തിരുവനന്തപുരം: എക്സൈസ് വകുപ്പിലെ ഉന്നത ഉദ്യോഗസ്ഥർക്കെതിരെ ഗുരുതരമായ അഴിമതി ആരോപണങ്ങളുമായി എക്സൈസ് കമ്മീഷണർ സീറാം സാംബശിവ റാവുവിന്റെ റിപ്പോർട്ട്. ജോയിന്റ് എക്സൈസ് കമ്മീഷണർ എസ്. വിനോദ്, ഡെപ്യൂട്ടി കമ്മീഷണർ അജയ് എന്നിവർക്കെതിരെ മാസപ്പടി, കൈക്കൂലി, വരുമാനത്തിൽ കവിഞ്ഞ സ്വത്ത് സമ്പാദനം, ബിനാമി ഇടപാടുകൾ തുടങ്ങിയ ആരോപണങ്ങളാണ് റിപ്പോർട്ടിലുള്ളത്. ഇരുവർക്കുമെതിരെ വിജിലൻസ് അന്വേഷണം നടത്തണമെന്ന് ആവശ്യപ്പെട്ട് കമ്മീഷണർ സർക്കാരിന് റിപ്പോർട്ട് കൈമാറി.

മൂവാറ്റുപുഴയിലെ ഗംഗാ ബാറുമായി ബന്ധപ്പെട്ടാണ് എസ്. വിനോദിനെതിരായ പ്രധാന ആരോപണം. ബാർ ഉടമയുമായി അടുത്ത ബന്ധം പുലർത്തിയിരുന്ന അദ്ദേഹം ലൈസൻസ് സംബന്ധമായ കാര്യങ്ങളിൽ ഇടനിലക്കാരനായി പ്രവർത്തിച്ചെന്നും ബാറിൽനിന്ന് 50,000 രൂപ കൈപ്പറ്റിയെന്നുമാണ് റിപ്പോർട്ടിലെ കണ്ടെത്തൽ.

കായംകുളം കറ്റച്ചിറയിലെ റോമ സെന്റർ ബാറിൽ പരിശോധനയ്ക്കായി എത്തുമ്പോൾ ഡെപ്യൂട്ടി കമ്മീഷണർ അജയ് ഉടമയിൽനിന്ന് കൈക്കൂലി വാങ്ങിയിരുന്നുവെന്നും റിപ്പോർട്ടിൽ ആരോപിക്കുന്നു. റോമ സെന്റർ ബാറുമായി എക്സൈസ് മന്ത്രിക്ക് അടുത്ത ബന്ധമുണ്ടെന്ന പരാമർശവും കമ്മീഷണറുടെ റിപ്പോർട്ടിലുണ്ട്.

ഇരുവരെയും അടിയന്തരമായി ഫീൽഡ് ചുമതലകളിൽനിന്ന് മാറ്റണമെന്നാണ് കമ്മീഷണറുടെ ശുപാർശ. മാസപ്പടി വാങ്ങൽ, അനധികൃത സ്വത്ത് സമ്പാദനം, ബിനാമി ഇടപാടുകൾ എന്നിവ സംബന്ധിച്ച് അഴിമതി നിരോധന നിയമപ്രകാരം വിശദമായ വിജിലൻസ് അന്വേഷണം നടത്തണമെന്നും റിപ്പോർട്ടിൽ ആവശ്യപ്പെടുന്നു.

പടിയിറങ്ങുന്നതിന് തൊട്ടുമുമ്പ് കമ്മീഷണർ സർക്കാരിന് സമർപ്പിച്ച റിപ്പോർട്ടിലെ വെളിപ്പെടുത്തലുകൾ എക്സൈസ് വകുപ്പിൽ വലിയ വിവാദത്തിന് വഴിവെച്ചിരിക്കുകയാണ്. റിപ്പോർട്ടിലെ വിവരങ്ങൾ വാർത്താ ചാനലുകളും പുറത്തുവിട്ടിട്ടുണ്ട്. ആരോപണങ്ങളിൽ ബന്ധപ്പെട്ട ഉദ്യോഗസ്ഥരുടെയോ മന്ത്രിയുടെയോ വിശദീകരണം ലഭ്യമായിട്ടില്ല.