തിരുവനന്തപുരം: പുതിയ മാസം തുടങ്ങുന്നതോടെ രാജ്യത്തെ ബാങ്കിങ്, ഡിജിറ്റൽ പേയ്മെന്റ്, നിക്ഷേപം തുടങ്ങിയ മേഖലകളിൽ ചില മാറ്റങ്ങൾ പ്രാബല്യത്തിൽ വരുന്നു. സാധാരണക്കാരുടെ ദൈനംദിന സാമ്പത്തിക ഇടപാടുകളെയും ചെലവ് നിയന്ത്രണങ്ങളെയും ബാധിക്കാവുന്ന ഈ മാറ്റങ്ങൾ അറിഞ്ഞിരിക്കേണ്ടത് പ്രധാനമാണ്.

എസ്ബിഐ എടിഎം ഇടപാടുകൾക്ക് അധിക ചാർജ്

സ്റ്റേറ്റ് ബാങ്ക് ഓഫ് ഇന്ത്യയുടെ എടിഎം ഉപയോഗിക്കുന്ന ഉപഭോക്താക്കൾക്ക് സൗജന്യ ഇടപാടുകളുടെ പരിധി കഴിഞ്ഞാൽ അധിക നിരക്ക് നൽകേണ്ടിവരും. ഒരു മാസത്തിൽ അഞ്ച് ഇടപാടുകൾ വരെ സൗജന്യമായി നടത്താം. പരിധി കഴിഞ്ഞുള്ള പണം പിൻവലിക്കൽ ഇടപാടുകൾക്ക് 23 രൂപയും ജിഎസ്ടിയും ഈടാക്കും.

ബാലൻസ് പരിശോധിക്കൽ, മിനി സ്റ്റേറ്റ്മെന്റ് എടുക്കൽ തുടങ്ങിയ സാമ്പത്തികേതര ഇടപാടുകളും സൗജന്യ ഇടപാടുകളുടെ പരിധിയിൽ ഉൾപ്പെടും. പരിധി കഴിഞ്ഞാൽ ഇത്തരം ഇടപാടുകൾക്ക് 11 രൂപയും ജിഎസ്ടിയും നൽകേണ്ടിവരും.

അതുകൊണ്ടുതന്നെ എടിഎം വഴി ആവർത്തിച്ച് ബാലൻസ് പരിശോധിക്കുന്നതിന് പകരം ബാങ്കിന്റെ മൊബൈൽ ആപ്പ്, യുപിഐ ആപ്പുകൾ തുടങ്ങിയ സൗജന്യ ഡിജിറ്റൽ മാർഗങ്ങൾ ഉപയോഗിക്കുന്നത് അധിക ചെലവ് ഒഴിവാക്കാൻ സഹായിക്കും.

എൽപിജി സബ്സിഡിക്ക് ആധാർ ബയോമെട്രിക് പരിശോധന

പാചകവാതക സബ്സിഡി ലഭിക്കുന്ന ഉപഭോക്താക്കൾ ആധാർ ബയോമെട്രിക് ഓതന്റിക്കേഷൻ പൂർത്തിയാക്കേണ്ടതുണ്ട്. ഗ്യാസ് ഏജൻസിയിൽ നേരിട്ട് എത്തി നടപടികൾ പൂർത്തിയാക്കാം. സിലിണ്ടർ വീട്ടിലെത്തിക്കുന്ന സമയത്ത് ജീവനക്കാരുടെ കൈവശമുള്ള ഉപകരണം വഴിയും പരിശോധന നടത്താം.

ബന്ധപ്പെട്ട ഗ്യാസ് വിതരണ കമ്പനിയുടെ ഔദ്യോഗിക മൊബൈൽ ആപ്പ് ലഭ്യമാണെങ്കിൽ അതുവഴിയും നടപടിക്രമം പൂർത്തിയാക്കാൻ കഴിയും. സബ്സിഡി ലഭിക്കുന്നതിൽ തടസ്സമുണ്ടാകാതിരിക്കാൻ ഉപഭോക്താക്കൾ തങ്ങളുടെ ആധാർ വിവരങ്ങളും ഗ്യാസ് കണക്ഷൻ വിവരങ്ങളും പരിശോധിക്കുന്നത് നല്ലതാണ്.

യുപിഐ ഇടപാടുകൾക്ക് ഉപഭോക്താവിന് ചാർജുണ്ടോ?

യുപിഐ ഇടപാടുകൾക്ക് ചാർജ് ഏർപ്പെടുത്തുന്നു എന്ന തരത്തിലുള്ള പ്രചാരണങ്ങൾക്കിടയിൽ, വ്യക്തികൾ തമ്മിലുള്ള സാധാരണ യുപിഐ പണമിടപാടുകൾക്ക് ഉപഭോക്താവിൽ നിന്ന് ചാർജ് ഈടാക്കുന്നില്ല.

വ്യാപാര സ്ഥാപനങ്ങളിലേക്കുള്ള ചില വലിയ ഇടപാടുകളിൽ മർച്ചന്റ് ഡിസ്കൗണ്ട് റേറ്റ് (MDR) ബാധകമായേക്കാം. എന്നാൽ ഇത് ഉപഭോക്താവിൽ നിന്ന് ഈടാക്കുന്ന സാധാരണ യുപിഐ ഫീസ് അല്ല; വ്യാപാരിയുടെ ഭാഗത്തുള്ള പേയ്മെന്റ് സംവിധാനവുമായി ബന്ധപ്പെട്ട നിരക്കാണ്. അതുകൊണ്ട് തന്നെ സുഹൃത്തുക്കൾക്കും കുടുംബാംഗങ്ങൾക്കുമിടയിലെ സാധാരണ യുപിഐ പണമിടപാടുകൾക്ക് അധിക ചാർജ് വരുമെന്ന ആശങ്ക വേണ്ട.

2000 രൂപയ്ക്ക് മുകളിലുള്ള മെർച്ചന്റ് ഇടപാടുകൾക്ക് (വ്യാപാരികൾക്ക് പണം നൽകുമ്പോൾ) 0.4 ശതമാനം നിരക്കിൽ മർച്ചന്റ് ഡിസ്കൗണ്ട് റേറ്റ് ബാധകമായിരിക്കും. 75,000 രൂപയ്ക്ക് മുകളിലുള്ള വലിയ ഇടപാടുകൾക്ക് ഈ നിരക്ക് പരമാവധി 300 രൂപയായി നിജപ്പെടുത്തിയിട്ടുണ്ട്.

വലിയ എഫ്ഡികൾക്ക് കൂടുതൽ സുതാര്യത

മൂന്ന് കോടി രൂപയോ അതിലധികമോ തുകയുള്ള സ്ഥിരനിക്ഷേപങ്ങളുമായി ബന്ധപ്പെട്ട് ബാങ്കുകൾ പാലിക്കേണ്ട മാനദണ്ഡങ്ങളിലും മാറ്റങ്ങളുണ്ട്. ഇത്തരം നിക്ഷേപങ്ങൾക്ക് ബാധകമായ പലിശനിരക്കുകൾ ബാങ്കുകൾ നിശ്ചിത സമയത്ത് പ്രസിദ്ധീകരിക്കണം.

ബാങ്കിന്റെ വിവിധ ശാഖകളിൽ വലിയ നിക്ഷേപങ്ങൾക്ക് വ്യത്യസ്ത പലിശനിരക്കുകൾ നൽകുന്നത് ഒഴിവാക്കി കൂടുതൽ ഏകീകരണവും സുതാര്യതയും ഉറപ്പാക്കുകയാണ് ലക്ഷ്യം.

മൂന്ന് കോടി രൂപയിൽ താഴെയുള്ള സാധാരണ സ്ഥിരനിക്ഷേപങ്ങൾക്ക് ഈ പ്രത്യേക മാനദണ്ഡങ്ങൾ നേരിട്ട് ബാധകമല്ല.

എൻപിഎസ് ഫീസ് ഘടനയിലും മാറ്റം

നാഷണൽ പെൻഷൻ സിസ്റ്റത്തിൽ (NPS) പുതുതായി ചേരുന്നവർക്കുള്ള ഫീസ് ഘടനയിലും മാറ്റമുണ്ട്. പുതിയതായി അക്കൗണ്ട് തുറക്കുമ്പോൾ 200 രൂപ പ്രവേശന ഫീസ് നൽകണം.

ഇതിന് പുറമെ നിക്ഷേപ തുകയുടെ 0.20 ശതമാനം വാർഷിക സർവീസ് ഫീസും ഈടാക്കും. അക്കൗണ്ടിലുള്ള യൂണിറ്റുകളിൽ നിന്നാണ് ഈ തുക ക്രമീകരിക്കുക. അതേസമയം നേരിട്ട് എൻപിഎസിൽ ചേരുന്നവർക്കുള്ള ഫീസ് വ്യവസ്ഥകൾ വ്യത്യസ്തമായിരിക്കാം.

സാധാരണക്കാർ ശ്രദ്ധിക്കേണ്ടത്

ഒക്ടോബർ മുതൽ സാമ്പത്തിക ഇടപാടുകളിൽ അധിക ചെലവ് ഒഴിവാക്കാൻ ചില കാര്യങ്ങൾ പ്രത്യേകം ശ്രദ്ധിക്കണം. എടിഎം സൗജന്യ ഇടപാടുകളുടെ പരിധി കഴിയാതെ നോക്കുക, ബാലൻസ് പരിശോധിക്കാൻ മൊബൈൽ ബാങ്കിങ് ഉപയോഗിക്കുക, ഗ്യാസ് സബ്സിഡിക്കുള്ള ആധാർ ബയോമെട്രിക് നടപടികൾ പൂർത്തിയാക്കിയിട്ടുണ്ടോ എന്ന് പരിശോധിക്കുക എന്നിവ പ്രധാനമാണ്.

വലിയ തുകയിലുള്ള എഫ്ഡികളും എൻപിഎസ് നിക്ഷേപങ്ങളും ഉള്ളവർ നിലവിലെ പലിശനിരക്കുകളും സേവനച്ചെലവുകളും പരിശോധിച്ച് തങ്ങളുടെ സാമ്പത്തിക ആസൂത്രണം പുതുക്കുന്നതും ഗുണകരമാണ്.