​തിരുവനന്തപുരം: ഭരണത്തിലേറി അഞ്ച് മാസം പിന്നിടും മുമ്പേ യു.ഡി.എഫിൽ അശാന്തിയുടെ കാർമേഘങ്ങൾ പടരുന്നു. മുന്നണി കൺവീനർ അടൂർ പ്രകാശിന്റെ വിമർശനങ്ങളും, മാസപ്പടിക്കേസിൽ സർക്കാരിന്റെ തണുപ്പൻ സമീപനത്തിനെതിരെയുള്ള മാത്യു കുഴൽനാടൻ എം.എൽ.എയുടെ നിലപാടുകളും കോൺഗ്രസിലും യു.ഡി.എഫിലും വലിയ രാഷ്ട്രീയ പോരിന് കളമൊരുക്കിയിരിക്കുകയാണ്.
​സ്വകാര്യ ടി.വി അഭിമുഖത്തിൽ അടൂർ പ്രകാശ് നടത്തിയ പരാമർശങ്ങൾ മന്ത്രി കെ. മുരളീധരൻ ഏറ്റുപിടിച്ചതോടെയാണ് മുന്നണിയിലെ ഭിന്നത പരസ്യമായത്. മുഖ്യമന്ത്രി പിണറായി വിജയനെതിരെ നിരന്തരം ആരോപണങ്ങൾ ഉന്നയിക്കുന്നതിന് പിന്നിൽ കർട്ടന് പിറകിൽ ആളുണ്ടെന്നായിരുന്നു മുരളീധരന്റെ പ്രസ്താവന. "ആണുങ്ങളുടെ സർക്കാരാണെങ്കിൽ പിണറായിക്കെതിരായ കേസിൽ ഉചിതമായ നടപടിയെടുക്കും" എന്ന മുതിർന്ന നേതാവ് കെ. സുധാകരന്റെ പരാമർശത്തെയും അദ്ദേഹം പരിഹസിച്ചു.
​പരസ്യ പ്രസ്താവനകൾ പാർട്ടിയെ പ്രതിരോധത്തിലാക്കുമെന്ന് കണ്ട്, നേതാക്കൾ ആരും വിവാദ പ്രസ്താവനകൾ നടത്തരുതെന്ന് കെ.പി.സി.സി പ്രസിഡന്റ് സണ്ണി ജോസഫിന് ഇന്നലെ കർശന നിർദ്ദേശം നൽകേണ്ടി വന്നു.സർക്കാർ തീരുമാനങ്ങൾ താൻ അറിയുന്നില്ലെന്ന പരാതി എ.ഐ.സി.സി അദ്ധ്യക്ഷൻ മല്ലികാർജ്ജുൻ ഖർഗെയ്ക്ക് കൈമാറിയ ശേഷമാണ് അടൂർ പ്രകാശ് തന്റെ നിലപാട് ആവർത്തിച്ചത്.
​ പാർട്ടി ചട്ടക്കൂടിനുള്ളിൽ നിൽക്കുന്നയാളാണ് താനെന്നും, ചട്ടക്കൂടിന് പുറത്തുപോയി പാർട്ടി കെട്ടിപ്പടുക്കാൻ ശ്രമിച്ച ചരിത്രമില്ലെന്നുമുള്ള അടൂർ പ്രകാശിന്റെ പരാമർശമാണ് മുരളീധരനെ ചൊടിപ്പിച്ചത്.
 മാസപ്പടിക്കേസിൽ കുഴൽനാടന്റെ നിലപാടിനെ പിന്തുണച്ച് കെ.കെ. രമ രംഗത്തെത്തി. ബോർഡ്, കോർപ്പറേഷൻ പുനഃസംഘടന വൈകുന്നതിലും ചില ഘടകകക്ഷികൾക്ക് കടുത്ത പ്രതിഷേധമുണ്ട്.
​ മാസപ്പടിക്കേസ് വിവാദത്തിൽ പരസ്യ സംവാദത്തിനില്ലെന്ന് വ്യക്തമാക്കിയ സ്പീക്കർ തിരുവഞ്ചൂർ രാധാകൃഷ്ണൻ, ഉമ്മൻചാണ്ടി നമ്മുടെയെല്ലാം ഹൃദയത്തിന്റെ ഭാഗമാണെന്ന് ഓർമ്മിപ്പിച്ചു. സർക്കാരിന്റെ നടപടിയിലെ നിലപാട് പാർട്ടി ഫോറത്തിൽ പറയുമെന്നും അദ്ദേഹം വ്യക്തമാക്കി.
​ മുഖ്യമന്ത്രിയെ പിന്നിൽ നിന്ന് കുത്തുന്നവർ അനുഭവങ്ങളിൽ നിന്ന് പാഠം പഠിക്കാത്തവരാണെന്ന് ഐ.എൻ.ടി.യു.സി സംസ്ഥാന അദ്ധ്യക്ഷൻ  കുറിച്ചത് മുന്നണിയിലെ ചേരിപ്പോരിന്റെ ആഴം കൂട്ടുന്നു.
​എല്ലാവരുടെയും ആക്രമണത്തിന്റെ കുന്തമുന മുഖ്യമന്ത്രിയിലേക്ക് നീളുന്നതിനിടയിൽ, വിവാദങ്ങളുടെ സൂത്രധാരനായി മുഖ്യമന്ത്രിയെ അനുകൂലിക്കുന്നവർ സംശയിക്കുന്നത് കെ.സി. വേണുഗോപാലിനെയാണ്.  മുന്നണിക്കുള്ളിലെ ഈ ചേരിപ്പോര് വരും ദിവസങ്ങളിൽ കൂടുതൽ രാഷ്ട്രീയ ചർച്ചകൾക്ക് വഴിവെക്കുമെന്നുറപ്പാണ്.