ബോസ്റ്റൺ: അർജന്റീന–ഈജിപ്ത് പ്രീക്വാർട്ടർ മത്സരത്തിലെ വിവാദ റഫറിയിങ് തീരുമാനങ്ങളും ഗൂഢാലോചനാ ആരോപണങ്ങളും അടങ്ങും മുമ്പേ, ലോകകപ്പ് ക്വാർട്ടർ ഫൈനലിന് മുന്നോടിയായി ഫിഫയുടെ പുതിയ റഫറി നിയമനം വീണ്ടും വലിയ ചർച്ചയ്ക്ക് വഴിവെച്ചിരിക്കുകയാണ്. വ്യാഴാഴ്ച ബോസ്റ്റണിൽ നടക്കുന്ന ഫ്രാൻസ്–മൊറോക്കോ പോരാട്ടത്തിന് മുഴുവൻ അർജന്റീനൻ റഫറിമാരടങ്ങുന്ന ഓഫിഷ്യൽ സംഘത്തെയാണ് ഫിഫ നിയോഗിച്ചത്.

ഫിഫ ബുധനാഴ്ച പുറത്തുവിട്ട പ്രഖ്യാപനപ്രകാരം 44-കാരനായ ഫകുണ്ടോ ടെല്ലോയാണ് മത്സരം നിയന്ത്രിക്കുക. ഇദ്ദേഹം അർജന്റീനക്കാരനാണ്. സഹ റഫറിമാരായി ഹുവാൻ പാബ്ലോ ബെലാറ്റി, ഗബ്രിയേൽ ചാദെ എന്നിവരും നാലാം റഫറിയായി ദാരിയോ ഹെറേരയും പ്രവർത്തിക്കും. ഇവരും അർജന്റീനയിൽ നിന്നുള്ളവരാണ്. റിസർവ് അസിസ്റ്റന്റ് റഫറിയായ ക്രിസ്റ്റ്യൻ നവാറോയും അർജന്റീനക്കാരനാണ്. ഇതോടെ 2026 ലോകകപ്പിൽ ഒരേ രാജ്യത്തിൽ നിന്നുള്ള മുഴുവൻ റഫറിമാരും ഉൾപ്പെട്ട ആദ്യ ഓഫിഷ്യൽ സംഘമെന്ന പ്രത്യേകത ഈ മത്സരത്തിനാണ് ലഭിച്ചിരിക്കുന്നത്.

നിലവിലെ ലോകകപ്പ് ജേതാക്കളായ അർജന്റീനയുടെ ഇത്തവണത്തെ ഏറ്റവും ശക്തരായ എതിരാളികളായാണ് ഫ്രാൻസിനെ കണക്കാക്കുന്നത്. ഇത്തരമൊരു സാഹചര്യത്തിൽ ഫിഫയുടെ ഈ തീരുമാനം ഫുട്ബോൾ ലോകത്ത് വലിയ ചർച്ചയ്ക്കാണ് വഴിവെച്ചത്. അർജന്റീന ഈജിപ്തിനെ 3-2ന് തോൽപ്പിച്ച പ്രീക്വാർട്ടർ മത്സരത്തിൽ ഫ്രഞ്ച് റഫറിയായ ഫ്രാൻസ്വാ ലെറ്റെക്സിയറുടെ നിരവധി വിഎആർ തീരുമാനങ്ങൾ കടുത്ത വിമർശനത്തിന് വിധേയമായതിന് പിന്നാലെയാണ് ഫിഫയുടെ പുതിയ നിയമനം.

റഫറിമാരെ കഴിവിന്റെ അടിസ്ഥാനത്തിലാണ് തെരഞ്ഞെടുത്തതെന്ന നിലപാടിൽ ഫിഫ ഉറച്ചുനിൽക്കുമ്പോഴും, നിയമനത്തിന്റെ സമയവും സാഹചര്യവും പുതിയ വിവാദങ്ങൾക്ക് ഇടയാക്കിയിരിക്കുകയാണ്. അതേസമയം, ഫ്രാൻസ് പരിശീലകൻ ദിദിയേ ദേശ്ഷാംപ്സ് ഈ വിഷയത്തെ വലിയ വിവാദമാക്കാൻ തയ്യാറായില്ല. "അത് അംഗീകരിക്കേണ്ട കാര്യമാണ്. റഫറിമാരിൽ എനിക്ക് വിശ്വാസമുണ്ട്. ഞങ്ങളുടെ എതിരാളി മൊറോക്കോയാണ്, റഫറിയല്ല." എന്നായിരുന്നു അദ്ദേഹത്തിന്റെ പ്രതികരണം. 

"അവസാന ലോകകപ്പ് ഫൈനലിന് ശേഷം ഫ്രാൻസും അർജന്റീനയും തമ്മിൽ ചെറിയ തർക്കം ഉണ്ടായിരിക്കാം. പക്ഷേ അത് ഫുട്ബോളിന്റെ ഭാഗമാണ്. ഈ റഫറിമാർ ഇവിടെ എത്തിയിരിക്കുന്നത് അവരുടെ നിലവാരം കൊണ്ടാണ്." ഫ്രാൻസിന്റെ രണ്ടാം ഗോൾകീപ്പറായ റോബിൻ റിസർയും റഫറി സംഘത്തെ പിന്തുണച്ചു. 

മൊറോക്കോയ്ക്കും ആശങ്കയില്ല

ഫിഫയുടെ തീരുമാനത്തിൽ മൊറോക്കോ പരിശീലകനും ആശങ്ക പ്രകടിപ്പിച്ചില്ല. "നാളത്തെ മത്സരത്തിന് പരിചയസമ്പന്നനായ റഫറിയാണ് എത്തുന്നത്. ഇത്തരം വലിയ മത്സരങ്ങൾക്ക് അതുതന്നെയാണ് വേണ്ടത്. അതിനാൽ ഞങ്ങൾ പൂർണമായും ശാന്തരാണ്." നെതർലൻഡ്സിനെതിരായ മുൻ മത്സരത്തിൽ ഡച്ച് റഫറിയായിരുന്നു മത്സരം നിയന്ത്രിച്ചതെന്നും അദ്ദേഹം ഓർമിപ്പിച്ചു. "അന്ന് ഡച്ച് റഫറി മികച്ച പ്രകടനമാണ് കാഴ്ചവെച്ചത്. റഫറിമാർ എല്ലാവരും അവരുടെ ജോലി ഏറ്റവും മികച്ച രീതിയിൽ ചെയ്യാനാണ് ശ്രമിക്കുന്നത്. ഫ്രാൻസിനെതിരായ മത്സരത്തിലെ റഫറി എളുപ്പത്തിൽ കാർഡുകൾ പുറത്തെടുക്കാറില്ലെന്നത് കളിയെ സ്വാധീനിച്ചേക്കാം. എന്നാൽ അദ്ദേഹത്തിന്റെ നിലവാരത്തെക്കുറിച്ച് എനിക്ക് യാതൊരു സംശയവും ഇല്ല."

2022 സെമിഫൈനലിന്റെ ആവർത്തനം

വ്യാഴാഴ്ചത്തെ ക്വാർട്ടർ ഫൈനലിന് മറ്റൊരു പ്രത്യേകതയുമുണ്ട്. 2022 ലോകകപ്പ് സെമിഫൈനലിൽ മൊറോക്കോയുടെ ചരിത്ര മുന്നേറ്റം 2-0ന് അവസാനിപ്പിച്ച ഫ്രാൻസും മൊറോക്കോയും വീണ്ടും നേർക്കുനേർ എത്തുകയാണ്. നാല് വർഷങ്ങൾക്ക് ശേഷം ആ തോൽവിക്ക് മറുപടി പറയാനും വീണ്ടും സെമിഫൈനൽ ടിക്കറ്റ് ഉറപ്പിക്കാനും അറ്റ്‌ലസ് ലയൺസിന് ഇതൊരു വലിയ അവസരമാണ്.