ദോഹ: ഉമ്മു സലാൽ മേഖലയിലെ പ്രമുഖ ഫ്രഷ് ഫുഡ് മാർക്കറ്റുകളിലൊന്നായ അൽ മസ്റൂഅ (Al-Mazroua) മീൻ മാർക്കറ്റിലെ ക്ലീനിംഗ് സെക്ഷനിൽ അനുഭവപ്പെടുന്ന കടുത്ത തിരക്കും കെടുകാര്യസ്ഥതയും ഉപഭോക്താക്കളെ വലയ്ക്കുന്നു. ആളുകൾ ക്യൂ പാലിക്കാത്തതും ടോക്കൺ നമ്പറിംഗ് സിസ്റ്റം കൃത്യമായി നടപ്പിലാക്കാത്തതും കാരണം വലിയ രീതിയിലുള്ള തർക്കങ്ങളും മണിക്കൂറുകളോളം നീളുന്ന കാലതാമസവുമാണ് ഇവിടെ അനുഭവപ്പെടുന്നതെന്ന് പ്രാദേശിക പത്രം റിപ്പോർട്ട് ചെയ്യുന്നു.
പ്രത്യേകിച്ച് വാരാന്ത്യങ്ങളിൽ (Weekends) മാർക്കറ്റിൽ എത്തുന്ന കുടുംബങ്ങളും പ്രായമായവരും ഇവിടുത്തെ സൌകര്യക്കുറവ് മൂലം ഏറെ ബുദ്ധിമുട്ടുന്നുണ്ട്. ആവശ്യത്തിന് ജീവനക്കാർ ഇല്ലാത്തതാണ് തിരക്ക് വർദ്ധിക്കാൻ പ്രധാന കാരണം. മത്സ്യം വൃത്തിയാക്കാൻ മാത്രം ചിലർക്ക് ഒന്നര മുതൽ രണ്ട് മണിക്കൂർ വരെ കാത്തുനിൽക്കേണ്ടി വരുന്നു.വിപണിയിലെ സേവനങ്ങളുടെ ഗുണനിലവാരം ഉയർത്തുന്നതിനും ഉപഭോക്താക്കളുടെ യാത്ര സുഗമമാക്കുന്നതിനും ബന്ധപ്പെട്ട അധികാരികൾ എത്രയും വേഗം ഈ വിഷയത്തിൽ ഇടപെടണമെന്ന് നാട്ടുകാരും പ്രവാസികളും ഒരേപോലെ ആവശ്യപ്പെടുന്നു.
