ദോഹ:ഖത്തർ കലണ്ടറിന്റെ സെപ്റ്റംബർ മാസത്തെ വർണ്ണാഭമായ ആഘോഷരാവുകൾക്ക് തിരിതെളിഞ്ഞു. കലയും കായികവും വിനോദവും വ
 കൈകോർക്കുന്ന  സാംസ്‌കാരിക വസന്തം സ്വദേശികൾക്കും പ്രവാസികൾക്കും ഒരുപോലെ മനോഹരമായ അനുഭവങ്ങളുടെ പെരുമഴക്കാലമാണ് സമ്മാനിക്കുന്നത്.
​സംഗീതത്തിന്റെ മർമ്മരങ്ങളും വിനോദത്തിന്റെ വർണ്ണപ്പകിട്ടും നിറഞ്ഞ കുടുബസംഗമങ്ങൾക്ക് കത്താറയും ദോഹ ഫെസ്റ്റിവൽ സിറ്റിയും അൽ ഹസവും വേദിയാകുന്നു. അൽ ഹസത്തിലെ 'മിനാ വ ഫിനാ'യും കത്താറയിലെ 'കളർവേഴ്‌സ്' അനുഭവങ്ങളും കുരുന്നുകൾക്കും മുതിർന്നവർക്കും ഒരുപോലെ ആനന്ദത്തിന്റെ അവിസ്മരണീയ മുഹൂർത്തങ്ങൾ സമ്മാനിക്കും.
​കായികപ്രേമികളുടെ നെഞ്ചിടിപ്പേറ്റാൻ വെയ്റ്റ്‌ലിഫ്റ്റിംഗ് ചാമ്പ്യൻഷിപ്പും പീനിക്‌സ് ഗെയിംസും ഖലീഫ ഇന്റർനാഷണൽ കോംപ്ലക്‌സിൽ നടക്കുന്ന ഏഷ്യൻ ജൂനിയർ ടെന്നീസും ഖത്തർ ക്ലാസിക് സ്‌ക്വാഷും അരങ്ങുണർത്തിക്കഴിഞ്ഞു. കായികലോകത്തെ വിസ്മയങ്ങൾക്കായി കാത്തിരിക്കുന്ന കായികപ്രേമികൾക്ക് ആവേശത്തിന്റെ കൊടുമുടി തീർക്കുകയാണ് ഈ മത്സരോത്സവങ്ങൾ.
​പൈതൃകത്തിന്റെയും സംസ്‌കാരത്തിന്റെയും വശ്യത തുളുമ്പുന്ന ഇസ്ലാമിക് ആർട്ട് മ്യൂസിയത്തിലെ എക്‌സിബിഷനുകളും, വേട്ടയാടലിന്റെയും പരുന്തുവളർത്തലിന്റെയും ചരിത്രവും ഗാംഭീര്യവും വിളിച്ചോതുന്ന പത്താമത് 'സുഹൈൽ' എക്‌സിബിഷനും ദോഹയുടെ സാംസ്‌കാരിക വേരുകളിലേക്ക് സന്ദർശികരെ ആവാഹിക്കുന്നു. ജാസ് സംഗീതത്തിലെ കുയിൽനാദമായ ജോൺ ലെജൻഡിന്റെ സംഗീതസായാഹ്നവും, പിങ്ക് ഫ്ലോയ്ഡ് ലെഗസിയുടെ റോക്ക് ഈണങ്ങളും, ചിരിയുടെ മണിമുഴക്കവുമായി എത്തുന്ന ഹാസ്യസന്ധ്യകളും ദോഹയുടെ രാത്രികളെ സാന്ദ്രമാക്കും.​ഭാവിസാങ്കേതികവിദ്യയുടെയും വ്യവസായത്തിന്റെയും പുതിയ വാതിലുകൾ തുറന്നുകൊണ്ട് ഫിൻടെക് എക്‌സ്പോയും ഗൂഗിൾ ക്ലൗഡ് ഉച്ചകോടിയും അരങ്ങേറുമ്പോൾ, രത്നങ്ങളുടെയും ആഭരണങ്ങളുടെയും മിന്നലാട്ടവുമായി ദോഹ ജ്വല്ലറി ആന്റ് വാച്ചസ് എക്‌സിബിഷനും അൽ ഹസം ഗാലറിയയിലെ സീനത്ത എക്‌സിബിഷനും നഗരത്തിന് രാജകീയ പ്രൗഢിയേകുന്നു.
​മരുഭൂമിയിൽ പൂത്തുലയുന്ന ഈ വിസ്മയവസന്തം ദോഹയുടെ തെരുവുകളിൽ ആനന്ദത്തിന്റെ പുതുവർണ്ണങ്ങൾ ചാർത്തുകയാണ്.