​ദോഹ: റിയൽ എസ്റ്റേറ്റ് കോഡിംഗ് (Real Estate Coding) അഥവാ ടോക്കണൈസേഷൻ നടപ്പിലാക്കുന്നതിലൂടെ കുറഞ്ഞ മൂലധനമുള്ള സാധാരണക്കാർക്കും റിയൽ എസ്റ്റേറ്റ് രംഗത്തേക്ക് കടന്നുവരാൻ വഴിയൊരുങ്ങുമെന്ന് പ്രമുഖ റിയൽ എസ്റ്റേറ്റ് വിദഗ്ദ്ധനും മൂല്യനിർണ്ണയക്കാരനുമായ ഡോ. നായിഫ് മുഹമ്മദ് അൽ-ദോസരി വ്യക്തമാക്കി.പ്രാദേശിക പത്രത്തിന് നൽകിയ അഭിമുഖത്തിലാണ് അദ്ദേഹം ഈ നിരീക്ഷണം പങ്കുവെച്ചത്.പരമ്പരാഗതമായി വൻകിട നിക്ഷേപകർക്ക് മാത്രം സാധ്യമായിരുന്ന റിയൽ എസ്റ്റേറ്റ് വിപണിയിലേക്ക്, ഇനി കുറഞ്ഞ മൂലധനമുള്ള പ്രാദേശിക-വിദേശ നിക്ഷേപകർക്കും എളുപ്പത്തിൽ കടന്നുവരാൻ ഇതിലൂടെ സാധിക്കും.
ഇത്തരം പങ്കാളിത്ത നിക്ഷേപങ്ങൾക്ക് നിയമപരമായ പരിരക്ഷ ഉറപ്പുനൽകുന്നുണ്ട്. ഇത് നിക്ഷേപകരുടെ ആസ്തി സുരക്ഷിതമാക്കുന്നതിനൊപ്പം, ഒന്നിലധികം പ്രോപ്പർട്ടികളിലായി നിക്ഷേപം നടത്തി നഷ്ടസാധ്യത (Risk) കുറയ്ക്കാനും സഹായിക്കും.രജിസ്ട്രേഷൻ ഫീസ്, ബ്രോക്കറേജ് കമ്മീഷനുകൾ തുടങ്ങിയവ ഒഴിവാകുന്നതിനാൽ ഇടപാട് ചിലവുകൾ ഗണ്യമായി കുറയുന്നു. ഒപ്പം വിപണിയിൽ പണലഭ്യതയും (Liquidity) വർദ്ധിക്കുന്നു.പരമ്പരാഗത റിയൽ എസ്റ്റേറ്റ് രീതികളിൽ നിന്ന് ഫിൻടെക് (FinTech) അധിഷ്ഠിത ഡിജിറ്റൽ ഗവേണൻസിലേക്കുള്ള വലിയൊരു ചുവടുവെപ്പാണിത്. ആസ്തികളിൽ മാറ്റമില്ലാതെ തന്നെ, നിക്ഷേപ രീതികളിൽ വിപ്ലവകരമായ മാറ്റങ്ങൾ കൊണ്ടുവരാൻ ഇത് വഴിയൊരുക്കുന്നു.നേരത്തെയുണ്ടായിരുന്ന സംയുക്ത ഉടമസ്ഥാവകാശ (Joint Ownership) സങ്കൽപ്പത്തിന്റെ ആധുനിക രൂപമാണിതെന്നും, സൗദി അറേബ്യയിലും യു.എ.ഇയിലും നിലവിൽ ഇത് വിജയകരമായി നടപ്പിലാക്കി വരുന്നുണ്ടെന്നും ഡോ. നായിഫ് കൂട്ടിച്ചേർത്തു.