മുംബൈ: രാജ്യത്ത് വരും മാസങ്ങളിൽ വിലക്കയറ്റ സമ്മർദം ശക്തമാകാൻ സാധ്യതയുണ്ടെന്ന് കേന്ദ്ര ധനമന്ത്രാലയം മുന്നറിയിപ്പ് നൽകി. പ്രതീക്ഷിച്ചതിലും കുറഞ്ഞ കാലവർഷവും ഇന്ധനവിലയിലെ വർധനയും പ്രധാന ആശങ്കകളായി ചൂണ്ടിക്കാട്ടുന്ന മേയ് മാസ അവലോകന റിപ്പോർട്ട്, പശ്ചിമേഷ്യയിലെ സംഘർഷം വിതരണ ശൃംഖലയെ ബാധിക്കുന്നതായും വ്യക്തമാക്കുന്നു.
സേവനമേഖലയിലെ കയറ്റുമതി വളർച്ച, ഉയർന്ന വിദേശനാണ്യ കരുതൽശേഖരം, ശക്തമായ തൊഴിൽവിപണി തുടങ്ങിയ ഘടകങ്ങൾ ഇന്ത്യൻ സമ്പദ്വ്യവസ്ഥയ്ക്ക് കരുത്തേകുന്നുണ്ടെങ്കിലും, ഇന്ധനവില വർധന പുതിയ വെല്ലുവിളികൾ സൃഷ്ടിക്കുമെന്ന് റിപ്പോർട്ട് പറയുന്നു. പെട്രോൾ, ഡീസൽ വില കൂടുന്നത് ഗതാഗതച്ചെലവ് ഉയർത്തുകയും അതുവഴി വിവിധ ഉത്പന്നങ്ങളുടെയും സേവനങ്ങളുടെയും വില വർധിക്കാൻ ഇടയാക്കുകയും ചെയ്യും.
രൂപയുടെ മൂല്യത്തകർച്ച, ഊർജവിലയിലെ കയറ്റം, ഭക്ഷ്യവസ്തുക്കളുടെ വിലവർധന എന്നിവയും ആശങ്ക വർധിപ്പിക്കുന്ന ഘടകങ്ങളാണ്. ഈ വർഷം കാലവർഷം സാധാരണയേക്കാൾ കുറവാകുമെന്ന കാലാവസ്ഥാ വകുപ്പിന്റെ പ്രവചനം കാർഷികോത്പാദനത്തെ ബാധിക്കാനും അതുവഴി ഭക്ഷ്യവിലക്കയറ്റം രൂക്ഷമാകാനും സാധ്യതയുണ്ടെന്ന് റിപ്പോർട്ടിൽ വിലയിരുത്തുന്നു.
ഈ സാഹചര്യത്തിൽ 2026-27 സാമ്പത്തിക വർഷത്തിൽ ധനകാര്യ, സാമ്പത്തിക, ഘടനാപര മേഖലകളിൽ കൂടുതൽ ജാഗ്രതയോടെയുള്ള നയസമീപനം ആവശ്യമാണ് എന്ന് ധനമന്ത്രാലയം നിർദേശിക്കുന്നു. സാമ്പത്തിക വളർച്ച നിലനിർത്തിക്കൊണ്ട് പണപ്പെരുപ്പം നിയന്ത്രിക്കുന്നതിൽ പ്രത്യേക ശ്രദ്ധ വേണമെന്നും റിപ്പോർട്ട് ചൂണ്ടിക്കാട്ടുന്നു.
