ദോഹ: ഖത്തറിൽ നടക്കാനിരിക്കുന്ന ഫിഫ അണ്ടർ-17 ലോകകപ്പ് 2026-ന്റെ എല്ലാ ഒരുക്കങ്ങളും പൂർത്തിയായതായി ടൂർണമെന്റ് ലോക്കൽ ഓർഗനൈസിംഗ് കമ്മിറ്റി സി.ഇ.ഒ ജാസിം അൽ ജാസിം അറിയിച്ചു. മത്സരങ്ങൾ ആരംഭിക്കുന്നതിന് മുന്നോടിയായി സ്റ്റേഡിയങ്ങളും മറ്റ് അനുബന്ധ സൗകര്യങ്ങളും പങ്കെടുക്കുന്ന ടീമുകളെ സ്വീകരിക്കാൻ പൂർണ്ണസജ്ജമാണെന്ന് അദ്ദേഹം വ്യക്തമാക്കി.
ഖത്തർ തുടർച്ചയായി ആതിഥേയത്വം വഹിക്കുന്ന അഞ്ച് ലോകകപ്പ് പതിപ്പുകളിലെ രണ്ടാമത്തെ ടൂർണമെന്റാണിത്. നവംബർ 19-ന് ആരംഭിക്കുന്ന ടൂർണമെന്റിൽ ആകെ 104മത്സരങ്ങളാണുള്ളത്. ഇതിൽ 103 മത്സരങ്ങളും ആസ്പയർ സോണിലെ (Aspire Zone) വിവിധ മൈതാനങ്ങളിൽ നടക്കുമ്പോൾ, ഡിസംബർ 13-ന് നടക്കുന്ന കലാശപ്പോരാട്ടത്തിന് (ഫൈനൽ) അഹമ്മദ് ബിൻ അലി സ്റ്റേഡിയം വേദിയാകും. ടൂർണമെന്റിൽ പങ്കെടുക്കുന്ന ഒൻപത് ടീമുകൾ ഇതിനോടകം ദോഹയിലെത്തിക്കഴിഞ്ഞു. മത്സരങ്ങൾ ആരംഭിക്കുന്നതിന് രണ്ട് ദിവസം മുൻപ് തന്നെ ബാക്കിയുള്ള എല്ലാ ടീമുകളും ഖത്തറിലെത്തുമെന്നും അധികൃതർ അറിയിച്ചു. കഴിഞ്ഞ പതിപ്പിന്റെ വൻ വിജയത്തിന് ശേഷം, ഇത്തവണയും മികച്ച നിലവാരത്തിൽ ടൂർണമെന്റ് സംഘടിപ്പിക്കാനാണ് ലക്ഷ്യമിടുന്നത്.മേഖലയിലെ സുരക്ഷാ സാഹചര്യങ്ങളെക്കുറിച്ച് ആശങ്കപ്പെടേണ്ടതില്ലെന്നും പങ്കെടുക്കുന്ന ടീമുകളുടെയും ആരാധകരുടെയും സുരക്ഷയ്ക്കാണ് പ്രഥമ പരിഗണനയെന്നും ജാസിം അൽ ജാസിം ഉറപ്പുനൽകി. ദോഹ പൂർണ്ണമായും സുരക്ഷിതമാണെന്നും, കഴിഞ്ഞ വാരാന്ത്യത്തിൽ മോട്ടോ ജിപി (MotoGP) മത്സരങ്ങൾ, ലോക പാഡൽ ചാമ്പ്യൻഷിപ്പ്, ഐക്യരാഷ്ട്രസഭയുടെ സമ്മേളനങ്ങൾ എന്നിവ യാതൊരു തടസ്സവുമില്ലാതെ ഇവിടെ നടന്നതായും അദ്ദേഹം ചൂണ്ടിക്കാട്ടി.
ടൂർണമെന്റിൽ അറബ് ടീമുകൾ മികച്ച പ്രകടനം കാഴ്ചവെക്കുമെന്ന് പ്രതീക്ഷിക്കുന്നതായി അദ്ദേഹം പറഞ്ഞു. കഴിഞ്ഞ പതിപ്പിൽ മൊറോക്കോയും ഈജിപ്തും മികച്ച പ്രകടനം നടത്തിയിരുന്നു. കഴിഞ്ഞ ടൂർണമെന്റിലൂടെ ശ്രദ്ധേയനായി പിന്നീട് ബാഴ്‌സലോണയിലേക്ക് ചേക്കേറിയ ഈജിപ്ഷ്യൻ താരം ഹംസ അബ്ദുൽകരീമിനെപ്പോലുള്ള പ്രതിഭകൾ ഇത്തവണയും ഉയർന്നുവരുമെന്നാണ് പ്രതീക്ഷിക്കുന്നത്. മുൻകൂട്ടി നിശ്ചയിച്ച പ്രകാരം എല്ലാ കാര്യങ്ങളും കൃത്യമായി മുന്നോട്ട് പോകുന്നുണ്ടെന്നും, രണ്ടാം വീടായ ഖത്തറിലേക്ക് എല്ലാ ടീമുകളെയും പ്രതിനിധികളെയും സ്വാഗതം ചെയ്യുന്നതായും അദ്ദേഹം കൂട്ടിച്ചേർത്തു.
