ദോഹ: കേവലമൊരു വിനോദത്തിനപ്പുറം ആത്മവിശ്വാസത്തിന്റെയും സൗഹൃദത്തിന്റെയും സമുദ്രസംരക്ഷണത്തിന്റെയും പ്രതീകമായി സ്കൂബാ ഡൈവിംഗിനെ നെഞ്ചിലേറ്റിയ ഖത്തറിലെ വനിതാ ഡൈവർമാർ നാളെ (ജൂലൈ 18) അന്താരാഷ്ട്ര 'പാഡി വിമൻസ് ഡൈവ് ഡേ' ആഘോഷിക്കും. "കൂട്ടായ്മയെ ആഘോഷിക്കുക, മാറ്റങ്ങൾ സൃഷ്ടിക്കുക" (Celebrate Community. Create Change) എന്ന പ്രമേയത്തിലാണ് ഈ വർഷത്തെ ലോകവ്യാപക ആഘോഷങ്ങൾ നടക്കുന്നത്.
​ജൂലൈയിലെ മൂന്നാമത്തെ ശനിയാഴ്ചയാണ് സ്കൂബാ ഡൈവിംഗ് രംഗത്ത് സ്ത്രീകളുടെ പങ്കാളിത്തം ഉറപ്പാക്കാനും സമുദ്രസംരക്ഷണം പ്രോത്സാഹിപ്പിക്കാനുമായി പ്രൊഫഷണൽ അസോസിയേഷൻ ഓഫ് ഡൈവിംഗ് ഇൻസ്ട്രക്ടേഴ്സ് (PADI) ഈ ദിനമായി ആചരിക്കുന്നത്. 2015-ൽ തുടക്കം കുറിച്ച ഈ കൂട്ടായ്മ ഇന്ന് 180-ലധികം രാജ്യങ്ങളിലേക്ക് വ്യാപിച്ചു കഴിഞ്ഞു.
ആഘോഷങ്ങളുടെ ഭാഗമായി ഖത്തറിലെ സമുദ്രസംരക്ഷണ കൂട്ടായ്മയായ 'സീസ്റ്റേഴ്സ് ഇൻ ആക്ഷൻ' (SEAsters-in-Action) സീലൈൻ ബീച്ചിൽ രണ്ടാമത് സമുദ്ര ശുചീകരണ ഡൈവിംഗ് സംഘടിപ്പിക്കാൻ തീരുമാനിച്ചിരുന്നു. എന്നാൽ രാജ്യത്തെ ഔദ്യോഗിക ദുഃഖാചരണത്തിന്റെ പശ്ചാത്തലത്തിലും സുരക്ഷ മുൻനിർത്തിയും ഇത് താൽക്കാലികമായി മാറ്റിവെച്ചു. പകരം പരസ്പരം ബന്ധപ്പെടാനും പുതിയ ഡൈവർമാരെ സ്വാഗതം ചെയ്യാനും ലക്ഷ്യമിട്ട് വനിതകൾക്കായി പ്രത്യേക വിനോദ ഡൈവിംഗ് (Recreational Dive) സംഘടിപ്പിക്കും.
ഖത്തറിലെ ഈ വനിതാ കൂട്ടായ്മയുടെ അമരക്കാരിയും 'സീസ്റ്റേഴ്സ് ഇൻ ആക്ഷൻ' സ്ഥാപകയുമായ മിഷേൽ ആൻ "മീച്ച്" ഡെൽ കാർമന്റെ ജീവിതം തന്നെ വലിയൊരു പ്രചോദനമാണ്.
​"ഖത്തറിലെത്തുമ്പോൾ എനിക്ക് നന്നായി നീന്താൻ പോലും അറിയില്ലായിരുന്നു, തുറന്ന കടലിനെ പേടിയുമായിരുന്നു. അന്നാരെങ്കിലും ഞാൻ സ്കൂബാ ഡൈവിംഗ് ഇൻസ്ട്രക്ടറാകുമെന്ന് പറഞ്ഞിരുന്നെങ്കിൽ ഞാൻ വിശ്വസിക്കില്ലായിരുന്നു," മീച്ച് ഓർക്കുന്നു. 2021-ൽ ആദ്യമായി കടലിനടിയിലെ ലോകം കണ്ട മീച്ച്, ഭയത്തെ അതിജീവിച്ച് മുന്നേറുകയും 2025 മേയിൽ ഒഫീഷ്യൽ 'പാഡി ഇൻസ്ട്രക്ടർ' പദവി നേടുകയും ചെയ്തു. തനിക്ക് കടലും ഇവിടുത്തെ സൗഹൃദക്കൂട്ടായ്മയും നൽകിയ അതേ ആത്മവിശ്വാസം മറ്റ് സ്ത്രീകൾക്കും പകർന്നുനൽകാനാണ് അവർ 'സീസ്റ്റേഴ്സ് ഇൻ ആക്ഷൻ' രൂപീകരിച്ചത്.
​ഈ മുന്നേറ്റത്തിന് പിന്നിൽ ഒപ്പമുള്ള സഹ സംഘാടകരായ മാർഗോ ഡി പോവ് (PADI Divemaster), നുഷി കന്ദയ്യ (Advanced Open Water diver) എന്നിവരുടെ കഠിനാധ്വാനവുമുണ്ട്.
​ക്യാപ്റ്റൻ സ്വാലിഹ് അൽ മസ്റൂയി, അമൻഡിയോ നൂനസ് എന്നിവരടക്കം ഈ സംരംഭത്തെ പിന്തുണച്ച വ്യക്തികൾക്കും സംഘടനകൾക്കും സംഘാടകർ നന്ദി അറിയിച്ചു. കടലിന്റെ ആഴങ്ങളിലേക്ക് ഇറങ്ങാൻ ആഗ്രഹിക്കുന്ന എല്ലാ വനിതകളെയും അവർ സ്വാഗതം ചെയ്തു. വലിയൊരു മാറ്റത്തിന്റെ തുടക്കത്തിന് കനത്ത ധൈര്യമല്ല, മറിച്ച് വെള്ളത്തിനടിയിലെ ആദ്യത്തെ ശ്വാസമെടുക്കാനുള്ള ഒരു ചെറിയ മനസ്സ് മാത്രം മതിയെന്നാണ് ഇവരുടെ സന്ദേശം.