വർഷങ്ങളുടെ കാത്തിരിപ്പിന് വിരാമമിട്ട് ലോക ഫുട്ബോളിന്റെ മഹാമേളയ്ക്ക് ഇനി മണിക്കൂറുകൾ മാത്രം. 2026 ഫിഫ ലോകകപ്പിന്റെ 23-ാം പതിപ്പിന് ഇന്ത്യൻ സമയം വെള്ളിയാഴ്ച പുലർച്ചെ 12.30ന് തുടക്കമാകും. ആതിഥേയ രാജ്യങ്ങളിലൊന്നായ മെക്സിക്കോയും ദക്ഷിണാഫ്രിക്കയും തമ്മിലുള്ള ഉദ്ഘാടന മത്സരത്തോടെയാണ് ടൂർണമെന്റിന് തിരശ്ശീല ഉയരുന്നത്. ജൂലൈ 19നാണ് ഫൈനൽ പോരാട്ടം.

ഇത്തവണ ലോകകപ്പ് ചരിത്രത്തിലെ ഏറ്റവും വലിയ മാറ്റങ്ങളോടെയാണ് അമേരിക്ക, കാനഡ, മെക്സിക്കോ എന്നീ മൂന്ന് രാജ്യങ്ങൾ ചേർന്ന് ടൂർണമെന്റിന് ആതിഥേയത്വം വഹിക്കുന്നത്. ആദ്യമായാണ് മൂന്ന് രാജ്യങ്ങൾ സംയുക്തമായി ലോകകപ്പ് സംഘടിപ്പിക്കുന്നത്. പങ്കെടുക്കുന്ന ടീമുകളുടെ എണ്ണവും മത്സരങ്ങളുടെ എണ്ണവും ഗണ്യമായി വർധിപ്പിച്ചതാണ് ഈ പതിപ്പിന്റെ പ്രധാന പ്രത്യേകത.

48 ടീമുകളാണ് ഇത്തവണ ലോകകപ്പിൽ മത്സരരംഗത്തുള്ളത്. 2022 ഖത്തർ ലോകകപ്പിൽ 32 ടീമുകളായിരുന്നു പങ്കെടുത്തത്. 1998ന് ശേഷം ആദ്യമായാണ് ലോകകപ്പിൽ ടീമുകളുടെ എണ്ണം വർധിപ്പിക്കുന്നത്.

സമ്മാനത്തുകയിലും ഫിഫ പുതിയ റെക്കോർഡ് കുറിച്ചിരിക്കുകയാണ്. മുൻ ലോകകപ്പിനെ അപേക്ഷിച്ച് ഏകദേശം 50 ശതമാനം വർധനവോടെ ആകെ സമ്മാനത്തുക 655 മില്യൺ യുഎസ് ഡോളറിലെത്തിച്ചു. ഇന്ത്യൻ കറൻസിയിൽ ഇത് ഏകദേശം 5,620 കോടി രൂപയാണ്. ലോകകപ്പിൽ പങ്കെടുക്കുന്ന 48 ടീമുകൾക്കായി മൊത്തം 727 മില്യൺ യുഎസ് ഡോളർ (ഏകദേശം 6,240 കോടി രൂപ) ഫിഫ മാറ്റിവെച്ചിട്ടുണ്ട്.

ലോകകപ്പ് കിരീടം സ്വന്തമാക്കുന്ന ടീമിന് 50 മില്യൺ യുഎസ് ഡോളർ, അതായത് ഏകദേശം 429 കോടി രൂപ ലഭിക്കും. റണ്ണറപ്പാകുന്ന ടീമിന് 33 മില്യൺ യുഎസ് ഡോളർ (ഏകദേശം 283 കോടി രൂപ) ലഭിക്കുമ്പോൾ മൂന്നാം സ്ഥാനക്കാർക്ക് 29 മില്യൺ യുഎസ് ഡോളർ (ഏകദേശം 249 കോടി രൂപ) സമ്മാനമായി ലഭിക്കും. യോഗ്യത നേടിയ ഓരോ ടീമിനും ചെലവുകൾക്കായി 1.5 മില്യൺ യുഎസ് ഡോളർ (ഏകദേശം 12.9 കോടി രൂപ) വീതവും നൽകും.

2026 ഫിഫ ലോകകപ്പ് സമ്മാനത്തുക (ഇന്ത്യൻ രൂപയിൽ)

ചാമ്പ്യൻമാർ – 429 കോടി രൂപ
റണ്ണറപ്പ് – 283 കോടി രൂപ
മൂന്നാം സ്ഥാനം – 249 കോടി രൂപ
നാലാം സ്ഥാനം – 232 കോടി രൂപ
അഞ്ച് മുതൽ എട്ട് വരെ സ്ഥാനങ്ങൾ – 163 കോടി രൂപ വീതം
ഒമ്പത് മുതൽ 16 വരെ സ്ഥാനങ്ങൾ – 129 കോടി രൂപ വീതം
17 മുതൽ 32 വരെ സ്ഥാനങ്ങൾ – 94 കോടി രൂപ വീതം
33 മുതൽ 48 വരെ സ്ഥാനങ്ങൾ – 77 കോടി രൂപ വീതം

ലോകകപ്പിൽ ആദ്യ റൗണ്ടിൽ തന്നെ പുറത്താകുന്ന ടീമുകൾക്കും ഇത്തവണ കോടികളുടെ പ്രതിഫലമാണ് ലഭിക്കുക. അതോടെ ലോക ഫുട്ബോളിലെ ഏറ്റവും സമ്പന്നമായ ടൂർണമെന്റായി 2026 ഫിഫ ലോകകപ്പ് മാറുകയാണ്.