​ദോഹ: പൊതുസുരക്ഷ ഉറപ്പാക്കുന്നതിനും ജനജീവിതത്തിന് തടസ്സമാകുന്ന ശബ്ദമലിനീകരണം നിയന്ത്രിക്കുന്നതിനുമായി വാഹനങ്ങളുടെ ശബ്ദപരിധിയിൽ കർശന നിർദ്ദേശങ്ങളുമായി ഖത്തർ ആഭ്യന്തര മന്ത്രാലയം. നിയമം ലംഘിക്കുന്ന വാഹനങ്ങൾക്കെതിരെ കർശനമായ നിയമനടപടികൾ സ്വീകരിക്കുമെന്ന് മന്ത്രാലയം മുന്നറിയിപ്പ് നൽകി.
​പുതിയ ഉത്തരവ് പ്രകാരം വാഹനങ്ങളിൽ നിന്നുള്ള ശബ്ദം 79 ഡെസിബെല്ലിൽ (dB) കൂടാൻ പാടില്ല. ഖത്തർ ജനറൽ ഓർഗനൈസേഷൻ ഫോർ സ്റ്റാൻഡേർഡ്സ് ആൻഡ് മെട്രോളജി അംഗീകരിച്ച മാനദണ്ഡങ്ങൾക്കനുസരിച്ചാണിത്.സ്പോർട്സ് കാറുകൾ, സാധാരണ കാറുകൾ, മോട്ടോർ സൈക്കിളുകൾ എന്നിങ്ങനെ എല്ലാ വിഭാഗം വാഹനങ്ങൾക്കും ഈ നിയമം ഒരുപോലെ ബാധകമാണ്. സ്പോർട്സ് വാഹനമായതുകൊണ്ട് ശബ്ദപരിധിയിൽ ഇളവ് ലഭിക്കില്ല.ഹാൻഡ്‌ഹെൽഡ് ഉപകരണങ്ങൾ, ശബ്ദം തിരിച്ചറിയുന്ന അത്യാധുനിക റഡാറുകൾ എന്നിവ ഉപയോഗിച്ച് ശബ്ദപരിധി അളക്കും. 'ഫഹസ്' (Fahes) സാങ്കേതിക പരിശോധനയിൽ വിജയിക്കണമെങ്കിൽ ഈ മാനദണ്ഡം പാലിച്ചിരിക്കണം.വാഹനത്തിന്റെ എക്സോസ്റ്റ് സിസ്റ്റത്തിൽ മാറ്റം വരുത്തുക, മഫ്ലറുകൾ നീക്കം ചെയ്യുക, ശബ്ദം വർദ്ധിപ്പിക്കാനായി പ്രത്യേക പ്രോഗ്രാമിംഗുകൾ നടത്തുക എന്നിവ കുറ്റകരമാണ്.അംഗീകൃത ഡീലർമാർ വഴി ലഭിക്കുന്ന വാഹനങ്ങളും നിശ്ചിത മാനദണ്ഡങ്ങൾ പാലിക്കുന്നുണ്ടെന്ന് ഉടമകൾ ഉറപ്പുവരുത്തണം. ശബ്ദപരിധി കൂടുതലാണെങ്കിൽ ഡീലർമാരെ സമീപിച്ച് ആവശ്യമായ മാറ്റങ്ങൾ വരുത്തേണ്ടതാണ്.
​വാണിജ്യ വ്യവസായ മന്ത്രാലയത്തിന്റെ 2023-ലെ മൂന്നാം നമ്പർ സർക്കുലർ പ്രകാരമാണ് ഈ നടപടികൾ നടപ്പിലാക്കുന്നത്. പൊതുസമാധാനം തകർക്കുന്ന രീതിയിൽ സൈലൻസറുകളിൽ മാറ്റം വരുത്തി ശബ്ദമുണ്ടാക്കുന്നവർക്കെതിരെ വിട്ടുവീഴ്ചയില്ലാത്ത നടപടികൾ ഉണ്ടാകുമെന്ന് ആഭ്യന്തര മന്ത്രാലയം വ്യക്തമാക്കി.