്തിന്റെ ശ്രമങ്ങളിൽ ഇതൊരു നിർണ്ണായക നാഴികക്കല്ലാണെന്ന് യൂണിവേഴ്സിറ്റി വൈസ് പ്രസിഡന്റ് ഡോ. മുഹമ്മദ് ദിയാബ് പറഞ്ഞു.മെയ് 5 മുതൽ 9 വരെ സ്പോർട്സ് ആൻഡ് ഇവന്റ്സ് കോംപ്ലക്സിൽ വെച്ച് നടക്കുന്ന വിവിധ കോളേജുകളുടെ ബിരുദദാന ചടങ്ങുകൾ ഖത്തർ യൂണിവേഴ്സിറ്റിയുടെ ഔദ്യോഗിക യൂട്യൂബ് ചാനൽ വഴി തത്സമയം കാണാൻ സാധിക്കും. മെയ് 7-ന് ആരോഗ്യ വിഭാഗത്തിലെ വിദ്യാർത്ഥിനികളുടെയും, മെയ് 9-ന് ആർട്സ് ആൻഡ് സയൻസ് വിഭാഗത്തിലെ വിദ്യാർത്ഥിനികളുടെയും ചടങ്ങുകൾ നടക്കും.
​രാജ്യത്തിന്റെ തൊഴിൽ വിപണിയിലേക്ക് പുതിയ ഊർജ്ജവും നൂതന ആശയങ്ങളും എത്തിക്കുന്ന ഈ ബിരുദധാരികൾ, ഖത്തർ നാഷണൽ വിഷൻ 2030-ന്റെ ലക്ഷ്യങ്ങൾ കൈവരിക്കുന്നതിൽ പ്രധാന പങ്കുവഹിക്കുമെന്നാണ് പ്രതീക്ഷിക്കപ്പെടുന്നത്.